0
0
Հայաստանի նախագահ Սերժ Սարգսեան, մշակոյթի նախարար Յասմիկ Պօղոսեան, մեծաթիւ արուեստագէտներ եւ արուեստասէրներ Յունուար 29-ին վերջին հրաժեշտ տուին Հայաստանի արուեստի վաստակաւոր գործիչ, “Մովսէս Խորենացի“ մետալակիր, անուանի գեղարուեստական ղեկավար Արամ Ղարաբեկեանին: “Արամ Խաչատրեան“ համերգասրահին մէջ տեղի ունեցած յուղարկաւորութեան արարողութեան մասնակցեցան բազմաթիւ քաղաքական, հասարակական գործիչներ, մտաւորականներ, արուեստագէտներ եւ Արամ Ղարաբեկեանին արուեստը գնահատող մարդիկ` իրենց յարգանքի տուրքը մատուցելով տարիներ շարունակ հայրենիքի մէջ բեղուն գործունէութիւն ծաւալած խմբավարին: Արամ Ղարաբեկեանին թաղումը տեղի ունեցաւ Երեւանի քաղաքային պանթէոնին մէջ: Վաստակաւոր խմբավարը յանկարծամահ եղած էր Յունուար 11-ին, Միացեալ Նահանգներու մէջ, ուրկէ անոր մարմինը փոխադրուած է Երեւան:
Հրաժեշտի արարողութեան ընթացքին արտասանուած խօսքերուն մէջ անդրադարձ կատարուեցան Ղարաբեկեան արուեստագէտի անսահման տաղանդին եւ մարդկային յատկանիշներուն: Երաժշտահան Տիգրան Մանսուրեան թէեւ չկրցաւ ներկայ գտնուիլ հրաժեշտի արարողութեան, որովհետեւ Միացեալ Նահանգներ կը գտնուէր, այնուամենայնիւ, ցաւակցական նամակ յղած էր Ղարաբեկեանի ընտանիքի անդամներուն եւ ամբողջ հայ ժողովուրդին: “Այսօր դէպի յաւերժութիւն կ՛ուղեւորուի պայծառ հայորդի, որ հայ երաժշտական մշակոյթի անդաստանին մէջ իր փայլուն գործունէութիւնը ծաւալեց անմնացորդ եւ հաւատարիմ ձեւով: Ան եղաւ իր ծրագիրներուն, իր առջեւ դրուած պահանջներուն խոնարհ ենթական, բազմաթիւ ուրախութեան պահեր նուիրեց թէ՛ հայ եւ թէ՛ օտար երաժշտասէր հանրութեան‘ ներկայացնելով հայ երաժշտական արուեստը տարբեր կեդրոններու մէջ: Բոլորիս համար մեծ կորուստ է Ղարաբեկեանի մահը“, վկայած էր Մանսուրեան:
“Կը յիշեմ, թէ ինչպէս մտաւ մեր երաժշտական կեանքին մէջ: Այնուհետեւ, յետպատերազմեան տարիներուն վաղուան օրը նոր շօշափող ժողովուրդը մտաւ Արամ Ղարաբեկեանի աշխարհը: Ան հրաւիրուեցաւ այստեղ` իբրեւ սենեկային նուագախումբի խմբավար եւ իրեն հետ բերաւ իր աշխարհը, իր մշակոյթը, մօտեցումները, արժէքները, երազները, որոնք կը փորձէր իրականացնել: Ես անոր հետ ծանօթ ըլլալու պատիւը եւ հաճոյքը ունեցած եմ այն տարիներէն, երբ ան եկաւ Հայաստան: Ան մարդոց համար իւրաքանչիւր պահը տօնի կը վերածէր, նաեւ կը դաստիարակէր, կը կրթէր: Այսօր պէտք է պարզապէս ըսենք` փառք Աստուծոյ, որ այսպիսի անհատներ կը ծնին: Արամը կրցաւ իր կեանքին ընթացքին շատ բան ընել: Միւս կողմէ` ափսոս բոլոր չըրածներուն համար“, լրագրողներուն հետ ունեցած զրոյցին ընթացքին յայտնեց Հայաստանի մշակոյթի նախարար Յասմիկ Պօղոսեան:
