0
0
ՊՈԼԻՍ.- Թուրք պատմագիտական ընկերութիւնը Կրթական բարձրագոյն ընկերութեան միջոցով փորձած է Թուրքիոյ համալսարաններէն ճշդել հայկական հարցին վրայ աշխատող ուսանողներու անունները, անոնց աշխատութիւններուն վերնագիրներն ու անոնց հետ կապուելու կարելիութիւնները:
Թուրք պատմական ընկերութեան ղեկավար փրոֆ. Մեհմետ Մեթի Հուլակուի ստորագրութիւնը կրող փաստաթուղթին մէջ պահանջ կը ներկայացուի տրամադրելու Հայոց Ցեղասպանութեան մասին բոլոր աշխատութիւններու հեղինակներուն տուեալները, որոնք յստակ չէ, թէ ինչ նպատակով պիտի օգտագործուին:
Ընկերութենէն պաշտօնատար մը` պատասխանելով “Ակօս“-ի այն հարցումին, թէ կրթաթոշակ տրամադրելու ընթացքին ի՛նչ գործօններ հաշուի կ՛առնուին, օրինակ` 1915-ը Ցեղասպանութիւն որակող ուսանողներուն կրթաթոշակ պիտի տրամադրուի՞, թէ՞ ոչ, յայտնած է. “Մենք` իբրեւ կառոյց, Հայոց Ցեղասպանութիւնը պաշտօնապէս չենք ճանչցած, ատոր համար ալ հաւանական է, որ կրթաթոշակ չտրամադրուի: Անոնք կրնան դիմել, սակայն հաւանական է, որ դրական պատասխան չստանան“:
