0
0
Հ․Յ․Դ․ Հայաստանի երիտասարդական միութեան այս տարուան բանակումը սկսաւ Օգոստոս 19-ին, Բիւրականի Գառնիկ Մկրտիչեանի անուան բանակավայրին մէջ, նշանաբան ունենալով` «Վերադարձ արմատներուն»-ը: Բանակումին մասնակցեցան մօտաւորապէս 350 երիտասարդներ` Հայաստանի զանազան մարզերէ, Երեւանէն, ինչպէս նաեւ` Արցախէն:
Բանակումին օրակարգը ընդգրկեց աշխուժ վարժութիւններ, արշաւներ, ֆիզիքական պատրաստութեան աշխատանքներ եւ զանազան նիւթերով դասախօսութիւններ:
Բանակումի առաջին բանախօսն էր պատմաբան, Հ․Յ․Դ․ Հ․Ե․Մ․-ի Կեդրոնական վարչութեան երկարամեայ անդամ Արթուր Ղազարեան, որ բանակողներուն խօսեցաւ ազգային գաղափարախօսութեան եւ Հայոց պատմութեան մէջ Հ․Յ․Դ․-ի ունեցած դերակատարութեան մասին:
Հ․Յ․Դ․ Գերագոյն մարմինի ներկայացուցիչ Իշխան Սաղաթէլեանի հետ երիտասարդները քննարկեցին Հայաստանի մէջ եւ Հայաստանի շուրջ տեղի ունեցող քաղաքական իրադարձութիւնները, ներկայ մարտահրաւէրները եւ անոնց վերաբերեալ Դաշնակցութեան դիրքորոշումը:
Հ․Յ․Դ․ Հ․Ե․Մ․-ի Կեդրոնական վարչութեան երկարամեայ անդամ Արշակ Մեսրոպեան բանակումի մասնակցողներուն ներկայացուց «Նեմեսիս» գործողութիւնը եւ գործողութեան պատասխանատուներուն դերակատարութիւնը:
Յաջորդ դասախօսն էր Ժիրայր Պէօճեքեանը, որ բանակումի մասնակիցներուն խօսեցաւ ապագայի պատերազմի, արհեստագիտութիւններու նոր անվտանգային սպառնալիքներու մասին:
Զինեալ պայքարի եւ յեղափոխականութեան մասին խարոյկի շուրջ զրուցեցին Համբիկ Սասունեանը եւ Մուրատ Թոփալեանը:
Բանակումին հինգերորդ օրը` օգոստոս 25-ին, արցախեան ազատամարտի, անոր կազմակերպման եւ յաղթանակի մասին պատմեց Հ․Յ․Դ․ Բիւրոյի երկարամեայ ներկայացուցիչ, «Կամաւորական շարժում» կազմակերպութեան նախագահ Հրանդ Մարգարեանը:
Բանակումին մասնակիցները հանդիպեցան նաեւ Հ․Յ․Դ․ Բիւրոյի աշխատակազմի ղեկավար, իրանագէտ Սարգիս Մկրտչեանի հետ: Ան պատմեց դաշնակցական երիտասարդին կատարելիքներուն մասին:
Բանակողները հանդիպեցան եւ տեսերիզ դիտելու ժամ ունեցան «Կամաւորական շարժում» կազմակերպութեան խորհուրդի անդամ Արտաշէս Մխիթարեանին հետ:
Երեկոյեան կայացաւ բանակումի բաց դռներու միջոցառում, որուն ծիրին մէջ երիտասարդները ցուցադրեցին բանակումի ընթացքին իրենց իւրացուցած հմտութիւնները: Միջոցառման ներկայ գտնուեցան Ազգային ժողովի «Հայաստան» խմբակցութեան պատգամաւորները: Խարուկահանդէսը իր աւարտին հասաւ երաժիշտ, երգիչ Աբօ Սահակեանի ազգային երգերու մեկնաբանութեամբ:
Օգոստոս 26-ին, աւարտեցաւ Հ.Յ.Դ. Հայաստանի երիտասարդական միութեան «Վերադարձ արմատներուն» խորագիրը կրող բանակումը: Շաբթուան մը ընթացքին աւելի քան 300 երիտասարդներ հմտացան ազգային գիտելիքներով, մարզուեցան եւ զօրացուցին իրենց կամքը: Բոլորն ալ միակամ էին, որ հայ երիտասարդը ընելիք ունի եւ ամէն օր պիտի պատրաստուի պայքարի` յանուն Հայաստանի եւ Արցախի:
