ՖՈՒԹՊՈԼԱՅԻՆ ՔԱՂԱՔԱԿԱՆՈՒԹԵՆԷՆ ՀԵՌՈՒ…ԻՍԿԱԿԱՆ ՈՏՆԱԳՆԴԱԿԸ ՄԵԾ ԽԱՆԴԱՎԱՌՈՒԹԻՒՆ ԿԸ ՍՏԵՂԾԷ

0 0
Read Time:2 Minute, 45 Second
Թէեւ այս տարի հայ մարզիկ չկար դաշտին վրայ, սակայն ըստ երեւոյթին հանդիսատեսներու շարքին շատ են, կլոր գնդակի «խենթ» հայորդիները: Սոյն նկարը, առնուած է Արժանթին - Մեքսիքա, 1/8-րդ աւարտականի մրցումէն: «Հ.Մ.Ը.Մ. Քորտոպա» եռագոյն դրօշը կը ծածանի:… Քորտոպայէն (հանրածանօթ թենիսմէն Դաւիթ Նալպանտեանի ծննդավայրը) ժամանած արժանթինահայեր, դաշտ այցելած էին քաջալերելու իրենց կազմը:

Մթնոլորտը տաք է եւ կը մրցի կլիմային հետ…Այսպէս, Երեւանէն մինչեւ հեռաւոր սահմանային գիւղերը, ամէն հայ կը սպասէ հեռաւոր Հարաւային Ափրիկէի մէջ կատարուող Աշխարհի Ոտնագնդակի ախոյեանութեան մրցումներու ազդանշանին եւ հեւ ի հեւ, մեծ խանդավառութեամբ կը հետեւի արդիւնքներուն:
Փոքր տարիքէն, մինչեւ ալեհեր պապուկը, կը կատարեն իրենց վերլուծումներն ու »եթէ«ական հարցադրումները: »Եթէ, գնդակը սիւնին չզառնուէր եւ մուտք գործէր բերդէն ներս, Ճափոն կարիքը պիտի չունենար տուգանքային հարուածներու…ուր տեղի տուաւ« կը յայտնէր մէկ հանդիսատեսը, լափալիսեան իրականութիւն մը աւելցնելով եւ հրահրելով Փարակուէյի կազմի պաշտպան դրացի մը, որ իր կարգին, կը պատասխանէր թէ. »Ճափոնի բերդն ալ հրաշքով փրկուեցաւ, Փարակուէյի գրոհներէն…«:
Այսպիսի բիւզանդական (թէեւ Իտալիոյ կազմը դուրս մնացած է…) բնոյթ ունեցող վիճաբանութիւններ շատ են, Երեւանի թէ աշխարհի բոլոր տուներէն եւ յատկապէս փողոցներէն ներս:
Մինչ այդ փոքր թէ լայնատարած դաշտերու, լքուած հողաշերտերու եւ նոյնիսկ երկրորդական փողոցներու վրայ, արդէն իսկ լաճ տնաւերներ, իրենց նախընտրած երկրին եւ մարզիկին շապիկը կրելով, կը կատարեն իրենց թաղային…ռայոնական մոնտիալը:
Երիտասարդներն ալ մաս կը կազմեն այս փաղանգին, կրելով իրենց նախասիրած կազմին ու մարզիկին շապիկը: Դեռ յառաջիկայ օրերուն, մթնոլորտը աւելի խանդավառութիւն պիտի ստեղծէ: Ի վերջոյ իսկական ֆութպոլը՝ ոտնագնդակը իր բոլոր անարդար սուլոցներով շատ աւելի հետաքրքրական է քան »ֆութպոլային քաղաքականութիւն«ը:

Photo: Nazik Armenakyan/ArmeniaNow Անգլիացի մը Երեւանի մէջ…ռոք երաժշտութեան սիրահարներուն համար հանրածանօթ է Սթինկի «An Englishman in New York» երգը: Ըստ երեւոյթին, անգլիացի մըն ալ, բաւական հանրածանօթ, բնակութիւն հաստատած է Երեւանի մէջ: Այսպէս, Ֆրանք Լամփարտ(եան) մըն ալ Երեւանեան ճաշարանի մը մէջ կը գործէ: Գերմանական կազմին դէմ ծանր պարտութիւն մը կրելով, Լամփարտ եւ ընկերներ արդէն իսկ վերադարձած են Լոնտոն: Անբախտ Լամփարտի նշանակած մէկ կոլը միլիոնաւոր հանդիսատեսներ ըմբոշխնեցին…բացի օրուան ուրուկուէյցի իրաւարարէն, որ զայն մերժեց յուսախաբութեան մատնելով Անգլիոյ կազմին երկրպագուները, որոնք Բ. կիսախաղին «նաք աութ»ի ենթարկուեցան եւ խոնարհեցան, հետեւողական «պլիցքրիկ»ներ կազմակերպող «Մանշաֆթ»ին դէմ:

Նոյնիսկ, կարգ մը շրջաններ այնքան մը խանդավառութիւն ստեղծած են, որ նաեւ հանդիսատեսներու թիւն ալ շօշափելի յաւելում կրած է: Նաեւ Կանաչ դաշտերուն վրայ, նշելի են յիշատակելի եղափոխութիւններ: Միջազգային գաղթ, արտագաղթ, ներգաղթ…Այնքան մը որ եւրոպական կարգ մը կազմերու մէջ ափրիկեան եւ միջին արեւելեան անուններ կրող մարզիկներ, կը մրցին »Հին ցամաքամաս«ի երկիրներու շապիկներով: Ամէնէն աւելի հետաքրքրականը, մէկ այն երեւոյթն էր, որ երկու եղբայրներ կը կրեն տարբեր երկիրներու ազգային խումբին շապիկները: Եւ աւելին այդ »թշնամի« եղբայրները՝ գերմանացի Պոաթէնկ եւ ղանացի Փրինս առիթն ալ ունեցան իրարու դէմ ճակատելու…:
Ալ աւելին, այդ հնչող եւ ականջը ծակող փողերուն՝ »վուվուզելա«ներուն նման գործիքներ կը հնչեն: Երբ Մայիս 15, 2004ին յայտարարուեցաւ, թէ Հարաւային Ափրիկէ պիտի հիւրընկալէր 2010ի Աշխարհի բաժակի մրցումները, թափ առաւ վուվուզելայի ժողովրդականութիւնը, եւ նոյն օրը շուրջ 20 հազար գործիքներ վաճառուեցան փողոցներու մէջ:
Սակայն վուվուզելան աղմկալից գործիք մըն է, հետեւաբար կասկած չկայ, թէ ոմանք չեն սիրեր զայն:
Հարաւային Ափրիկէի մէջ, փողային գործիքներ միշտ ալ օգտագործուած են, յատկապէս ծանօթ է փողահար Նիու Մասիքիլան, որ բացման հանդիսութեան ելոյթ ունեցաւ իր կազմին հետ: Ափարթէյտի օրերուն, ան տարիներ շարունակ ապրած էր Միացեալ Նահանգներ: Իր նուագած գործերէն (յօրինում՝ Ֆիլեմոն Հու) մէկը՝ »Grazing in the grass« մեծ խանդավառութիւն ստեղծած ու շաբաթներ շարունակ ամէնէն աւելի ունկնդրուող գործը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ԱՐՑԱԽԻ ԺՈՂՈՎՈՒՐԴԻՆ ԻՐԱՒԱԿԱՆ ՈՒԺԸ
Next post ՀՐԱՊԱՐԱԿԱՅԻՆ ԶՐՈՅՑ ՏԻԹՐՈՅԹԻ ՄԷՋ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles