ԵՒՐՈՊԱՅԻ ՀԱՅ ԴԱՏԻ ԳՐԱՍԵՆԵԱԿԻ ՀԻՄՆԱԴՐՈՒԹԵԱՆ 15 ԱՄԵԱԿԻ ՆՇՈՒՄ


ՊՐԻՒՔՍԷԼ.- Հ.Յ.Դ. Եւրոպայի Հայ Դատի գրասենեակի հիմնադրութեան 15-ամեակի առթիւ, երկուշաբթի Մայիս 29-ին, տեղի ունեցաւ հիւրասիրութիւն մը, տեղւոյ «Թոն» պանդոկի սրահէն ներս:
Ներկայ էին մօտ հարիւր հրաւիրեալներ, որոնց կարգին` Պրիւքսէլ շրջանի ֆրանքոֆոն խորհրդարանի նախագահ՝ տկն. Ժիւլի տը Կրոթ, Հայաստանի արտաքին գործերու փոխնախարար՝ Կարէն Նազարեան, Պելճիքայի թագաւորութեան, Լիւքսամպուրկի դխսութեան եւ Եւրոպական միութեան Հ.Հ. արտակարգ եւ լիազօր դեսպան՝ Թաթուլ Մարգարեան, ՆԱԹՕ-ի Հ.Հ. մշտական ներկայացուցիչ դեսպան Արմէն Եդիգարեան, Հ.Յ.Դ. Բիւրոյի անդամ, Հայ Դատի Կեդրոնական խորհուրդի նախագահ Յակոբ Տէր Խաչատուրեան, Հ.Յ.Դ. Բիւրոյի անդամներ՝ Արմէն Ռուստամեան եւ Կիրօ Մանոյեան, Եւրոպական Միութիւն – Հայաստան բարեկամութեան խումբի նախագահ՝ եւրոերեսփոխան Էլէնի Թէոխարուս, Եւրոպական միութեան խորհրդարանի եւ պելճիքացի պատգամաւորներ, Եւրոպական միութեան խորհուրդի եւ յանձնաժողովի ներկայացուցիչներ, Ջաւախքի հայկական կազմակերպութիւններու համակարգող խորհուրդի ներկայացուցիչ Արտակ Գաբրիէլեան, Հ.Հ. մարդկային իրաւանց պաշտպան Արման Թաթոյեան, ինչպէս նաեւ Եւրոպայի տարածքին գործող Հայ Դատի յանձնախումբերու ներկայացուցիչներ, որոնք Պրիւքսէլ կը գտնուէին, ամսկանցելու համար Եւրոպայի Հայ Դատի համագումարին: Ներկայ էին նաեւ Թուրքիոյ Ժողովուրդներու ժողովրդավար կուսակցութեան (HDP) Եւրոպայի ներկայացուցիչը, ինչպէս նաեւ Րուանտայի թուցիներու «Իպուքա» կազմակերպութեան ներկայացուցիչները:
Եւրոպայի Հայ Դատի յանձնախումբի նախագահ Գասպար Կարապետեան, ելոյթով մը ողջունեց ներկաները եւ արժեւորեց անոնց մասնակցութիւնը ի նպաստ Հայ Դատի պայքարին, Հայկական Ցեղասպանութեան ճանաչման եւ պահանջատիրութեան, Արցախի մեկուսացումէն դուրս բերելու գործընթացին, Արցախի ժողովուրդի ազատ ինքնորոշման իրաւունքին եւ Հայաստան – Եւրոպական միութիւն յարաբերութիւններու զարգացման գործընթացին: Ան կարեւորեց 15-ամեայ ուղին, որուն ընթացքին ներկաներէն շատեր բերած են մասնակցութեան իրենց բաժինը:
Ողջոյնի խօսքեր արտասանեցին նաեւ Յակոբ Տէր Խաչատուրեան, դեսպան Թաթուլ Մարգարեան, եւրոերեսփոխան Էլէնի Թէոխարուս եւ Ժիւլի տը Կրոթ: Ապա` ներկաներուն ցուցադրուեցաւ Եւրոպայի Հայ Դատի գրասենեակի 15-ամեայ գործունէութիւնը ամփոփող վիտէօ-երիզ մը:

Be the first to comment

Leave a Reply

Your email address will not be published.


*