![](https://hairenikweekly.b-cdn.net/wp-content/uploads/2024/07/uk2-1.jpg)
Յունիս 8-ին, Միացեալ Թագաւորութեան մէջ Հայաստանի դեսպանութեան եւ Կալէսի Հայ համայնքային կեդրոնի հովանաւորութեամբ Քլինկըն երգչախումբը եւ մշակութային միութիւնը ներկայացուցին համերգ-ցուցահանդէս՝ նուիրուած հայ անուանի երաժիշտ Կոմիտաս վարդապետի ծննդեան 155-ամեակին։
Օրուան ոգեկոչումները սկսան Խաղաղութեան տաճարին մէջ գտնուող Հայոց ցեղասպանութեան զոհերու յիշատակին նուիրուած խաչքար-յուշարձան հանդիսաւոր այցով։ Անոր յաջորդեց այցելութիւնը Կալէսի մայրաքաղաք Քարտիֆի հայկական համայնքային կեդրոն, ուր ներկաները կարելիութիւնն ունեցան այցելելու Կոմիտասի գրած նամակներու եւ ուշ օսմանեան դարաշրջանի հայկական գեղարուեստական զարդերու ցուցահանդէսը:
Օրուան գլխաւոր իրադարձութիւնը սակայն Սուրբ Գերման եկեղեցւոյ մէջ կայացած համերգն էր։
Միջոցառման ընթացքին ելոյթ ունեցաւ դեսպան Վարուժան Ներսէսեան՝ ընդգծելով կալէսահայ համայնքի կենսունակութիւնը։ Այնուհետեւ, դեսպանը յարգանքի տուրք մատուցեց Կոմիտաս վարդապետին, զայն գնահատելով հայկական մշակութային ժառանգութեան յենասիւնը։ Ան նաեւ նշեց Կալէսի եւ Հայաստանի միջեւ կապը՝ ընդգծելով կալէսահայ համայնքին կարեւորութիւնը, որ կամուրջ մը կը հանդիսանայ երկու ժողովուրդներու ընդհանուր արժէքներուն համար՝ մշակութային փոխանակման միջոցով:
Քարտիֆի այս յատուկ համերգը կը յաջորդէր այս տարուան Մայիս 18-ին Լոնտոնի մէջ կայացած նման յաջող ելոյթին: