ԳԵՂԱՆԿԱՐՉԱԿԱՆ ԳՈՐԾԵՐՈՒ ՑՈՒՑԱՀԱՆԴԷՍ Ի ՆՊԱՍՏ Հ.Օ.Մ.-Ի ՈՒՍՈՒՄՆԱԿԱՆ ՖՈՆՏԻՆ

Հայ Օգնութեան Միութեան Արեւելեան Միացեալ Նահանգներու Արեւելեան շրջանի Ուսումնական Ֆոնտի շահարկումներէ գոյացած գումարները կը նպաստեն Համալսարանական աշակերտներու կրթանպաստ տրամադրելու։
Հ.Օ.Մ.-ի Արեւելեան Միացեալ Նահանգներու շրջանը համալսարանական ուսման կրթաթոշակ կը յատկացնէ հիմնուելով աշակերտներու արժանիքներուն, նիւթական կարիքներուն ու հայ գաղութի կեանքէն ներս իրենց վերցուցած դերակատարութեան վրայ։
2016 տարեշրջանին $40,000 բաշխուեցաւ Համալսարանական աշակերտներու, որպէսզի կարենան իրենց ձգտումները իրագործել տիրանալու բարձրագոյն դիրքի։
Արդարեւ, Հայ Օգնութեան Միութեան Միացեալ Նահանգներու Արեւելեան Շրջանային Վարչութիւնը, համագործակցելով Փինաճեանի գործերը պահող ցուցադրատան հետ, կազմակերպած է յատուկ ցուցահանդէս մը, որ տեղի պիտի ունենայ Մարտ 31-էն Ապրիլ 2, 2017-ին Նիւ Եորքի Սուրբ Գրիգոր Լուսաւորիչ Մայր Եկեղեցւոյ ներքնասրահէն ներս, 221 East 27th Street, NY, NY։

Շաբաթ Ապրիլ 1, երեկոյեան ժամը 7։00-էն՝ մինչեւ 10։00
Պաշտօնական բացման հանդիսութիւն
Ուրբաթ Մարտ 31, Կէսօրէ ետք ժամը 4։00-էն՝ մինչեւ 10։00
Շաբաթ Ապրիլ 1, կէսօր ժամը 12։00-էն՝ մինչեւ 4։00
Կիրակի Ապրիլ 2, Կէսօրէ ետք ժամը 1։00-էն՝ մինչեւ 4։00
Պիտի ցուցադրուին Փինաճեանի գործերէն նախապէս հազուադէպօրէն երեւցած փունջ մը, իր քսաներորդ դարու կէսերուն պատկանող վերացական եւ կեանքին վերջին շրջանէն առնուած բնանկարներ, որոնք ծախու պիտի դրուին պարզ հանրութեան մատչելի գիներով։
2013-ի Մարտին արուեստի աշխարհը ցնցուեցաւ լուրով մը։ Լոնկ Այլընտի մէջ գտնուող փոքրիկ բնակարանի մը նկուղին մէջ յայտնաբերուած էին հազարաւոր արուեստի գործեր, որոնք կը պատկանէին մահացած արուեստագէտի մը, որուն անունին ոչ մէկը ծանօթ էր։ Տեղական ու համաշխարհային հարիւրաւոր թերթեր ու լրատուամիջոցներ սկսան խօսիլ հայ արուեստագէտի մը՝ Արթուր Փինաճեանի մասին, որուն գործերն էին որ լոյս աշխարհ եկած էին։
2007-ին երկու գործարարներ փոքրիկ առանձնատուն մը կը գնեն Պելփորթ,Նիւ Եորքի մէջ, զայն վերանորոգելու նպատակով։ Անոնք կառատան մէջ կը գտնեն հազարաւոր գեղանկարներ, որոնք կը պատկանէին տան նախկին տանտիրոջ՝ Արթուր Փինաճեանին, որ մահացած էր 1999-ին, 85 տարեկանին։
Փինաճեան, որ ծնած էր 1914-ին հայ ընտանիքի մը մէջ, իր մանկութիւնը անցուցած էր Հոպոքըն, Նիւ Ճըրզիի մէջ։ Ան ինքնուս արուեստագէտ մը եղած էր, որ ամբողջ կեանքին ընթացքին գծած ու նկարած էր, բայց իր գործերէն ոչ մէկը կրցած էր գնահատանքի արժանացնել կամ ծախել։ Ամբողջ կեանքին ընթացքին նիւթական դժուարութիւններէ տառապած էր։ Կեանքին վերջին տարիներուն փոխադրուած էր Լոնկ Այլընտի բնակարանը քրոջը հետ, որուն հետ ապրած էր իր կեանքին մեծ մասը։ Ան յուսախափուած իր գործերուն հանդէպ եղած անտարբերութենէն, խնդրած է իր ընտանիքի անդաներէն որ իր մահէն ետք բոլոր իր գործերը թափեն։ Զարմիկ մը տէր կանգնած է նկարներուն ու զանոնք փրկած է կորուստէ։
Տեսնելով Փինաճեանի անխնամ գործերը, տունը գնողները ջնջին գումարի փոխարէն անոնք ալ կը գնեն։ Անոնք տարիներով կ՚աշխատին գործերուն վրան, որոնք փոշոտած ու մգլոտած էին, եւ ի վերջոյ զանոնք կը հասցնեն ներկայանալի վիճակի մը։ Ապա կը ներկայացնեն արուեստի պատմաբանի մը, որ զանոնք կը գնահատէ հազարաւոր տոլարներու արժողութեամբ, կարգ մը կտորներ տասնեակ հազարներու արժէքով, ընդհանուր հաւաքածոյի արժէքը ենթադրելով որ ապագային կրնայ հասնիլ երեսուն միլիոնի։

Արթուր Փինաճեանի Նկարչական Գործերու Ցուցահանդէս-Վաճառքը պիտի նպաստէ Հ.Օ.Մ.-ի Արեւելեան Ամերիկայի Շրջանի Ուսումնական ծրագիրներու Ֆոնտին։
Հ.Օ.Մ.-ը հիմնադրուած է 1910-ին Նիւ Երոքի մէջ։ Ան բարեսիրական ու կրթական ծառայութիւններով կը սատարէ համայն հայութեան։ Հ.Օ.Մ.-ի Միացեալ Նահանգներու Արեւելեան Շրջանայինը ծրագիրներ կը մշակէ ու զանոնք կ՚իրականացնէ Միացեալ Նահանգներու Արեւելեան Շրջանի հայկական գաղութներուն մէջ, ինչպէս նաեւ Հայաստանի, Արցախի, Ջաւախքի եւ Սուրիոյ մեր հայրենակիցներուն համար։
Հ.Օ.Մ.-ի Արեւելեան Շրջանի ծրագիրներն են։
– Հ.Օ.Մ.-ի Երիտասարդական ծրագիր
– Լազարեան Բարձրագոյն Ուսման եւ Ենթա-մասնագիտական Կրթաթոշակներ
– Ազգային Առաջնորդարանի Ուսումնական Խորհուրդի
– Հ.Ե.Դ. Հայաստան Քէմփի Ճամբարի մասնակցողի նպաստ
– Հայաստան Քէմփի տարեկան յատկացում
– Արեւելեան Ամերիկայի Հայ Վարժարաններու տարեկան յատկացում
– Հայաստանի եւ Արցախի մէջ Որբախնամ նպաստ
– Շարունակական խնամատիրութիւն Սօսէ մանկապարտէզներու, Արցախի
– Մօր ու Մանկան Առողջապահական Կեդրոն, Ախուրեան Շրջան, Հայաստան
– Մարդասիրական օժանդակութիւն Սուրիահայութեան
Կը հրաւիրենք մեր գաղութը ներկայ գտնուելու այս բացառիկ ցուցահանդէսին եւ ըմբոշխնելու հայ արուեստագէտին գործերը, որոնք կը համարուին քսաներորդ դարու ամէնահետաքրքրական արուեստի յայտնաբերումը։

Be the first to comment

Leave a Reply

Your email address will not be published.


*