Հ.Օ.Մ.-ի Արեւելեան Ա.Մ.Ն.-ի Ուսումնական ծրագիրներու Ֆոնտ.- Արթուր Փինաճեանի Նկարչական Գործերու Ցուցահանդէս

2013-ի Մարտին արուեստի աշխարհը ցնցուեցաւ լուրով մը։ Լոնկ Այլընտի մէջ գտնուող փոքրիկ բնակարանի մը նկուղին մէջ յայտնաբերուած էին հազարաւոր արուեստի գործեր, որոնք կը պատկանէին մահացած արուեստագէտի մը, որուն անունին ոչ մէկը ծանօթ էր։ Տեղական ու համաշխարհային հարիւրաւոր թերթեր ու լրատուամիջոցներ սկսան խօսիլ հայ արուեստագէտի մը՝ Արթուր Փինաճեանի մասին, որուն գործերն էին որ լոյս աշխարհ եկած էին։
2007-ին երկու գործարարներ փոքրիկ առանձնատուն մը կը գնեն Պելփորթ,Նիւ Եորքի մէջ, զայն վերանորոգելու նպատակով։ Անոնք կառատան մէջ կը գտնեն հազարաւոր գեղանկարներ, որոնք կը պատկանէին տան նախկին տանտիրոջ՝ Արթուր Փինաճեանին, որ մահացած էր 1999-ին, 85 տարեկանին։
Փինաճեան, որ ծնած էր 1914-ին հայ ընտանիքի մը մէջ, իր մանկութիւնը անցուցած էր Հոպոքըն, Նիւ Ճըրզիի մէջ։ Ան ինքնուս արուեստագէտ մը եղած էր, որ ամբողջ կեանքին ընթացքին գծած ու նկարած էր, բայց իր գործերէն ոչ մէկը կրցած էր գնահատանքի արժանացնել կամ ծախել։ Ամբողջ կեանքին ընթացքին նիւթական դժուարութիւններէ տառապած էր։ Կեանքին վերջին տարիներուն փոխադրուած էր Լոնկ Այլընտի բնակարանը քրոջը հետ, որուն հետ ապրած էր իր կեանքին մեծ մասը։ Ան յուսախափուած իր գործերուն հանդէպ եղած անտարբերութենէն, խնդրած է իր ընտանիքի անդաներէն որ իր մահէն ետք բոլոր իր գործերը թափեն։ Զարմիկ մը տէր կանգնած է նկարներուն ու զանոնք փրկած է կորուստէ։
Տեսնելով Փինաճեանի անխնամ գործերը, տունը գնողները ջնջին գումարի փոխարէն անոնք ալ կը գնեն։ Անոնք տարիներով կ՚աշխատին գործերուն վրան, որոնք փոշոտած ու մգլոտած էին, եւ ի վերջոյ զանոնք կը հասցնեն ներկայանալի վիճակի մը։ Ապա կը ներկայացնեն արուեստի պատմաբանի մը, որ զանոնք կը գնահատէ հազարաւոր տոլարներու արժողութեամբ, կարգ մը կտորներ տասնեակ հազարներու արժէքով, ընդհանուր հաւաքածոյի արժէքը ենթադրելով որ ապագային կրնայ հասնիլ երեսուն միլիոնի։
Արդարեւ, Հայ Օգնութեան Միութեան Ա.Մ.Ն.-ի Արեւելեան Շրջանայինը, համագործակցելով Փինաճեանի գործերը պահող ցուցադրատան հետ, կազմակերպած է յատուկ ցուցահանդէս մը, որ տեղի պիտի ունենայ Մարտ 31էն Ապրիլ 2, 2017-ին Նիւ Եորքի Սուրբ Գրիգոր Լուսաւորիչ Մայր Եկեղեցւոյ ներքնասրահէն ներս, 221 East 27th Street, NY, NY։ Պիտի ցուցադրուին Փինաճեանի գործերէն նախապէս հազուադէպօրէն երեւցած փունջ մը, իր քսաներորդ դարու կէսերուն պատկանող վերացական եւ կեանքին վերջին շրջանէն առնուած բնանկարներ, որոնք ծախու պիտի դրուին պարզ հանրութեան մատչելի գիներով։
Այս ցուցահանդէս-վաճառքին հասոյթը պիտի տրամադրուի Հ.Օ.Մ.-ի Արեւելեան Շրջանային Վարչութեան, ծառայելու համար անոր Ուսումնական ծրագիրներու իրականացման։
Հ.Օ.Մ.-ը հիմնադրուած է 1910-ին Նիւ Երոքի մէջ։ Ան բարեսիրական ու կրթական ծառայութիւններով կը սատարէ համայն հայութեան։ Հ.Օ.Մ.-ի Ա.Մ.Ն.-ի Արեւելեան Շրջանայինը ծրագիրներ կը մշակէ ու զանոնք կ՚իրականացնէ Ա.Մ.Ն.-ի Արեւելեան Շրջանի հայկական գաղութներուն մէջ, ինչպէս նաեւ Հայաստանի, Արցախի, Ջաւախքի եւ Սուրիոյ մեր հայրենակիցներուն համար։
Հ.Օ.Մ.-ի Արեւելեան Շրջանայինը նիւթական օժանադակութիւն կը յատկացնէ արժանաւոր աշակերտներու եւ կրթական նպաստներ կը տրամադրէ համալսարանականներու։ Ան նաեւ բժշկական խնամք կ՚ապահովէ Հայաստանի Ախուրեան շրջանի 40,000 բնակչութեան «Մօր Եւ Մանկան» ծննդատան ու դարմանատան միջոցաւ։ Ան նաեւ կը հովանաւորէ 400 երեխաներ եւ կ՚ապահովէ 35-ի կրթական ծախսերը Հայաստանի եւ Արցախի մէջ։
Սուրիոյ ճգնաժամի սկիզբէն ի վեր Հ.Օ.Մ.-ի Արեւելեան Շրջանայինը զանազան ծրագիրներ մշակեց ու աջակցութեան ձեռք երկարեց Սուրիահայութեան։ 500,000 Ամերիկեան Տոլարէն աւելի օժանդակութիւն փոխանցուեցաւ Սուրիոյ հայ համայնքին, ուտելիք եւ դեղորայք մատակարարելով տեղւոյն կարիքաւոր ընտանիքներուն, ինչպէս նաեւ կանգուն ու աշխոյժ պահելու գաղութին դպրոցներն ու կազմակերպութիւնները։
Կը հրաւիրենք մեր գաղութը ներկայ գտնուելու այս բացառիկ ցուցահանդէսին եւ ըմբոշխնելու հայ արուեստագէտին գործերը, որոնք կը համարուին քսաներորդ դարու ամէնահետաքրքրական արուեստի յայտնաբերումը։

Հ.Օ.Մ.-ի Ա.Մ.Ն.-ի Արեւելեան Շրջանային Վարչութիւն

Be the first to comment

Leave a Reply

Your email address will not be published.


*