0
0
Վերջերս, հայ զինուորներու` հակառակորդի կրակոցներով սպանութենէն ետք, Ամերիկայի Հայ Դատի Յանձնախումբը կրկնապատկած է Պաքուին ամերիկեան զինուորական օգնութեան տրամադրումը կասեցնելու ջանքերը: Ամերիկահայերուն կոչ ուղղուած է նոյն պահանջով խնդիր-դիմումնագիրներ յղել Միացեալ Նահանգներու Ծերակոյտին եւ Ներկայացուցիչներու Տան` իրենց ծերակուտականներուն, քոնկրէսականներուն: “Ատրպէյճանի կողմէ Արցախի սահմանին վրայ հայ նոր զինուորի մը` Կարէն Գալստեանի սպանութիւնը կ՛ընդգծէ այն հրատապ անհրաժեշտութիւնը, որ մեր Գոնկրէսը պէտք է կասեցնէ Միացեալ Նահանգներու զինուորական օգնութիւնը, քանի տակաւին Պաքու չէ կասեցուցած յարձակումները, ամբողջովին չէ հրաժարած բռնութենէն եւ չէ ստանձնած շրջանային տագնապի խաղաղ լուծումը“ նշուած է Ամերիկայի Հայ Դատի Յանձնախումբին հաղորդագրութեան մէջ:
Ամերիկայի Հայ Դատի յանձնախումբի գործադիր վարիչ Արամ Համբարեան, բաց նամակով մը դիմած է Միացեալ Նահանգներու նահանգային խորհրդարաններու անդամներուն‘ կոչ ընելով անոնց, որ դէմ դնեն “ժողովրդավարութիւնը առեւանգելու“ նպատակով վերջերս սաստկացած Ատրպէյճանի իշխանութեանց ջանքերուն:
Համբարեան խորհրդարանականներուն կը յիշեցնէ, թէ Ատրպէյճան կը շարունակէ կառավարուիլ բռնատէր Իլհամ Ալիեւի կողմէ եւ թէ այս վերջինը սաստկացուցած է Հայաստանի դէմ սպառնալիքները եւ յարձակումները, ու անոնց զուգահեռ‘ հակաքարոզչական արշաւը:
Համբարեան կոչ կ՛ընէ երեսփոխաններուն, որ զիրենք ապակողմնորոշելու եւ նահանգային խորհրդարանները Արցախի ու Հայաստանի դէմ շահագործելու Ալիեւի փորձերուն դէմ դնեն‘ ըսելով. “Ժողովրդավարական կարգեր հաստատէ երկրիդ մէջ‘ մեր ներքին հարցերուն միջամուխ ըլլալ փորձելու փոխարէն“:
Համբարեան նաեւ, կը յիշեցնէ Ատրպէյճանի զեղծարարութիւնները եւ մարդկային իրաւանց ոտնակոխումներէն օրինակներ, ներառեալ ՆԱԹՕի մարզումի մը ընթացքին հայ զինուոր մը սպաննած ատրպէյճանցի զինուորին հերոսացումը:
