Թովմաս (Թամ) Վարդապետեանի Յիշատակին

Գարեգին Քհնյ. Պետուրեան
Օրէնճ Քաունթի, Քալիֆորնիա
Կեանքի ընթացքին կը հանդիպինք մարդոց, որոնց ներկայութիւնը առաւել քաղցրութիւն ու գեղեցկութիւն կը բերեն կեանքին։ Այդ մարդկանց բերած ներդրումն ու յիշատակը չի սահմանափակուիր կեանքի պայմաններով ու աշխարհագրական վայրերով։
Նիւ Ինկլընտի մէջ ապրած օրերուս, Թովմաս Վարդապետեանի – (Թամ)ի – նման բարի, ազնիւ, խոնարհ եւ մտաւորական անձի մը հանդիպիլը, իսկապէս իւրայատուկ իմաստ ունեցաւ։ Ս. Գրիգոր Եկեղեցւոյ հովուական շրջանէն սկսած մտերմութիւնն ու բարեկամութիւնը կը մնան այն խօսուն փաստը, որ Թամի նման արժանաւոր մարդիկ չեն մեռնիր, այլ անոնց յիշատակը յաւէտ կը մնայ։
Թամը մեծ արժանիքներու տէր հայորդի մը եղաւ, ան երբեք չէր խօսէր իր արժանիքներուն կամ կարողութիւններուն մասին, սակայն անոնք ինքնաբերաբար կը յայտնաբերուէին իր ապրած ու գործած կեանքին ընդմէջէն։
Քանիցս ինծի հետ հարցազրոյցներ կը կատարէր զանազան հարցերու շուրջ, ըլլան անոնք երիտասարդութիւնը յուզող հարցեր, հայ եկեղեցւոյ դերը արեւմտեան ափերուն մէջ, ինչպէս նաեւ Սուրիոյ հայութեան իրավիճակին մասին, միշտ առաջարկելով բարւոք լուծումներ, որոնք կ՛արտացոլային իր յօդուածներուն ընդմէջէն։ Սուրիոյ հայութիւնը եւ մանաւանդ անոնց վերջին տարիներու պատերազմէն կրած նեղութիւններն ու դժուարութիւնները, մնայուն մտահոգութիւն էին Թամին համար, շատ մը իր յօդուածներուն առանցքը կազմելով։
Լուսանկարչական մեքենան միշտ իր ձեռքին, կ՛ուզէր պատմութեան մէջ արձանագրել ամէն յիշատակելի պահ, որ կը մարմնաւորուէր արուեստի հմտութեամբ։
Թամին հայկական անշահախնդիր արժանիքները կ՛արտացոլային նոյն եկեղեցւոյ Կիրակնօրեայի հայկական դասընթացքներուն ընդմէջէն, ուր լեզուի կողքին ան մանաւանդ կը դրոշմէր հայկական ոգին ու զգացումը, տեղական վարժարաններ յաճախող հայորդիներու մտքին ու հոգիին մէջ։
Թամ գործօն անդամ էր շրջանի յատուկ յանձնախումբի մը, որուն առաքելութիւնն է խօսիլ եւ ուսուցանել Հայկական Ցեղասպանութեան ու հայ մշակոյթի մասին։ Իրեն համար այդ յանձնախումբին անդամ ըլլալը առիթ մըն էր որպէսզի տեղական միջնակարգ ու երկրորդական վարժարաններու օտար աշակերտներուն բացատրէր հայ ժողովուրդի աննկուն կամքին ու հայ մշակոյթի հարստութեան մասին։
Սերունդներ երախտապարտութեամբ պիտի յիշեն Թամի թողած աւանդն ու ներդրումը, անշահախնդիր սէրն ու նուիրումը հայութեան ու հայկական ոգիին հանդէպ, ըլլայ համայնական թէ անհատական ծիրերէն ներս։
Յիշատակն արդարոց օրհնութեամբ եղիցի։

 

Be the first to comment

Leave a Reply

Your email address will not be published.


*