0
0
Դեկտեմբեր 2013-ի ամսուն սկիզբը, Մեծի Տանն Կիլիկիոյ Կաթողիկոսութեան տպարանէն լոյս տեսաւ Սօնա Զէյթլեանին “Հայ կնոջ կեանքի ուղիին հետքերով“ հատորը: Զէյթլեանի բառերով “Հայ կնոջ ուղիին հետքերով“ աշխատասիրութիւնը անձնական ուղեւորութիւն մըն է Հայ կնոջ պատմութեան բազմակողմանի հանգրուաններուն` հեթանոսական շրջանէն սկսեալ մինչեւ մեր օրերը:
Արդարեւ 326 էջերէ բաղկացած հատորը իր մէջ կը պարունակէ տասնէ աւելի գլուխներ, որոնց մէջ հեղինակը պատմական հանգրուանումով անդրադարձած է Հայ կնոջ ունեցած դերակատարութեան մասին Հայոց Պատմութեան բոլոր ժամանականերու ընթացքին, այսպէս` հեթանոսական շրջանին, քրիստոնէութեան սկզբնաւորութեան, Օսմանեան դարաւոր տիրապետութեան ժամանակ, 20-րդ դարու դարագլուխին (Ցեղասպանութիւն, տեղահանութիւն, աքսոր), Հայաստանի Ա. հանրապետութեան շրջանին, ազգային վերականգնումի ընթացքին, Խորհրդային Միութեան շրջանին, Հայաստանի Բ. հանրապետութեան շրջանին: Ինչպէս նաեւ անդրադարձած է Հայոց թագուհիներուն, Պոլսոյ եւ Թիֆլիսի հայուհիներու մասին: Վերջին երկու գլուխներով Տիկին Զէյթլեան անդրադարձած է “Սփիւռքի մարտահրաւէրը եւ կանանց երկրորդ շարժումի մը համակարգը“ եւ “ներկայի մարտահրաւէրներ կանանց երկրորդ շարժումի մը համակարգը“ նիւթերուն շուրջ: Հատորին վերջաւորութեան զետեղուած են քարտէսներ ու նկարներ:
Սոյն հատորը հրատարակութիւնն է “Գէորգ Մելիտինեցի Մրցանակին“, թիւ 79:
