ՅԱՄԻ ՏԵԱՌՆ 2015…

ARFD-AYF-125

ԹԱԹՈՒԼ ՍՈՆԵՆՑ-ՓԱՓԱԶԵԱՆ
Պոսթըն 

Ամբողջ մէկ դար ու քառորդ, Հայ Յեղափոխական Դաշնակցութիւնը – ծննդեան անունով Հայ Յեղափոխականների Դաշնակցութիւն – այսօր, իր այլազան կայքէջներով կը ներկայանայ ընդհանրապէս անտարբեր աշխարհին՝ որպէս Հայ Ընկերվարական Կուսակցութիւն, իսկ աշխարհացրիւ հայութեան եւ անոր դիւանակալ բարեկամներուն ու երդուեալ թշնամիներուն՝ որպէս Հայ Դատ, իր բազմաթիւ ու բազմալեզու գրասենեակներով։

Ամբողջ մէկ դար ու քառորդ, այս կազմակերպութիւնը — յղացուած ու աշխարհ բերուած խումբ մը երիտասարդ, ընկերվար-ժողովրդավար գաղափարներով սնած յեղափոխականներու կողմէ – յաճախ ամենադաժան պայմաններու տակ, յաջողեցաւ մնալ արթուն պահակը դատի մը՝ որուն արդար լուծումը իր ժամանակին, առաջքը առած պիտի ըլլար մեր առջեւ պարզուած ու պարզուող աներեւակայելի այլ եւ անժխտելի իրողութիւն դարձած աղէտներուն՝ որոնց չարաբաստիկ շարքը դեռ կը խոստանայ երկարիլ…

Իրողութիւններու այս խառնարանին մէջ, ուր մարդկային կեանքի արժեզրկումը ամէն օր կը մրցի դրամանիշերու եւ բաժնետոմսերու արժեզրկման հետ, ու՞ր է արդար դատի մը տեղը. ու՞ր է Արդարութեա՛ն տեղը։ Ու՞ր է, ի վերջոյ մե՛ր հարիւրամեայ Արդար Դատին ռահվիրան հանդիսացող հարիւրքսանըհինգամեայ Հայ Յեղափոխական Դաշնակցութեան տեղը՝ ուրկէ ան պիտի ճշդէ իր ճանապարհը դէպի հայ ժողովուրդի կիսաւարտ ազատագրական պայքարին նորագոյն մարտահրաւէրներու անխուսափելի գուպարը։

Անկասկած, պատմական բացառիկ նշանակութիւն ունեցող, իր վերջին հանգրուանին հասնող 2015 թուականը — Հայոց Ցեղասպանութեան իր Հարիւրամեակով եւ Հայ Յեղափոխական Դաշնակցութեան Հարիւրքսանըհինգամեակով — Հայ Դատի վերանորոգման ու վերաքաղաքականացման ասպարէզի մը իրողութեան առջեւ դրաւ աշխարհացրիւ հայութիւնը, միացեա՛լ տեսլականի մը կարելիութիւններով։ Այս իրողութեան արդիւնք կարելի է նկատել Պոլսոյ Արմէն ճամբարի վերադարձը թրքահայ գաղութին՝ իրականացած Նոր Զարթօնքի շուրջ հաւաքուած պահանջատէր երիտասարդութեան աննահանջ հսկումին, եւ Մեծի Տանն Կիլիկիոյ կաթողիկոսարանին բացած դատը՝ ի խնդիր Սիսի վանք-կաթողիկոսարանի համալիրին վերադաձման իր օրինական սեփականատիրոջ՝ Մեծի Տանն Կիլիկիոյ կաթողիկոսութեան։ Մեծ Եղեռնի Հարիւրամեակի Յիշելու եւ Պահանջելու այս շօշափելի դրսեւորումները կարծես եկան հաստատելու համայն հայ ժողովուրդի կամքէն բխած լոզունգին կարողականութիւնը։

Էր ժամանակ, երբ արեւը մար չէր մտներ աշխարհածաւալ բրիտանական կայսրութեան վրայ. այսօր, իրաւամբ կարելի է ըսել, թէ արեւը մար չի մտներ աշխարհով մէկ ցրուած հայ հաւաքականութիւններու վրայ, Աւստրալիայէն մինչեւ Բրազիլիա, ընդգրկելով աշխարհի բոլո՛ր ցամաքամասերը։ Անժխտելի եւ յարաշարժ ներկայութիւն մը՝ որուն թէ՛ ֆիզիքական եւ թէ՛ հոգեկան վերջնական նստավայրը դեռ անհասանելի կը մնայ, պարուրուած սրտամաշ ու հոգեմաշ միանուագ երգերու, քերթուածներու, ծովէ ծով երկարող անհամար ճառերու, խունկի, քարոզի, ժողովներու եւ արարողութիւններու թմրեցուցիչ մշուշով մը, ուր ժառանգուած կարօտախտ մը արտաքսած է ներկայ իրականութիւնը՝ որ այսօր մեր դուռը կը զարնէ…

Միթէ կարելի՞ է հարց տալ, թէ ու՞ր է, ի վերջոյ, աշխարհացրիւ մեր ժողովուրդին ֆիզիքական եւ թէ հոգեկան վերջնական նստավայրը, երբ Հայաստանի Գ. Հանրապետութեան իրականութիւնը, իր մարդկային բոլո՛ր արատներով ու առաքինութիւններով, իր սուգով ու հարսանիքով եկած է միանգամընդմիշտ փարատելու մտացածին կարօտախտի մը սփիւռքատարած մշուշը։ Եկած է լայն բանալու եւ ընդունելու մեր դուռը թակող 21րդ դարու, 2015 թուի իրականութիւնը՝ դրական ու ժխտական իր բոլո՛ր երեսներով։ Մեր ծովէ ծով երազներուն այդ փոքր հողամասին ներկայ անճոռնի սահմանները, պարտադրուած եւ օրինականացուած անօրէն եւ այժմ քայքանման դուռը հասած ոճրապարտ քաղաքական դրութեան մը քմայքներով, կրնան միայն ժամանակաւոր ըլլալ։ Հզօ՛ր է իրականութեան եւ ճշմարտութեան շունջը, որ սկսած է քամիի զօրութեամբ ցնցել միջազգային մգլոտած դիւանագիտութեան խարխլած կառոյցը։

Այս իրողութիւններու լոյսին տակ, յամի Տեառն 2015-ին, հազարամեակներ կտրած, եւ այսօր, աշխարհով մէկ ցրուած հայութիւնը եւ մե՛ր կիսաւարտ ազգային ազատագրման Արդար Դատին ռահվիրան հանդիսացող հարիւրքսանըհինգամեայ Հայ Յեղափոխական Դաշնակցութիւնը պարտին միացեալ ու գիտակի՛ց տեսլականով տէր կանգնիլ իրենց պարտաւորութիւններուն, ճշգրիտ դատողութեամբ դիմագրաւելով յեղափոխականացած դարաշրջանի մը մարտահրաւէրները։

Be the first to comment

Leave a Reply

Your email address will not be published.


*