Յայտարարութիւն.- Տեղի Ունեցաւ Հ.Յ.Դ. Բիւրոյի Եւ Գերագոյն Մարմինի Միացեալ Ընդլայնուած Նիստը

 

2017 թուականի հոկտեմբերի 31-ին տեղի ունեցաւ Հ.Յ.Դ. Բիւրոյի եւ Հ.Յ.Դ. Հայաստանի Գերագոյն մարմնի հերթական համատեղ ընդլայնուած նիստը: Անդրադարձ կատարուեց կուսակցութեան կազմակերպական վիճակին եւ անելիքներին, քննարկուեց  երկրում առկայ ընկերային-տնտեսական ընդհանուր իրավիճակը, Հայաստանի պետական կառավարման համակարգում ՀՅԴ գործունէութիւնը: Ներկայացուեցին քաղաքական համախմբական դաշինքի շրջանակներում ստանձնած ոլորտներում առկայ հիմնախնդիրներն ու ընթացող բարեփոխումները:

Հանդէս գալով բացման խօսքով` Հ.Յ.Դ. Բիւրոյի ներկայացուցիչ Հրանդ Մարգարեանը նշեց, որ կարեւոր է անդրադառնալ` արդեօք, մաս կազմելով Հայաստանի պետական կառավարման գործին, իրականացւու՞մ են Դաշնակցութեան առաջադրած նպատակներն ու խնդիրները, քաղաքական համագործակցութիւնն ու յանձն առած պատասխանատուութիւնը ապահովու՞մ են երկրի զարգացման դրական ընթացքը: Ներկայացուած զեկոյցների ու ծաւալուած քննարկման արդիւնքում  կատարուեցին հետեւեալ հիմնական հաստատումները.

1.- Երկրում առկայ ընկերային-տնտեսական իրավիճակը դեռեւս բեկումնային փոփոխութիւնների չի ենթարկուել, թէեւ առկայ են որոշ դրական տեղաշարժեր եւ արդիւնքներ: Առանցքային են մնում ժողովրդի ընկերային վիճակի բարելաւման հարցերը` տեղի ունեցող թանկացումների, գործազրկութեան բարձր մակարդակի, արտագաղթի պայամաններում: Անհրաժեշտ է հաշուի առնել ընկերային հետեւանքները` նուազեցնելով դրանց հաւանական բացասական ազդեցութիւնն անապահով խաւերի նկատմամբ:

2.- Ընկերային արդարութեան հաստատումն ու այդ ուղղութեամբ աշխատանքը ՀՅԴ առաջնային խնդիրն է: Օրէնսդիր ու գործադիր մարմիններում պատասխանատուութիւն ստանձնած կուսակցական գործիչներն իրենց աշխատանքում պէտք է շարունակեն առաջնորդուել ընկերային հիմնախնդիրների լուծման եւ ընկերային արդարութեան ապահովման գիտակցումով:

3.- Կուսակցութեան ծրագրերի եւ մօտեցումների պետական քաղաքականութեան վերածուելը պահանջում են Հայաստանի Հանրապետութեան օրէնսդիր եւ գործադիր մարմիններում առաւել աշխուժ եւ նպատակասլաց գործունէութիւն: Կարեւոր է յատուկ ուշադրութիւն դարձնել 2018 թուականի պետական պիւտճէի նախագծին` այն գնահատելով ռազմավարական ծրագրերի իրականացման հետ համարժէք լինելու տեսանկիւնից:

4.- Կարեւորելով ընթացող բարեփոխումները` առաջնային խնդիր է մնում պետական կառավարման արդիւնաւէտութեան բարձրացումը, դիւանակալական մեքանիզմների պարզեցումն ու որոշումների կայացման եւ գործադրման արդիւնաւէտութիւնը: Արդիւնաւէտ կառավարումը երկրի գրաւչութեան եւ ներդրումների ապահովման կարեւորագոյն գրաւականն է եւ պահանջում է ո՛չ միայն իրաւական դաշտի բարելաւումներ, այլ, յատկապէս, գործադրման արդիւնաւէտ եւ հետեւողական ընթացք:

5.- Սահմանադրական նոր կարգի հաստատման համաթեքսթում առանցքային նշանակութիւն ունի անկախ դատական համակարգի ներդրումը, որը պէտք է երկրում ապահովի արդարութեան եւ իրաւահաւասարութեան իրական միջավայր:

6.- Կրթութեան եւ գիտութեան ոլորտում բազմաթիւ հիմնախնդիրները պահանջում են հետեւողական աշխատանք եւ ճշգրիտ լուծումներ. կարեւորագոյն խնդիրն այդ հարցում մնում է ազգային դաստիարակութեան ապահովումը: Ոլորտի կառուցուածքային փոփոխութիւնները դեռեւս չեն յանգեցրել բովանդակային փոփոխութիւնների եւ կրթութեան որակի բարելաւման, ինչը երկրի զարգացման հիմնական երաշխիքն է:

7.- Տարածքային կառավարման բարեփոխումները պէտք է ապահովեն երկրի համաչափ զարգացումը: Մարզերում եւ համայնքներում առկայ պաշարների եւ ներուժի արդիւնաւէտ գնահատման, օգտագործման, իրատեսական ծրագրերի մշակման եւ գործադրման, համայնքների խոշորացման միջոցով անհրաժեշտ է հասնել տարածքային եւ տեղական ինքնակառավարման մարմինների արդիւնաւէտ գործունէութեան եւ լիարժէք միջոլորտային համագործակցութեան:

8.- Երկրի զարգացման գրաւականներից են բնական միջավայրի եւ պաշարների արդիւնաւէտ օգտագործումն ու կառավարումը: Ոլորտում առկայ հիմնական դժուարութիւնները կապուած են բնական պաշարների օգտագործման ծաւալների, բնապահպանական վտանգների գնահատման եւ նուազեցման արդիւնաւէտ համակարգի ձեւաւորման, ներդրումային դրական միջավայրի ապահովման հետ:

9.- Քննարկման ընթացքում անդրադարձ եղաւ նաեւ դաշնակցական նորանշանակ մարզպետների գործունէութեանը, Շիրակում եւ Արագածոտնում առկայ խնդիրներին եւ դրանց լուծման ջանքերի արդիւնաւէտութեանը:

Այս հաստատումների համաթեքսթում, քաղաքական համագործակցութեան շրջանակներում, ՀՅԴ-ն առաջնորդուելու է նախաձեռնողականութեան ու ինքնուրոյնութեան գործելակերպով: Համատեղ աշխատանքի գլխաւոր ուղղութիւնները շարունակելու են մնալ ընկերային արդարութեան եւ համերաշխութեան հաստատումը, բնակչութեան կեանքի որակի բարելաւումը, ապագայի հանդէպ վստահութեան մթնոլորտի ձեւաւորումը, ազգային անվտանգութեան երաշխաւորումը, հովանաւորչութեան, փտածութեան, մենաշնորհների դէմ իրական պայքարը եւ համակարգային բարեփոխումների իրականացումը:

ՀՅԴ ԲԻՒՐՈՅԻ ՀԱՆՐԱՅԻՆ ԿԱՊԵՐԻ ԳՐԱՍԵՆԵԱԿ

Be the first to comment

Leave a Reply

Your email address will not be published.


*