Տիթրոյթ.- Հայ Օգնութեան Միութիւն «Զաւարեան» Միօրեայ Վարժարանի Ամավերջի Հանդէսը

 

Տիթրոյթի Հայ Օգնութեան Միութեան միօրեայ «Զաւարեան» վարժարանի ամավերջի հանդէսը տեղի ունեցաւ Կիրակի Յունիս 4-ին, Սուրբ Սարգիս Եկեղեցւոյ Լիլեան Արաքելեան սրահին մէջ:
Հանդէսին բացումը կատարեց տնօրէնուհի Տիկին Սօնա Վէնտըվէլտ, որ երախտագիտութեան խօսք ուղղեց ներկաներուն ապա ներկայացուց ուսուցչական կազմը՝ Սարա Ոսկանեան, Թալին Մարկոսեան եւ Սիլվա Թիւֆէնքճեան: Ան գնահատեց ու շնորհակալութիւն յայտնեց անոնց, ամբողջ տարուան ընթացքին տարած աշխատանքին համար:
Հ.Օ.Մ.-ի պատգամը փոխանցեց Շաքէ Պասմաճեան, որ իր խօսքին մէջ մասնաւորաբար շեշտեց հայ դպրոցի կարեւորութիւնը, մանուկներու կեանքէն ներս եւ խնդրեց ծնողներէն որ ամէն Ուրբաթ օրերը իրենց շատ զբաղ յայտագրէն ժամանակ տրամադրեն եւ զաւակները հայկական դպրոց ուղղեն, ուր իրենց միտքերուն եւ սիրտերուն մէջ կը դրօշմուին հայ լեզուն, մշակոյթը, աղօթքը եւ երգերը:
Յայտագիրը սկսաւ աշակերտներու «Մեր Հայրենիք» օրհներգով: 22 աշակերտներ Տիթրոյթի զանազան շրջաններէն ներկայ էին հանդէսին եւ խանդավառօրէն մասնակցեցան, արտասանեցին, երգեցին, երկու կտոր ալ թատերգութիւն ներկայացուցին, որոնք ընդունուեցան ջերմ ծափահարութեամբ, մեծ ուրախութիւն պատճառելով ծնողներուն յատկապէս մեծ հայրերուն ու մայրերուն:
Հանդէսի պաշտօնական բաժնի աւարտին տնօրէնուհի Վէնտըվէլտ Հ.Օ.Մ.-ի միջ վարչութեան ատենապետուհին՝ Սիրվարդ Թէլպէլեանին հետ, միասնաբար յանձնեցին իւրանքանչիւրին վկայագիրները: Միջվարչութիւնը յատուկ յուշանուէրով մը պատուեց Լարա Թէլպէլեանն ու Անտրէ Միրիճանեանը, որոնք կանոնաւորաբար եւ յարատեւօրէն յաճախած են դպրոց:
Նշենք թէ «Զաւարեան» վարժարանի աշակերտներէն՝ Լարա Թէլպէլեան, Հ.Օ.Մ.-ի Արեւելեան շրջանի վարչութեան կողմէ ամէն տարի կազմակերպուող հայերէն լեզուով գրուած շարադրութեան առաջնութեան մրցանակը ստացած է: Այս մրցումին կը մասնակցին Արեւելեան շրջանէն բոլոր հայ վարժարանները:
Հանդիսութեան աւարտին Սօնա Վէնտըվէլտ, շնորհակալութիւն յայտնեց բոլոր ուսուցչուհիներուն, Հ.Օ.Մ.-ի Միջվարչութեան եւ ծնողներուն: Հանդէսը վերջ գտաւ Հոգեշնորհ՝ Տէր Հրանդ Քհնյ. Գէորգեանի բարի պատգամով եւ օրհնութեանբ.

Be the first to comment

Leave a Reply

Your email address will not be published.


*