Տեղի Ունեցաւ Համազգայինի Հիւսիսային Ամերիկայի Շրջանային Վարչութիւններուն Եռակողմանի Ժողովը

 

Համազգայինի Կեդրոնական վարչութեան նախաձեռնութեամբ, 2015-էն ի վեր սկիզբ առած են Գանատայի, Արեւելեան Ամերիկայի եւ Արեւմտեան Ամերիկայի Շրջանային վարչութիւններու պարբերական հանդիպումները, որոնց 11րդը տեղի ունեցաւ Շաբաթ, 16 եւ Կիրակի, 17 Մարտ 2019-ի շաբաթավերջին, Լոս Անճելըսի մէջ, Արեւմտեան Ամերիկայի Շրջանային վարչութեան Կլենտէյլի նստավայրին մէջ: Ներկայ էին Կեդրոնական վարչութեան անդամ ընկերներ Վիգէն Թիւֆէնքճեան, Հրայր Պարոնեան եւ Մանուկ Չուխաճեան, երեք շրջանայիններու ատենապետները, շրջանային վարչութիւններու անդամները եւ հիւրեր:

Շուրջ քսան համազգայնականներ ի մի բերող այս հանդիպումին, երկու օրուան վրայ տարածուող երեք նիստերուն ընթացքին, զեկոյցներ կարդացուեցան իրենց նոր նախաձեռնութիւններուն, «Արթլինքս»-ի, Երիտասարդական ֆորումի եւ ցարդ եղած փորձարկումներու եւ յաւելեալ բարելաւման միջոցներ ստեղծելու մասին:

Քննարկուեցան նաեւ վարչութիւններու միջեւ ձեռնարկներու փոխանակման հնարաւորութիւնները, նիւթական նոր միջոցներու հայթայթման ձեւերը, պետական նպաստներ ձեռք բերելու կարելիութիւնները, երիտասարդութեան ներգրաւումը եւ դէպի հարիւրամեակ ընթացող Համազգայինի յառաջիկայ տասը տարուան գործունէութեան պատկերացումները

Եռակողմանի ժողովը ընթացաւ շինիչ մթնոլորտի մէջ: Բոլոր մասնակցողներն ալ իրենց օգտակար ներդրումներով՝ նպաստեցին ձեռք ձգուած յաջողութեան: Համազգայինի յառաջիկայ մարտահրաւէրներուն գլխաւորները մշակութային գործունէութեան յաւելեալ հզօրացման եւ երիտասարդներու առաւել եւս ներգրաւման հրամայականներն են, որոնց համար ամէն ճիգ ի գործ կը դրուի երեք շրջաններուն մէջ:

«Բագին»-ին բաժանորդագրութիւններուն անդրադառնալով, ժողովը կարեւորութեամբ շեշտեց առցանց PayPal վճարումներու դրութեան ընծայած դիւրութենէն օգտուելու անհրաժեշտութիւնը:

Շաբաթ, 16 Մարտի երեկոյեան, Կեդրոնական վարչութեան անդամները եւ երեք Շրջանային վարչութիւններու ատենապետները այցելեցին Արեւմտեան Ամերիկայի Հայոց Թեմի Ազգ. Առաջնորդարանը, ուր զիրենք ընդունեց Թեմի Առաջնորդ Բարձր. Տ. Մուշեղ Արք. Մարտիրոսեան: Առաջնորդ Սրբազանին կողքին ներկայ էին Առաջնորդական Փոխանորդ Գերշ. Տ. Թորգոմ Եպս. Տօնոյեան, Արժ. Տ. Ղեւոնդ Քհնյ. Քիրազեան, Ազգ. Վարչութեան ատենապետ Տիար Կարօ Էշկիեան եւ անդամ Տիար Արա Շապանեան։ Հանդիպման ընթացքին Առաջնորդ Սրբազանը ծանօթացաւ Կեդրոնական եւ Շրջանային վարչութիւններու գործունէութեան եւ ծրագիրներուն, եւ իր զօրավիգը յայտնեց այդ ծրագիրներու իրականացման ճիգերուն:

ՀԱՄԱԶԳԱՅԻՆ ՀԱՅ ԿՐԹԱԿԱՆ ԵՒ ՄՇԱԿՈՒԹԱՅԻՆ ՄԻՈՒԹԵԱՆ
ԱՄԵՐԻԿԱՅԻ ԱՐԵՒԵԼԵԱՆ, ԱՐԵՒՄՏԵԱՆ ԵՒ ԳԱՆԱՏԱՅԻ ՇՐՋԱՆԱՅԻՆ ՎԱՐՉՈՒԹԻՒՆՆԵՐ

 

Be the first to comment

Leave a Reply

Your email address will not be published.


*