0
0
Մակար ի Գաղիա, 25 Օգոստոս 2021
Արմենակին հանդիպեցայ հայաշատ արուարձանի սրճարանը: Շատեր հոն կու գան աւանակ վազցնելու գրաւի: Արմենակի սեղանակից արտագաղթած Արտյոմը բարձրաձայն սովետահայերէն կը խօսէր: Արմենակ ըսաւ, որ ան լաւ գործարար է, բիզնեմէն:
– Մակա՛ր, Արտյոմ կ’ըսէ, թէ հասութաբեր է Հայաստան ղրկել եւրոպական մուրճեր, «չաքուջ», նորոյթ է տան պատէն «չաքուջ» կախել: Պահանջ կայ մեծ եւ պզտիկ չափերով «չաքուջ»-ի: Պզտիկները պայուսակի մէջ դնելու կամ ինքնաշարժի հայելիէն կախելու:
Խորհեցայ որ Արմենակ կը կատակէր: Բայց Արտյոմ շարունակեց.
– Ըսեմ. շահը ապահով է, մէկի դէմ երեք: Հայրենասիրական գործ է: Քաղաքի, գիւղի եւ ռեստորանի վէճերը զէնքով լուծելու սովորութեան վերջ կը տրուի: «Չագուջ»-ը բաւ է: Ինչո՞ւ տան պատէն կախուած հերոսի սուրի կողքին մեր վարչապետին հնարած «չաքուջ»–ն ալ չկախել:
Ապշած էի: Հայրենասէր բիզնեսմէն Արտյոմը համոզած էր տաք ու պաղ տեսած Արմենակը:
Արտյոմ բիզնեսմէնի համոզիչ խօսքը շարունակեց.
– Մեր վարչապետին պէս, եռագոյն ժապաւէններով գրաւիչ կը դարձնենք «չաքուջ»–ին կոթը: Շուկան միայն Հայաստանը չէ, կան Ռուսիան, Ուքրայինան, Իւզպէքիստանը, հոն ուր հայրենասէրներ կան, լաւ զարդ կ’ըլլայ «չաքուջ»–ը: Բիզնեսը կ’ընդլայնի, զայն գեղեցկացնելով երկաթին կամ կոթի փայտին վրայ կը դրուին ոսկի եւ ադամանդ նախշեր: Շուկայ կ’ըլլան Ամերիկան, Եւրոպան, Աւստրալիան, Լիբանանը, Սուրիան: Մեր ժողովուրդը հայրենասէր է: Հայաստան աշխատատեղեր կը ստեղծուին: Կը սկսինք պզտիկ գումարով:
Ապշած կը դիտէի խանդավառուած Կեդրոնականցին: Արտյոմ շարունակեց.
– Կը սկսինք 20.000 եւրոյով: Պարոն Արմենակը կ’ըլլայ հիմնադիր:
– Այսի՞նքն,- հարցուցի:
– Կը յատկացնէ գումարը, մնացեալ գործով ես կը զբաղիմ: Ընկերութիւնը կը կոչենք ՉԱՔՈՒՋ ԷՄՊՈՐՏ, նախագահ՝ Արմենակ… ի դէպ, ինչպէ՞ս է ձեր ազգանունը:
Պարտք համարեցի միջամտել.
– Սպասեցէ՛ք, պարոն Արմենակ իր տիկնոջ համաձայնութիւնը պէտք է ունենայ, քանի որ դրամատան հաշիւները երկուքին անունով են:
Արտյոմ չյուսահատող բիզնեսմէն էր:
– Դուք լաւ բարեկամն էք պարոն Արմենակի, դուք ալ կրնաք նոյնքան գումարով մասնակցիլ այս շահաւետ բիզնեսին:
Չձգեցի որ շարունակէ: Ըսի.
– Ես դրամատան հաշիւ չունիմ, այդ տիկնոջս գործն է:
Երբ առանձին մնացինք, Արմենակին ըսի.
– Քու ի՞նչ գործդ է «չաքուջ»ի բիզնեսը: Արտյոմի «չաքուջ»–ը կը ճզմէ եւ կը մանրէ քու եւրոներդ եւ անոնց հետքն ալ չես տեսներ: «Չաքուջ»–ի բիզնեսը անօթիի հնարամտութիւն է:
Ամիս մը ետք իմացանք, որ Արտյոմ երկու ներդրողներ գտած է, 40.000 եւրօ գրպանած է եւ անյայտացած:
Միջավայրին ծանօթ Արտյոմ հաւանօրէն հիմնած է «ԱՐՏՅՈՄ ՉԱՔՈՒՋ ԳՈՐՓՈՐԷՅՇԸՆ»ը:
Զբօսաշրջիկները Հայաստանէն վերադարձին տարբեր չափի «չաքուջ»ներ կը բերեն…
Քանի որ «չաքուջ»-ը զէնք չէ, ամէն տարակարծութենէ ետք քանի մը հոգիի գլուխ կը ջարդուի:
«Չաքուջ»-ի բարք եւ բիզնես…
