1
0
«Համազգային» Միացեալ Նահանգներու Արեւելեան շրջանային վարչութիւնը ձեռնարկած է «Գիտակ» ծրագիրին։
«Գիտակ»-ին նպատակն է դպրոցական կեանքի ընթացքին եւ մեր բնաշխարհին մէջ գոյութիւն ունեցող բներեւոյթները ներկայացնել հակիրճ արեւմտահայերէնով։
Իւրաքանչիւր տարիքային խմբաւորումի համար 20 տեսերիզներով, կը հանդիպինք պատմական հերոսներու, մարզաշխարհի, բնութեան մէջ հանդիպած անակնկալներու, ցամաքամասերու, ովկիանոսներու, անասուններու եւայլն։
Երեխաներուն արդէն ծանօթ յղացքները արեւմտահայերէնով ներկայացնելով, կը միտինք հայերէնը դարձնել կայուն մաս անոնց կեանքէն ներս։ Մանաւանդ արեւմտեան երկիրներու մէջ բնակող հայ ընկերութիւններուն մէջ Հայերէնի գործածութիւնը դարձած է սահմանափակ։ Օգտագործուած բառամթերքը խորքային զրոյցներու առիթ չտար. Իսկ այդ զրոյցներուն համար ինքնաբերաբար լեզուն կը փոխուի ապրած երկրի տիրող լեզուին, մեր պարագային, անգլերէնի։
Այս տեսերիզներով, դպրոցականները պիտի ծանօթանան լայն բառամթերքի, հայերէնով, ինչ որ պիտի սատարէ անոնց լեզուական հմտութեան։ Տեսերիզները կարելի է օգտագործել դասարաններու մէջ, ուսումնական ծրագիրներու առընթեր առ ի ամբողջացում կամ զարգացում։ Կարելի է նաեւ դիտել տանը, իբրեւ ժամանց։
Այս տեսերիզներու փունջին պիտի հանդիպինք նաեւ Ո՞Վ Է ԳԻՏԱԿԸ խաղի ընթացքին։ Ո՞Վ Է ԳԻՏԱԿԸ խաղով մասնակիցները ընկերային եւ հաճելի մթնոլորտի մէջ պիտի դիտեն տեսերիզները իրենց խումբերով ու հարցումներուն պատասխանեն։ Խաղի մթնոլորտով մասնակիցները պիտի լսեն հայերէն, նոր բառամթերք ու գիտելիքներ ամբարեն եւ ծանօթանան նոր ընկերներու՝ տարբեր շրջաններու մէջ։
Այս տարի, տեսերիզները 10էն 12 տարեկաններու համար են։ Յաջորդին կը պատրաստուին նաեւ 7-9,13 -15, եւ 16-19 տարիքներու համար։։
Հետեւեցէք մեր կայքէջին եւ ընկերային ցանցերու ալիքներուն յաւելեալ տեղեկութիւն ստանալու համար խաղին մասին։
Շնորհակալութիւն կը յայտնենք Նայիրի Մկրտիչեանին, որ բծախնդրութեամբ պատրաստեց տեսերիզները։
Տեսերիզնեը կարելի է գտնել՝ Համազգայինի YouTube ի ալիքին վրայ եւ Համազգայինի Արեւելեան ԱՄՆ կայքէջին վրայ, ինչպէս նաեւ Հայկաշխարհ – Armlands YouTube ի ալիքին վրայ։
