Քոնկրէսը Միաձայնութեամբ Դատապարտեց Էրտողանի Հրահրած Արարքները

Ամերիկայի Հայ Դատի յանձնախումբը կը տեղեկացնէ, թէ Քոնկրէսը միաձայնութեամբ (397 թեր եւ 0 դէմ) վաւերացուց մայրաքաղաք Ուաշինկթընի մէջ խաղաղ ցուցարարներու վրայ՝ Թուրքիոյ նախագահ Ռեճէպ Թայիպ Էրտողանի հրահանգով եւ անոր թիկնապահներուն կողմէ կատարուած յարձակումը դատապարտող թիւ 354 բանաձեւը:
Այս յարձակումը դատապարտելու եւ զայն կատարողները պատասխանատուութեան կանչելու համար պատրաստուած այս բանաձեւը ներկայացուած էր արտաքին յարաբերութեան յանձնախումբի ատենապետ Էտ Ռոյսի եւ նոյն յանձնախումբի բարձրաստիճան անդամ Էլիըթ Էնկըլի կողմէ:
Այս բանաձեւը Ներկայացուցիչներու տան Արտաքին յարաբերութեանց յանձնախումբին կողմէ Մայիս 25ին միաձայնութեամբ վաւերացուած էր:
Ամերիկայի Հայ Դատի յանձնախումբի գործադիր վարիչ Արամ Համբարեան ողջունեց բանաձեւին քննարկումը Ներկայացուցիչներու տան լիագումար նիստին կողմէ եւ կոչ ըրաւ կառավարութեան, որ դիմէ հաստատ քայլերու, ինչպիսին են Թուրքիոյ դեսպանի արտաքսումը եւ Թուրքիոյ խոստացուած զէնքերու վաճառքին կասեցումը։
«Այսօրուան քուէարկութեամբ, Քոնկրէսը սկսաւ Ուաշինկթընը ձերբազատելու Անգարայի բռնազաւթումէն: Անընդհատ Անգարային քմայքներուն ընդառաջելէ, ցեղասպանութեան արհաւիրքներուն, Թուրքիոյ տարածքին ու անկէ դուրս, արտսահամնի մէջ անոր բիրտ վարքագիծին հանդէպ կոյր ձեւանալէ ետք, Միացեալ Նահանգները, սկսելով Ներկայացուցիչներու տունէն, անկիւնադարձ մը արձանագրեց այսօր, դիմադարձելով Թուրիոյ բրտութիւններուն եւ յարաճուն հակաամերիկեան վարքագիծին», ըսաւ Արամ Համբարեան:
Բանաձեւին մէջ կը նշուի, թէ խաղաղ ցուցարարներու վրայ կատարուած այս յարձակումը ոտնակոխում մըն է ամերիկեան սկզբունքներուն եւ Միացեալ Նահանգներու քաղաքացիներու իրաւանց: Հոն նաեւ կը քննադատուի այն իրողութիւնը, որ ամերիկացի քաղաքացիներ ծեծած երկու թուրք թիկնապահները, կարճ ժամանակով ձերբակալուելէ ետք՝ ազատ արձակուած են, անոնց դիւանագիտական անձեռնմխելիութեան պատճառով, հակառակ անոր որ արտաքին գործոց նախարարութիւնը կրնար անոնց անձեռնմխելիութիւնը քաշելու պահանջ ներկայացնել Անգարայի իշխանութեանց՝ նկատի ունենալով անոնց կատարած բռնարարքներուն տարողութիւնը: Հուսկ, բանաձեւին մէջ կը շեշտուի, թէ այս մէկը Էրտողանի թիկնապահներուն կողմէ արձանագրուած առնուազն երրորդ վայրագ միջադէպն է Միացեալ Նահանգներու մէջ, ու կը պահանջուի պաշտօնապէս ամբաստանել եւ դատապարտել բոլոր թիկնապահները, որոնք խախտած են ամերիկեան օրէնքները:

Be the first to comment

Leave a Reply

Your email address will not be published.


*