«Արամ Մանուկեան. Նամականի» Գիրքի Շնորհահանդէս


ԵՐԵՒԱՆ.- Հայաստանի Հանրապետութեան 100-ամեակին նուիրուած միջազգային գիտաժողովի ծիրին մէջ, տեղի ունեցաւ «Արամ Մանուկեան. նամականի» գիրքի շնորհահանդէսը:

Ձեռնարկին ներկայ էին դաշնակցական գործիչներ, գրողներ, պատմաբաններ, գիտնականներ, հիւրեր Վրաստանէն եւ սփիւռքէն: Հայաստանի Ա. հանրապետութեան հիմնադիր, պետական, հասարակական գործիչ, Հ՚Յ՚Դ՚-ի անդամ Արամ Մանուկեանի նամակներու ժողովածուն կազմած է պատմաբան Երուանդ Փամպուքեան, որ նշեց թէ Արամ Մանուկեան իր նամակներուն մէջ յաճախակի գործածած է ծածկանուններ, որոնք հիմնականին մէջ վերաբերած են տեղանուններուն: Գաղտնիութեան նկատառումներէն մեկնելով` դաշնակցական գործիչը յաճախ գործածած է թուանշանային ծածկագիրներ:

Խօսելով Արամ Մանուկեան պետական եւ հասարակական գործիչին մասին` Փամպուքեան ըսաւ. «Արամ Մանուկեան խստապահանջ եւ կարգապահ կուսակցական էր: Ան օժտուած էր մարդիկը համախմբելու արտասովոր հմայքով եւ կարողութեամբ: Անոր խօսքը յանդուգն էր եւ համոզիչ: Նամակները նոր լոյս կը սփռեն եւ կը վկայեն ազգային-ազատագրական պայքարին մէջ Արամ Մանուկեանի ունեցած բախտորոշ դերակատարութեան մասին: «Դժբախտաբար 1914-1915 թուականներուն Արամ Մանուկեանէն սակաւաթիւ գրութիւններ պահպանուած են: Այդ տարիներուն Վասպուրականի, ինչպէս նաեւ միւս հայկական շրջաններու կուսակցութեան արխիւները ժամանակին Ժընեւ չփոխադրելու իբրեւ արդիւնք ոչնչացուած են», նշեց Փամպուքեան, որ աւելցուց թէ Արամ Մանուկեան բաւական ընթեռնլի ձեռագիր ունեցած է, հակառակ անոր որ նամակներէն շատերը հապճեպօրէն գրուած են: Նամակներուն մէջ կ՛առանձնանան Արամ Մանուկեանի լեզուական եւ ուղղագրական առանձնայատկութիւնները:

 

 

Be the first to comment

Leave a Reply

Your email address will not be published.


*