0
0
Երեքշաբթի, Օգոստոս 10ի առաւօտեան ժամը 10:00-ին, նախապէս առնուած ժամադրութեամբ, Գալուստ Կիւլպէնկեան Հիմնարկութեան Հոգաբարձուներու խորհուրդի անդամ Մարթին Էսայեան այցելեց Հ.Յ.Դաշնակցութեան Արխիւներու Հիմնարկի գրասենեակը, Ուաթըրթաուն (Մէսէչուսէց նահանգ, Մ. Նահանգներ), »Հայրենիք« հաստատութեան շէնքէն ներս, ուր ծանօթացաւ անձնակազմին եւ կատարուող աշխատանքներուն:
Մարթին Էսայեան ընդունուեցաւ Արխիւներու Հիմնարկի տնօրէն Վաչէ Բրուտեանի կողմէ, որ լայն բացատրութիւններ տուաւ արխիւներու պահպանման ու թուայնացման աշխատանքներուն մասին: Նախորդող տարիներու աշխատանքներուն, ինչպէս նաեւ ներկայ արհեստագիտութեան գործածութեան մասին յաւելեալ բացատրութիւններ տուին նաեւ Թաթուլ Սոնենց Փափազեան եւ Ժիրայր Պէօճէքեան: Մարթին Էսայեան իր կողմէ ուղղեց հարցումներ, որոնց տրուեցան սպառիչ պատասխաններ: Մտերմիկ մթնոլորտի մէջ կայացած այս հանդիպումին ներկայ էին նաեւ Հ.Յ.Դ. Արեւելեան Ամերիկայի Կեդրոնական Կոմիտէի անդամ Ժան Աւետիսեան, »Արմինիըն Րիվիու«ի խմբագիր Ասպետ Գոչիկեան, »Հայրենիք«ի խմբագիր Զաւէն Թորիկեան, շրջանի Հայ Դատի Յանձնախումբէն Տիգրան Խալիկեան:
Ապա, Մարթին Էսայեան այցելեց արխիւներու պահեստը, ուր տեղւոյն վրայ առիթը ունեցաւ տեսնելու կարգ մը նմոյշներ թէ՝ Հ.Յ.Դաշնակցութեան եւ թէ Հայաստանի Հանրապետութեան արխիւներէն:
Կէսօրին, Մարթին Էսայեան ճաշի հիւրը եղաւ Հ.Յ.Դ. Արխիւներու Հիմնարկին: Ապա ծանօթացման հանդիպումը շարունակուեցաւ: Այցելութեան ընթացքին, հիւրը առիթը ունեցաւ նաեւ ծանօթանալու Հ.Օ.Մ.ի Կեդրոնական վարչութեան գրասենեակի անձնակազմին, ինչպէս նաեւ »Արմինիըն Ուիքլի« եւ »Հայրենիք« շաբաթաթերթերու խմբագրական կազմերուն: Կէսօրէ ետք ժամը 3:00-ին, հիւրը հրաժեշտ տուաւ հաստատութեան:
Յիշեցնենք, որ 2009-ին, Գալուստ Կիւլպէնկեան Հիմնարկը 50,000 տոլարի, իսկ ընթացիկ տարուան ընթացքին 25,000 տոլարի յատկացում կատարեց Հ.Յ.Դ. Արխիւներու Հիմնարկին:
