0
0
Հայաստանի նախագահ Սերժ Սարգսեանի հրաւէրով, Երեւան ժամանեց Ռուսիոյ նախագահ Տմիթրի Մետվետեւ: «Զուարթնոց» օդակայանին մէջ Ռուսիոյ նախագահին դիմաւորեց Հայաստանի նախագահ Սերժ Սարգսեան:
Դիմաւորման պաշտօնական արարողութենէն ետք Տմիթրի Մետվետեւ, Հայաստանի արտաքին գործոց նախարար Եդուարդ Նալպանտեանի ուղեկցութեամբ, այցելեց Հայոց Ցեղասպանութեան Ծիծեռնակաբերդի յուշահամալիր եւ ծաղկեպսակ մը զետեղեց Հայոց Ցեղասպանութեան զոհերու յուշարձանին, ապա եղաւ յուշահամալիրի Յիշողութեան պուրակին մէջ, որ 2008 թուականին իր պաշտօնական այցելութեան ժամանակ, եղեւնի մը ցանած էր:
Մետվետեւի հետ Հայաստան ժամանած ռուսական բարձրաստիճան պետական պատուիրակութեան մաս կը կազմէին արտաքին գործոց նախարար Սերկէյ Լավրով, պաշտպանութեան նախարար Անաթոլի Սերտիուքով, փոխադրութեան նախարար, տնտեսական համագործակցութեան հայռուսական միջկառավարական յանձնախումբի համանախագահ Իկոր Լեւիթին, Ռուսիոյ հիւսիսարեւմտեան դաշնակցային շրջանին մէջ Ռուսիոյ նախագահի լիազօր ներկայացուցիչ Իլիա Քլեպանով, Ուլիանովսքի նահանգապետ Սերկէյ Մորոզով եւ պաշտօնատար այլ անձեր: Հայաստանի նախագահ Սերժ Սարգսեանի յատուկ հրամանագիրով Ռուսիոյ արտաքին գործոց նախարար Սերկէյ Լավրով պարգեւատրուեցաւ Սուրբ Մեսրոպ Մաշտոցի շքանշանով: Նախագահի մամլոյ գրասենեակին հրապարակած հաղորդագրութեան համաձայն, Լավրով Հայաստանի բարձր պետական պարգեւին արժանացած է «հայռուսական դարաւոր բարեկամական յարաբերութիւններու ամրապնդման եւ զարգացման գործին մէջ ներդրած իր մեծ աւանդին պատճառով»:
