0
0
Մարտ 22-ի Ազգային Ժողովի նիստին, Հ.Յ.Դ. խմբակցութիւնը ներկայացուցած էր Հայաստանի ընտրական օրէնսգիրքին մէջ փոփոխութիւններ կատարելու նախագիծ մը: Քանի մը օր ետք, այդ միեւնոյն Ազգային Ժողովը ընդունած էր ընտրական օրէնսդրութեան փոփոխութիւններու կառավարութեան նախագիծը եւ յատուկ քուէարկութեամբ մըն ալ, մերժած, այդ ընտրական օրէնսգրքին մէջ փոփոխութիւններու Հ.Յ.Դաշնակցութեան ներկայացուցած օրինագիծը:
Այսպէս, Ազգային Ժողովը վաւերացնելէ ետք թէ պետական եւ տեղական սրահները անվճար հիմունքներով, պէտք է յատկացնել քարոզչութիւն իրականացնելու համար եւ քարոզարշաւի փուլին, արգիլելով այն բարեգործական կազմակերպութիւններու գործունէութիւնը, որոնց անուանումը կը յիշեցնէ քաղաքական կուսակցութիւնները, մերժեց խորհրդարանի հարիւր տոկոս համամասնական ընտրակարգով ձեւաւորումը, այսինքն պատգամաւորներու ընտրութիւնը կատարել առանձնաբար, հարիւր տոկոսով համամասնական հիմունքներով‘ կուսակցութեանց ցուցակներով:
Ազգային Ժողովին համար նաեւ անընդունելի էր ընտրական յանձնաժողովներու մէջ իշխանութեան եւ ընդդիմութեան ներկայացուցիչներու կէս առ կէս (այսինքն յիսուն տոկոսով ընդդիմութեան եւ յիսուն տոկոսով իշխանութեան ներկայացուցիչներէն) կազմութիւնը:
Դեռ աւելին, Հ.Յ.Դաշնակցութիւնը առաջարկած էր հրապարակել քուէամատեանները, նկարահանել քուէարկութեան եւ ձայներու հաշուարկի գործընթացները, սակայն հոս ալ արդարութեան….ձայնը ‘’բարբառոյ յանապատի’’ իրավիճակին մէջ գտնուեցաւ:
Հ.Յ.Դաշնակցութիւնը նաեւ առաջարկած էր փաստաթուղթով գնել ելեկտրոնային քուէատուփեր, որոնք ցոյց պիտի տան, թէ որքան թերթիկ (այսինքն քուէ) կայ տուփին մէջ: Այսպէս պարզումէկին, թափանցիկ կերպով կեղծիքէ եւ զեղծարարութենէ հեռու, ժամանակակից եւրոպական միտումներով եւ մակարդակով կրնար պատահիլ ընտրարշաւը, սակայն ըստ երեւոյթին, ընտրացուցակներու հրապարակումը կրնայ դուռ բանալ լուրջ խախտումներու եւ այսպէս կրնայ յայտնաբերուիլ արդէն իսկ անդէնական մեկնածներու երկար անուանացանկ մը:
Վերջապէս Հ.Յ.Դաշնակցութիւնը առաջարկած էր ընտրացուցակներուն մէջ կանանց շօշափելի տոկոսի մասնակցութիւն: Նիւթ մը, որուն մասին անդրադառնալն անգամ դուռ կը բանայ լուրջ մտահոգութիւններու: Արդեօք, թօթափած չե՞նք նախապաշարման շղթաներն ու փափուկ սեռի հանդէպ ստորադասութեան սին եւ սնոտին բարդոյթները:
‘’Հայրենիք’’
Մարտ 28, 2011
