Նախագահ Սարգսեան Մասնակցեցաւ Իրանի Նախագահի Երդման Պաշտօնական Արարողութեան

 

ԹԵՀՐԱՆ.- Հ.Հ. նախագահ Սերժ Սարգսեան ներկայ գտնուեցաւ Իրանի նորընտիր նախագահ Հասան Ռուհանիի երդման պաշտօնական արարողութեան, որ տեղի ունեցաւ Շաբաթ, Օգոստոս 5-ին:
Կեղի ունեցաւ պաշտօնական ընդունելութիւն, որ կազմակերպուած էր ի պատիւ Թեհրան գտնուող երկիրներու բարձրաստիճան պատուիրակութիւններուն:
Նախագահ Սարգսեան հանդիպում ունեցաւ Իրանի նորընտիր նախագահին հետ:
Երկու երկիրներու նախագահները հանդիպումին քննարկեցին երկկողմանի փոխադարձ գործակցութեան վերաբերող հարցեր:
Անդրադարձ կատարուեցաւ ուժանիւթի, յատկապէս` կազի եւ ելեկտրականութեան, ինչպէս նաեւ փոխադրութեան եւ հաղորդակցութեան մարզերուն, այդ կարգին` Հայաստանի եւ Իրանի տարածքներով Պարսից ծոցը Սեւ ծովուն հետ կապող միջազգային փոխադրական եւ տարանցիկ ուղիներու օգտագործման կարեւորութեան: Կարեւոր նկատուած է նաեւ կազի եւ ելեկտրականութեան մարզերուն մէջ եռակողմանի` Իրան-Հայաստան-Թուրքմենիստան ձեւաչափով համագործակցութեան զարգացումը:
Կողմերը կարեւոր նկատեցին Իրանի եւ Եւրասիական տնտեսական միութեան միջեւ ազատ առեւտուրի համաձայնագիրին շուրջ ընթացող բանակցութիւնները:
Նախագահները անդրադարձան նաեւ շրջանային անվտանգութեան խնդիրներուն, որոնց կարգին յատկապէս Արցախի տագնապի բանակցային հոլովոյթը: Նախագահ Սարգսեան ներկայացուց ներկայ վիճակն ու Հայաստանի դիրքորոշումը` տագնապը բանակցութիւններու միջոցով ԵԱՀԿ-ի Մինսքի խմբակի շրջագիծին մէջ խաղաղ միջոցներով լուծելու վերաբերեալ:
Նախագահ Ռուհանի իր կարգին ընդգծեց, որ Արցախի տագնապին լուծումը կրնայ ըլլալ բացառապէս քաղաքական ճամբով, եւ իր երկրին համար կարեւոր է շրջանի խաղաղութիւնն ու կայունութիւնը:
Նշենք թէ Իրանի արտաքին գործոց նախարարութեան բանբեր Պահրամ Քասեմի Թեհրանի մէջ տուած շաբաթական մամլոյ ասուլիսին ընթացքին յայտարարեց, թէ Իրան Արցախի տագնապի կողմերուն կոչ կ՛ուղղէ` դիմելու երկխօսութեան ու բանակցութիւններու:
«Մենք ուշադրութեամբ կը հետեւինք տարածաշրջանին մէջ զարգացումներուն, յատկապէս` մեր սահմանային հատուածներուն մէջ: Մենք կը հետեւինք մեր սահմաններուն եւ պիտի չարտօնենք, որ տագնապը վնասէ սահմանային տարածքներու մեր բնակչութեան», նշեց Քասեմի:

 

 

Be the first to comment

Leave a Reply

Your email address will not be published.


*