0
0
“Խաղ“ին ծանօթ քաղաքագէտին համար, յստակ էր թէ թրքական հակաքարոզչական մեքենան, ինչ միջոցառումներու պիտի դիմէր, Ֆրանսայի խորհրդարանին կողմէ Հայոց Ցեղասպանութեան ժխտումը քրէականացնող օրինագիծի որդեգրումէն ետք:
Այս նիւթը այնքան մը մելան հոսեցնել տուաւ, որ կրկնութիւն պիտի ըլլայ մանրամասնութեամբ անդրադառնալ Անգարայի որդեգրած միջոցառումներուն մասին: Սպասելի էին ծայրայեղական մօտեցումներ, որոնց կարգին ֆրանսացի գործատէր Ռաշիտ Նէքազի կատարելիք մէկ միլիոն եուրոյի նուիրատուութիւնը, որ պիտի տրամադրուի այն պարագային երբ անձ մը Ֆրանսայի մէջ պիտի դատապարտուի Հայոց Ցեղասպանութիւնը ժխտելու քրէական յանցանքով:…Հոս նշելի է թէ այդ նոյն “նենգազգ“` Նէքազը օրին իր դրամապանակը տրամադրած էր այն կիներուն, որոնք լոյսերու քաղաքին մէջ պիտի դատապարտուէին, գլխու լաչակ կրելու յանցանքով:
Սակայն, ասոր կողքին տեղին է յիշել Անգարայի մէկ այլ սնոտին մօտեցումը, որ շարունակ Ֆրանսայի ղեկավարութեան վրայ ճնշում բանեցնելու համար, կ՛արծարծէ Ալճերիոյ մէջ ֆրանսական գաղութատիրութեան ժամանակաշրջանին, յատկապէս նախա-Տը Կոլի օրերուն, ալճերիացիներու սպանութեան հարցը: Նախապէս ալ յանձին, Թուրքիոյ վարչապետ Ռեճէպ Թայիպ Էրտողանի, նմանօրինակ զրպարտիչ հաստատումներ կատարուած էին եւ շարունակ իբրեւ հակադարձութիւն բերուած էր Պէն Պելայի Ալճերիոյ օրինակը:
Այս անգամ, Ալժէն լուռ չմնաց եւ վարչապետ Ահմէտ Ույահիան կոչ ուղղեց երբեք չաղաւաղել եւ չշահարկել Ալճերիան եւ իր պատմական յեղափոխութիւնը: Քայլ մըն ալ աւելի անդին երթալով, Ույահիա շեշտեց թէ ոեւէ անձ իրաւունք չունի ալճերիացիներու թափած արեան հաշւոյն իր սեփական գործերը յառաջ մղելու եւ յատկապէս իր թուրք պաշտօնակիցին կոչ ուղղեց որ դադրեցուի քաղաքական նպատակներով, գաղութատիրութեան հարցի շահարկումը: Նոյնիսկ Ալժէի ղեկավարութիւնը գնդակը նետեց թրքական կողմ, շեշտելով թէ այդ նոյնինքն Ալճերիոյ ազատագրման օրերուն, Թուրքիան` ՆԱԹՕ-ի անդամ էր եւ բնականաբար օժանդակած է Ֆրանսային…:
Փոխադրուելով Ալժէէն արեւելք… Կովկասեան բարձրաւանդակ, Ատրպէյճան իր կարգին, ի պատասխան Ֆրանսայի որդեգրած քաղաքականութեան կը պատրաստէ…այլ խեղաթիւրում մը կատարելու եւ այս անգամ Խոճալուի դէպքերու` շինծու 1992-ին հայերու կողմէ գործուած ցեղասպանութեան ժխտումը քրէականացնող օրէնք մը որդեգրելու:…Անհաւատալի եւ անիրաւ:
ՀԱՅՐԵՆԻՔ
Յունուար 10, 2012
