Պրիւքսէլ․- Հայ Դատի Աշխատանքներուն Համար Հանգանակուեցաւ 2.400.000 Տոլար

Շաբաթ, 9 նոյեմբեր 2019-ին, Պելճիքայի մայրաքաղաք՝ Պրիւքսէլի մէջ տեղի ունեցաւ Հայ դատի յանձնախումբերուն եւ գրասենեակներուն կողմէ կազմակերպուած ճաշկերոյթ-դրամահաւաքը, որուն ընթացքին Հայ Դատի աշխատանքներուն համար հանգանակուեցաւ 2.400.000 տոլար։ Պատուոյ սեղանին նստած էին Արցախի Հանրապետութեան նախագահ Բակօ Սահակեան, Մեծի Տանն Կիլիկիոյ Արամ Ա. կաթողիկոս, Հ.Յ.Դ. Բիւրոյի ներկայացուցիչ Յակոբ Տէր Խաչատուրեան, Մեծ Բրիտանոյ եւ Իրլանտայի հայոց թեմի առաջնորդ Գերշ. Տ. Յովակիմ եպս. Մանուկեան, Պելճիքայի թագաւորության մօտ Հայաստանի Հանրապետութեան արտակարգ և լիազօր դեսպան եւ Եւրոպական Միութեան մօտ Հ.Հ. առաքելութեան ղեկավար Թաթուլ Մարգարեան, ՆԱԹՕ-ի մօտ Հայաստանի Հանրապետութեան առաքելութեան ղեկավար Գագիկ Յովհաննիսեան, Պրիւքսէլի մէջ Արցախի Հանրապետութեան մշտական ներկայացուցիչ Իրինա Բեգլարեան, բարերարներ՝. Վարուժան եւ Սիլվա Լափոյեաններ եւ Գաբրիէլ Չէմպէրճի։
Ներկայ էին Հ.Յ.Դ. Բիւրոյի անդամներ, Հ.Յ.Դ. մարմիններու ներկայացուցիչներ, Հայ Դատի յանձնախումբերու եւ գրասենեակներու պատասխանատուներ, նուիրատուներ եւ հիւրեր:

Հանդիսավարն էր Հրայր Սողոմոնեան, որ մէջ ընդ մէջ կ՚ընթերցէր նուիրատուութիւններու ցուցակները։

Մեծի Տանն Կիլիկիոյ Արամ Ա. կաթողիկոս ուղղեց իր հայրապետական պատգամը, որուն մէջ անդրադարձաւ Հայ դատի աշխատանքներու կարեւորութեան, հայ ժողովուրդի դարաւոր պայքարին եւ ներկայիս դիմագրաւած դժուարութիւններուն ու պայքարը շարունակելու անհրաժեշտութեան:

Խօսքին սկիզբը Արամ Ա. կաթողիկոս ըսաւ, որ Հայ դատը միայն սփիւռքի կամ միայն Հայաստանի ու Արցախի դատը չէ, անիկա ամբողջ հայ ժողովուրդին դատն է:

«Մեզի համար Հայաստանի հզօրացումը պայքար է: Արցախի անկախութեան պահպանումը պայքար է: Մենք պահանջատէր ժողովուրդ ենք եւ մեզի համար առաջնահերթ տեղ կը գրաւէ Հայաստանի անկախութեան ամրապնդումը», ըսաւ Արամ Ա. կաթողիկոս` շեշտելով յատկապէս, որ մեզի համար, հայ ժողովուրդին համար Հայ դատը ամէնօրեայ պայքար է: Այսօր Հայ դատի մարմինները ի սփիւռս աշխարհի բարձրագոյն աստիճանի նուիրուածութեամբ, նախանձախնդրութեամբ, հետեւողականութեամբ եւ մանաւանդ կամքով եւ հաւատքով կը հետապնդեն մեր ժողովուրդի իրաւունքները.. Մեր ժողովուրդի իրաւունքներու հետապնդման մէջ անկասկած Հայ յեղափոխական դաշնակցութիւնը ունեցաւ, ունի եւ պիտի ունենայ իր առանցքային տեղը եւ դերը», ըսաւ Արամ Ա. կաթողիկոսը:

Տէր Յովակիմ Սրբազանը ընթերցեց Ամենայն Հայոց Գարեգին Բ. կաթողիկոսի օրհնութեան գիրը:

Արցախի Հանրապետութեան նախագահ Բակօ Սահակեան իր ելոյթին ընթացքին ողջունեց ներկաները, փոխանցեց Արցախի ժողովուրդին ջերմ բարեմաղթանքները, կարեւոր նկատեց այսպիսի ձեռնարկներու կազմակերպումը եւ նշեց, որ ասիկա հարթակ մըն է` քննարկելու համազգային եւ միջազգային զարգացումները, ծանօթանալու տարբեր կարծիքներու:

Նախագահ Բակօ Սահակեան անդրադարձաւ Արցախի պետականաշինութեան, ներքին եւ արտաքին քաղաքականութեան շարք մը հիմնարար գաղափարներու:

Նախագահ Սահակեան շեշտեց, որ մեր բոլոր յաղթանակներու եւ ձեռքբերումներու կեդրոնը ինկած են ժողովուրդի միասնականութիւնը, անկոտրում հաւատքը, հաւաքական կամքը, լաւատեսութիւնն ու քրտնաջան աշխատանքը` աւելցնելով, որ անհրաժեշտ է ընել կարելին այս ուղղութեամբ, հետեւողականօրէն ամրապնդել Հայաստան-Արցախ-սփիւռք եռամիասնութիւնը, զարգացնել ու խորացնել մնայուն գործնական կապերը Արցախի եւ անոր բարեկամներուն միջեւ:

«Աշխարհին մէջ տեղի կ՛ունենան բաւական աշխուժ եւ լուրջ աշխարհաքաղաքական տեղաշարժեր ու փոփոխութիւններ: Անոնց շարքին` այդ փոփոխութիւններու կարեւոր մէկ հոսանքը կ՛ընթանայ մեր եւ յարակից շրջաններուն մէջ: Ատիկա կը պահանջէ աւելի մեծ զգօնութիւն, փոխադարձ գործակցութեան համակարգման աստիճանի բարձրացում, տարբեր երկիրներու հետ տարուող աշխատանքներու, մարտավարութեան եւ ռազմավարութեան մէջ յստակեցումներու եւ փոփոխութիւններու իրականացում», ըսաւ Արցախի Հանրապետութեան նախագահը, որ երախտագիտութիւն յայտնեց ներկաներուն` Արցախին մշտապէս սատարելու, համազգային խնդիրներու լուծման գործին մէջ աշխուժ մասնակցութիւն ունենալու համար:

Հ.Հ. դեսպան Թաթուլ Մարգարեանը ընթերցեց Հայաստանի Հանրապետութեան նախագահ Արմէն Սարգսեանի ուղերձը․-

Սիրելի՛ հայրենակիցներ, Հայ դատի յանձնախմբերի եւ գրասենեակների յարգարժա՛ն ներկայացուցիչներ, տիկնա՛յք, եւ պարոնա՛յք.
Ողջունում եմ բոլորիդ եւ ուրախ եմ, որ մէկ յարկի տակ են հաւաքուել հայ ժողովրդի ճակատագրի հանդէպ սրտացաւ, Հայկական հարցի արդար լուծմամբ շահագրգիռ, Հայ դատը առաքելութիւն հռչակած մարդիկ՝ ազգային, պետական, հասարակական ու քաղաքական գործիչներ, գործարարներ ու բարերարներ տարբեր երկրներից եւ քաղաքներից:
Յարգելի՛ բարեկամներ,
Հայ դատի առաջնահերթ առաքելութիւնը եղել ու մնում է Հայոց ցեղասպանութեան ճանաչումը: Դա ոչ միայն առաքելութիւն է, այլեւ՝ պարտք եւ պարտաւորութիւն:
Անշուշտ, այն ազգանպաստ գործունէութիւնը, որ ծաւալում են Հայ Յեղափոխական Դաշնակցութեան, Հայ դատի յանձնախմբերն ու գրասենեակները աշխարհի տարբեր երկրներում, տեսանելի չէ ամենայն մանրամասնութեամբ: Սակայն նկատի ունենանք, որ այդ գործընթացն ինչ-որ առումով նման է դիւանագիտութեանը, որտեղ ամէն ինչ չէ, որ բացայայտ է:
Ի պատիւ Հայ դատի յանձնախմբերի՝ պէտք է ասել, որ, գտնուելով տարբեր երկրներում, նրանք կարողանում են գործել համակարգուած եւ արդիւնաւէտ: Նրանց ջանքերի շնորհիւ է նաեւ, որ տարբեր պետութիւններ, խորհրդարաններ, միջազգային կառոյցներ ընդունել են Հայոց ցեղասպանութիւնը ճանաչող եւ դատապարտող իրաւական ակտեր: Ամենաթարմ վկայութիւնը ԱՄՆ Ներկայացուցիչների պալատի՝ վերջերս ընդունած թիւ 296 բանաձեւն է, որն արձանագրում է ՝ Միացեալ Նահանգների կառավարութիւնը պէտք է պաշտօնապէս ճանաչի եւ ոգեկոչի Հայոց ցեղասպանութիւնը, չմասնակցի փաստի ժխտմանը եւ խրախուսի Հայոց ցեղասպանութեան հանրային ըմբռնումը:
Այդ ամէնը Հայաստանի Հանրապետութեան պետական ու դիւանագիտական կառոյցների, ինչպէս նաեւ տուեալ երկրների պատկան մարմինների, հասարակական կազմակերպութիւններ, նաեւ սփիւռքի մեր հայրենակիցների, աւանդական կուսակցութիւնների, ազգային եւ եկեղեցական կառոյցների, նրանց աջակիցների, բարեկամների, ընկերների լայն շրջանակի քրտնաջան աշխատանքի, հսկայական ջանքերի արդիւնք է:
Օգտուելով առիթից՝ խորին շնորհակալութիւն եմ յայտնում Հայ դատի գրասենեակներին ու յանձնախմբերին, Հայ դատի նուիրեալներին, անհատներին, աջակիցներին հայանպաստ գործունէութեան, հայրենասիրութեան ու համազգային բարձր գիտակցութեան համար:
Յարգելի՛ ներկաներ, ժամանակակից աշխարհն առաջ է ընթանում մեծ արագութեամբ: Ուստի անհրաժեշտութիւն կայ հռչակած նպատակները, ռազմավարութիւնն ու մարտավարութիւնը համապատասխանեցնել այսօրուան: Հայ դատի գրասենեակների եւ յանձնախմբերի աշխատանքները, Հայոց ցեղասպանութեան ճանաչման հարցից բացի, ընդգրկում են նաեւ այլ ոլորտներ: Հայաստանի միջազգային վարկի ամրապնդմանը, նրա տնտեսական հզօրացմանն ու առաջընթացին, Արցախի հարցի արդարացի լուծմանն ու Արցախի ինքնորոշման իրաւունքի միջազգային ճանաչմանն աջակցելը համազգային այն առաջնահերթութիւններից են, որոնք համահունչ են Հայ դատի գրասենեակների եւ յանձնախմբերի գործունէութեանը: Այս առումով դրուատելի է նրանց օգտակար մասնակցութիւնն այս գործընթացներին:
Անշուշտ, Հայ դատի յանձնախմբերն ու գրասենեակները քաջատեղեակ են այն խնդիրներին, որոնք արդիական են մեր ժողովրդի, Հայաստանի եւ Արցախի հանրապետութիւնների, սփիւռքի հայկական գաղթօճախների համար: Համոզուած եմ, որ Հայ դատի յանձնախմբերն ու գրասենեակները, որպէս ազգային կառոյցներ, յաջողութեան կը հասնեն իրենց ծրագրերում ՝ ջանքերի մէկտեղմամբ, համազգային շահի միասնական գիտակցումով:
Կրկին ողջունում եմ բոլորիդ, մաղթում յաջողութիւն եւ ամենյան բարիք:

Հ.Յ.Դ. Բիւրոյի Հայ Դատի կեդրոնական գրասենեակի պատասխանատու Կիրօ Մանոյեանը ներկայացուց նախորդ հանգանակային ձեռնարկէն ի վեր նիւթական հաշուեկշիռը եւ Հայ Դատի յանձնախումբերու եւ գրասենեակներու համակարգն ու աշխատանքները։
Ցուցադրուեցաւ տեսերիզ Հայ Դատի յանձախումբերու եւ գրասենեակներու համաշխարհային գործունէութիւնը ներկայացնող։

Հ․Յ․Դ․ Բիւրոյի ներկայացուցիչ Յակոբ Տէր Խաչատուրեան իր խօսքին մէջ խորին շնորհակալութիւն յայտնեց բոլոր անոնց, որոնք մասնակցեցան նուիրահաւաքին: Ան դիտել տուաւ, որ ձեռնարկը երախտագիտութեան զգացումի արտայայտութեան զուգահեռ նաեւ առիթ է հաշուետուութեան, ներկայացնելու Հայ դատի Եւրոպայի, Հայաստանի կեդրոնական գրասենեակի, Միջին Արեւելքի գրասենեակի աշխատանքներու ծիրը` աւելցնելով, որ Ուաշինկթընի Կեդրոնական գրասենեակին կողքին շրջանային մակարդակով Հայ դատի գրասենեակներ կը գործեն ամէնուրեք:

«1991 թուականէն սկսեալ, երբ հպարտութեամբ ողջունեցինք Հայաստանի վերանկախացումը, Արցախի գոյամարտի արդիւնքը հանդիսացող Արցախի Հանրապետութեան ստեղծումը, հարստացաւ նաեւ մեր Հայ դատի օրակարգը: Եթէ դասականօրէն կը զբաղէինք Հայոց ցեղասպանութեամբ, այսօր ցեղասպանութիւնը երկրորդ մակարդակի վրայ է, որովհետեւ առաջին մակարդակի վրայ եղած է` մեր բոլոր Հայ դատի գրասենեակներուն եւ յանձնախումբերուն համար, Հայաստանի Հանրապետութեան զօրակցութեան խնդիրը,  անոր միջազգային վարկի, հեղինակութեան բարձրացումը, Արցախի Հանրապետութեան միջազգային ճանաչման խնդիրը` կա՛մ ինքնորոշման իրաւունքի շեշտաւորումով եւ կա՛մ, ուր որ կարելի է, Արցախի միջազգային ճանաչման հարցին արծարծումով: Երկրորդ կարգի վրայ կու գայ Ցեղասպանութեան ճանաչման խնդիրը, որ արդէն բաւական ճամբայ կտրած է, եւ, ասոր կողքին, մենք բացած ենք հատուցումներու օրինական երեսներու քննարկման հարցը մեր հիմնած Հայ իրաւանց խորհուրդին կողմէ, որ կ՛ուսումնասիրէ անհատական եւ հաւաքական հատուցումներու հարցը: Երրորդը` հայապատկան հողերու վրայ հայութեան  իրաւունքներու վերադարձի, հայակերտումի խնդիրն է, իսկ չորրորդը` ընդհանրապէս ժողովուրդին եւ յատկապէս երիտասարդութեան քաղաքականացումն է եւ անոնց առիթներ եւ հնարաւորութիւններ տալու կարելիութիւնը, ոչ թէ իբրեւ խօսք եւ օդային ծրագիրներ, այլ շատ յստակ ծրագիրներ, որոնց մասին տակաւին առիթ պիտի ըլլայ խօսելու, որոնց ընդմէջէն մենք կը փորձենք բանալ դռներ միջազգային մայրաքաղաքներու մէջ, որպէսզի կարենանք մեր այդ երիտասարդները զետեղել քաղաքական, տնտեսական, ելեւմտական, մտաւորական համալսարանական շրջանակներու մէջ, եւ այդպիսով երբեմն հպարտանանք ըսելով, որ բերդը ներսէն գրաւած ենք», յայտնեց Յակոբ Տէր Խաչատուրեան:

Հ․Յ․Դ․ Բիւրոյի ներկայացուցիչը հաստատեց, որ Դաշնակցութեան պարտականութիւնն է ծառայել իր ժողովուրդին` դիտել տալով, որ լաւապէս գիտենք ինչ կը նշանակէ նուիրում, կամաւոր աշխատանք, զոհողութիւն, եւ եթէ հարկ ըլլայ` կեանքի գնով պայքարի մասնակցութիւն: «Բայց 21-րդ դարուն կ՛անդրադառնանք նաեւ, որ միայն կամաւոր աշխատանքը բաւարար չէ, մենք պէտք է ունենանք արհեստավարժ կեդրոններ: Ուրախ ենք ըսելու, որ վերջին  15 տարուան ընթացքին մենք կրցած ենք ստեղծել նման կառոյցներ», յայտնեց Յակոբ Տէր Խաչատուրեան` աւելցնելով, որ անոնք բաւարար ու ամբողջական կրնան չըլլալ, սակայն անկասկած կը շարունակեն տարին 365 օր, շաբաթը 7 օր եւ օրական 24 ժամ միշտ հիմնական պատնէշներու վրայ ըլլալ: «Մեր Հայ դատի զինուորագրեալները, մէկ մասը` արհեստավարժ, ջախջախիչ մասը կամաւոր բանակ, իսկապէս անոնք երկրորդ բանակը կը հանդիսանան` Հայաստանի ու Արցախի բանակներուն կողքին, անոնք մեր քաղաքական դաշտի բանակն են, որ Արցախի եւ Հայաստանի դիւանագիտական ներկայացուցիչներուն կողքին կը պայքարին առաջադրուած չորս հիմնական ոլորտներուն մէջ», շեշտեց Բիւրոյի ներկայացուցիչը: վ

Իր խօսքը եզրափակելով` ան ըսաւ, որ այդ արհեստավարժութեան յաջողութեան եւ պայքարի յարատեւման համար Հ․Յ․Դաշնակցութիւնը կը դիմէ ժողովուրդին, որ միշտ կ՛անսայ դիմումին եւ նեցուկ կը կանգնի Դաշնակցութեան:

Աւարտին, Յակոբ Տէր Խաչատուրեանը յայտարարեց երեկոյի մեծագոյն նուիրատուութիւնները. մինչ այդ կատարուած խոստումներու գումարը հասած էր 1,198,400 տոլար եւ 151,500 Եուրօ: Մեծագոյն նուիրատուութիւններն էին՝ Սիմոն եւ Մարալ Հասըրճեաններ հարիւր հազար ամերիկեան տոլար. Գաբրիէլ Չէմպէրճի՝ հարիւր յիսուն հազար ամերիկեան տոլար. Գագիկ Ծառուկեան՝ երկու հարիւր յիսուն հազար ամերիկեան տոլար. Վարուժան եւ Սիլվա Լափոյեաններ՝ հինգ հարիւր հազար ամերիկեան տոլար։ Ընդհանուր գումարը հասաւ մօտ երկու միլիոն չորս հարիւր հազար ամերիկեան տոլարի։

 

Be the first to comment

Leave a Reply

Your email address will not be published.


*