0
0
Կիրակի, Սեպտեմբեր 15-ին, Ա․Մ․Ն․ Արեւելեան Թեմի բարեջան Առաջնորդ՝ Գերշ. Տ. Անուաշաւան Արքեպիսկոպոս Դանիէլեան այցելեց Ուստըր (Մասաչուսէց) եւ Սուրբ Երրորդութիւն եկեղեցւոյ 90-ամեակին առթիւ Սուրբ Պատարագ մատուցանեց։ Հայր Մերէն առաջ, Առաջնորդ Սրբազան Հայրը 12 առաքեալներու նկարները օծեց Սուրբ Միւռոնով։ Քարոզին մէջ, ան նախ բացատրեց ընդհանրական եկեղեցւոյ մէջ սրբանկարներու գործածութեան սուրբ գրային հիմքը եւ ապա՝ զուգահեռ գծեց Խաչվերացի օրուան տօնին եւ առաքեալներու նկարներու սրբագործման միջեւ։
Սուրբ Պատարագէն ետք, տեղի ունեցաւ եկեղեցւոյ 90-ամեակի տօնախմբութիւնը։ Հոգաբարձութեան ատենապետ՝ Կարօ Պեքիարեան, մեծ գոհունակութիւն յայտնեց համայնքի գործակցութեան համար։ Հոգեւոր հովիւ՝ Գերպ. Տ. Արտակ Ծ. Վրդ. Արապեան, իր կարգին գնահատեց եկեղեցւոյ բոլոր մարմիններու գործունէութիւնը։ Սրբազան Հայրը, յանուն Ազգային Վարչութեան Կրօնական եւ Քաղաքական Ժողովներուն, շնորհաւորեց գաղութի 90-ամեակը, վեր բերելով բոլոր անոնց անսակարկ ծառայութիւնը, որոնք հիմնած էին եւ աշխատած էին անոր բարգաւաճման ի խնդիր եւ քաջալերեց ներկայ բոլոր հաւատացեալները, որ հոգեւոր հովիւին շուրջ բոլորուած, շարունակեն ամբողջական նուիրուածութեամբ ծառայել ի խնդիր գաղութի զարգացման եւ հզօրացման։
Ձեռնարկին ներկայ էին նաեւ Գերպ. Տ. Հրանդ Ծ. Վրդ. Թահանեան՝ հոգեւոր հովիւ Սուրբ Ստեփանոս (Ուոթըրթաուն, Մասաչուսէց) եկեղեցւոյ, Արժպ. Տ. Միքայէլ Քհն. Տէր Խոսրովեան՝ հոգեւոր հովիւ Սուրբ Աստուածածին (Ուայթընզվիլ, Մասաչուսէց) եկեղեցւոյ, Արժպ. Տ. Թադէոս Քհն. Բարսեղեան՝ հոգեւոր հովիւ Սուրբ Փրկիչ (Ուստըր, Մասաչուսէց) եկեղեցւոյ, տիար Ռիչըրտ Քանարեան՝ Ազգային Վարչութեան փոխատենապետ, եւ Ազգային Վարչութեան ատենադպրուհի՝ Թամար Քանարեան։
