ՈՒՂԵՐՁՆԵՐ՝ ՄԱՅԻՍԵԱՆ ԵՌԱՏՕՆԻՆ ԱՌԹԻՒ

Յաղթանակի տօնին, պաշտպանութեան բանակին եւ Շուշիի ազատագրութեան 27-րդ տարեդարձի առթիւ, Մայիս 9-ին ուղերձներ յղուեցան Արցախի Հանրապետութեան նախագահ Բակօ Սահակեանի, Հ․Հ․ նախագահ Արմէն Սարգսեանի եւ վարչապետ Նիկոլ Փաշինեանի կողմէ։

Վարչապետը, Արցախի նախկին նախագահ Արկադի Ղուկասեանի, Հայ առաքելական եկեղեցւոյ Արցախի թեմի առաջնորդ Պարգեւ արք. Մարտիրոսեանի, Հայաստանի եւ Արցախի բարձրաստիճան պաշտօնեաներուն հետ այցելեց Ստեփանակերտի յուշահամալիր, ծաղկեպսակ ու ծաղիկներ զետեղեց Մեծ Հայրենական պատերազմին զոհուածներու յիշատակը յաւերժացնող յուշարձանին եւ արցախեան ազատամարտի նահատակներու շիրիմներուն, Շուշի քաղաքին մէջ ծաղկեպսակ ու ծաղիկներ զետեղած է հրասայլ-յուշարձանի պատուանդանին եւ սպարապետ Վազգէն Սարգսեանի յուշարձանին առջեւ:

Բակօ Սահակեանը եւ Նիկոլ Փաշինեանը այցելած են մայրաքաղաք Ստեփանակերտի Աստուածամօր Սուրբ Հովանի մայր տաճար:

Արցախի Հանրապետութեան նախագահ Բակօ Սահակեան Մայիս 9-ին շնորհաւորական ուղերձ յղած է Յաղթանակի տօնին, Արցախի Հանրապետութեան պաշտպանութեան բանակին եւ Շուշիի ազատագրութեան 27-րդ տարեդարձին առիթով․-

«Սիրելի՛ հայրենակիցներ,
Հայրենական մեծ պատերազմի եւ արցախեան ազատամարտի թանկագի՛ն վեթերաններ,
Պաշտպանութեան բանակի յարգարժա՛ն զօրավարներ, սպաներ, զինուորներ,

Արցախի Հանրապետութեան իշխանութիւնների եւ անձամբ իմ անունից ի սրտէ շնորհաւորում եմ ձեզ Յաղթանակի տօնի, Արցախի Հանրապետութեան պաշտպանութեան բանակի եւ Շուշիի ազատագրման 27-րդ տարեդարձին առթիւ: Պանծալի Եռատօն, որը միաւորում է մեր ժողովրդի բոլոր սերունդներին, միաւորում է համայն հայութեանը աշխարհի տարբեր երկրներում:

Մայիսի 9-ին մենք անսահման հպարտութեան ու երախտագիտութեան զգացումով տօնում ենք Մեծ Հայրենականում մեր պապերի եւ հայրերի տարած փառաւոր յաղթանակը: Պատմութեան մէջ վառ են նրանց անօրինակ սխրանքն ու խիզախութիւնը, անձնազոհ նուիրուածութիւնը հայրենիքին ու հարազատ ժողովրդին, ինչն էլ նրանցից ժառանգել է մեր սերունդը եւ սերտել` որպէս հայրենասիրութեան լաւագոյն դաս:

Աչքի առաջ ունենալով նրանց հերոսական օրինակը` մենք, առանց վարանելու, 1992-ին Մայր Հայաստանի եւ սփիւռքի մեր քոյրերի ու եղբայրների հետ միասին զէնք վերցրինք եւ մէկ մարդու պէս կանգնեցինք հայրենիքի պաշտպանութեան դիրքերում, մեզ պարտադրուած պատերազմի պայմաններում ստեղծեցինք պաշտպանութեան բանակ, ազատագրեցինք հայոց բերդաքաղաք Շուշին: Դա հայ ժողովրդի միասնական ուժի, ազատատենչ ոգու եւ անկոտրում կամքի յաղթանակն էր:

Այդ յաղթանակներն այսօր ամուր են պահում մեր քաջ որդիները` պատուով շարունակելով իրենց հերոս նախնիների սուրբ գործը:

Թանկագի՛ն բարեկամներ,

Մայիսեան այս տօնական օրը լի է ինչպէս անհուն ցնծութեամբ ու բերկրանքով, այնպէս էլ խոր ցաւով ու կսկիծով: Մենք յիշում եւ փառաբանում ենք հայրենիքի անկախութեան ու ազատութեան համար իրենց կեանքը զոհաբերած մեր բոլոր նահատակներին: Թող նրանք անմահանան հայրենիքում ծնուող ամէն մի մանկան, ամէն մի շէնացող բնակավայրի, ամէն մի օճախում վառուող կրակի հետ:

Մէկ անգամ եւս շնորհաւորում եմ մեր ողջ ժողովրդին այս հերոսական տօնի առթիւ եւ մաղթում խաղաղութիւն, բարեկեցութիւն ու նոր յաղթանակներ»:

Հայաստանի նախագահ Արմէն Սարգսեան հետեւեալ շնորհաւորական ուղերձը յղած է․-

«Սիրելի՛ հայրենակիցներ,

Ջերմօրէն շնորհաւորում եմ յաղթանակի եւ խաղաղութեան տօնին, Շուշիի ազատագրման օրուայ առթիւ:

Շնորհաւորում եմ Հայրենական եւ Արցախեան պատերազմների բոլոր վեթերաններին, երկրապահին ու ազատամարտիկին, զինուորին ու սպային, մեր ողջ ժողովրդին, Հայաստանի եւ Արցախի բոլոր քաղաքացիներին, ովքեր անհրաժեշտ պահի միասին դառնում են հայրենիքի պաշտպան:

Շնորհաւորում եմ սփիւռքի մեր քոյրերին ու եղբայրներին, նրանց, ովքեր աշխուժօրէն մասնակցեցին ֆաշականութեան դէմ պայքարին, այնուհետեւ` Արցախի պաշտպանութեանը:

Խաղաղութիւնն ու յաղթանակը, որպէս արժէքներ, ապրելու եւ զարգանալու կարեւոր երաշխիք են ժողովուրդների ու պետութիւնների համար: Շուրջ 75 տարի առաջ Համաշխարհային Բ. պատերազմում նաեւ մեր 600 հազար հայրենակիցների ջանքերով ֆաշականութեան դէմ տարած յաղթանակը խաղաղութիւն բերեց աշխարհին: Իսկ 27 տարի առաջ պատմական Շուշիի ազատագրումով մենք կարողացանք յաղթականօրէն բեկել արցախեան պատերազմի ընթացքը:

Մեր հազարաւոր հայրենակիցներ են զոհուել յաղթանակներ կերտելու եւ խաղաղութիւն հաստատելու ճանապարհին:

Խոնարհւում ենք նրանց անմար յիշատակի առաջ:

Յարգելի՛ հայրենակիցներ,

Մենք պէտք չէ գոհանանք միայն անցեալի ձեռքբերումներն արձանագրելով: Պէտք է յաղթանակենք նաեւ ներկայում եւ բոլոր ոլորտներում, այսօ՛ր ստեղծենք վաղուայ նուաճումների ամուր հիմքերը: Այսօրուայ մարտահրաւէրներին դիմակայելու համար պէտք է ունենանք մտքի յաղթանակներ` գաղափարներ առաջարկենք եւ դրանք կեանքի կոչենք բանակում ու քաղաքացիական կեանքում, սահմանին եւ թիկունքում, աշխատանքում ու տնտեսութեան մէջ, մշակոյթում եւ գիտութեան մէջ:

Արցախեան պատերազմում եւ նրա փառապսակ հանդիսացող Շուշիի ազատագրման ժամանակ յաղթեց Հայաստանի, Արցախի եւ սփիւռքի մեր միասնական ուժը, հայի ուժը: Պէտք է ամէն ջանք գործադրենք, որ մեր միասնականութիւնը միշտ անխախտ լինի, որպէսզի մեր յաղթանակները շարունակական լինեն, որպէսզի անխախտ լինի խաղաղութիւնը Հայաստանում ու Արցախում:

Կրկին շնորհաւորում եմ մայիսեան տօների առթիւ, մաղթում եմ բոլորիս նոր յաղթանակներ, իսկ մեր երկրին ու ժողովրդին` խաղաղութիւն եւ զարգացում»:

 

Հայաստանի վարչապետ Նիկոլ Փաշինեան, իր կարգին  շնորհաւորական ուղերձ յղած է Յաղթանակի եւ խաղաղութեան տօնին առիթով․-

«Սիրելի՛ հայրենակիցներ,

Սրտանց շնորհաւորում եմ բոլորիս Յաղթանակի եւ խաղաղութեան տօնին առթիւ:

«Սա մի տօն է, որն ամէնուրեք ոգեկոչւում է խանդավառութեամբ, սիրով եւ յարգանքով, տօն, որը խորհրդանշում է Հայրենական մեծ պատերազմի աւարտը եւ  մարդկութեան պատմութեան նոր դարաշրջանի մեկնարկը: Ի՞նչ է Հայրենական մեծ պատերազմը, եթէ ոչ սխրագործութիւնների, քաջագործութիւնների, անվեհեր հերոսութիւնների անվերջանալի շղթայ` զուգակցուած մարդկային ուղեղը մթագնեցնող սոսկալի յանցագործութիւններով, մարդկային կեանքի անդառնալի կորուստներով եւ մարդկային կեանքը խեղաթիւրող ողբերգութիւններով:

Հայ ժողովրդի համար Համաշխարհային Բ. պատերազմը Մեծ եղեռնից ընդամէնը երկու տասնամեակ անց կրկին գոյի, արդարութեան, չարի ու բարու միջեւ մղուող պայքար էր: Կրելով հսկայական կորուստներ` մենք տուեցինք նաեւ քաջ հերոսներ, անհամար խիզախ զինուորներ ու սպաներ, ովքեր պատերազմի բոլոր ճակատներում պայքարում էին ո՛չ միայն յանուն սեփական հայրենիքի, այլեւ յանուն մարդկային քաղաքակրթութեան պահպանման:

Պատմական զուգադիպութեամբ մենք մայիսի 9-ին տօնում ենք նաեւ մեզ համար կենսական նշանակութիւն ունեցող մէկ այլ իրադարձութիւն: Արցախահայութեան օրրանի` Շուշիի ազատագրումը մեր պատմութեան ամենահերոսական եւ փայլուն էջերից է, որով ի ցոյց է դրւում հայ ժողովրդի ազատ ապրելու, պայքարելու, յաղթելու անկոտրում կամքն ու ոգին:

Եւս մէկ անգամ շնորհաւորում եմ մեր սիրելի վեթերաններին, ազատամարտիկներին, բոլորիս` այսքան նշանակալից եւ յաղթական տօնի առթիւ: Խոնարհւում եմ մեր սուրբ նահատակների եւ հերոսների յիշատակի առաջ:

Թո՛ղ մայիսեան յաղթանակները մեզ զօրավիգ լինեն ուժեղ ու հզօր, մեր պապերի եւ մեր երեխաների երազանքների հայրենիքը կերտելու գործում»:

Be the first to comment

Leave a Reply

Your email address will not be published.


*