0
0
Փութինի այցելութեան եւ Մաքսային միութեան Հայաստանի անդամակցութեան դէմ բողոքի ցոյցեր տեղի ունեցան Երեւանի մէջ:
Ոստիկանները, պատնէշ կազմած, Հիւսիսային պողոտային մէջ փորձեցին կասեցնել ցուցարարներու երթը Ազատութեան հրապարակէն դէպի կառավարութեան շէնք: Տեղի ունեցաւ քաշքշուկ: »Ժառանգութիւն« կուսակցութեան փոխնախագահ Արմէն Մարտիրոսեանի հետ բանակցութիւններէն ետք ոստիկանները համաձայնեցան բանալ ճամբան, որմէ ետք կառավարութեան շէնքին շուրջ նոյնպէս պատնէշ կազմեցին:
Ցուցարարները “Ազատ, անկախ Հայաստան“, “Սերժիկ, հեռացի՛ր“ եւ այլ կոչերով, պաստառներով քալեցին դէպի կառավարութեան շէնք, ուրկէ կը ծրագրէին երթալ դէպի նախագահի նստավայր:
»Ազատութիւն« հրապարակին վրայ ոստիկանները յայտարարեցին, որ ցոյցը ապօրինի է, որովհետեւ իրազեկուած չէ համապատասխան մարմինը` քաղաքապետարանը, հետեւաբար` ապօրինի գործողութիւնները իրենք պէտք է կանխեն:
Ոստիկաններու գործողութիւնները անձամբ կը վերահսկէր Երեւանի ոստիկանապետ Աշոտ Կարապետեան: Ցուցարարները պնդեցին, որ իրենց ցոյցը ինքնաբուխ է, ինչ որ օրէնքով կը թոյլատրուի եւ անոր համար իրազեկում չի նախատեսուիր:
Ոստիկանները Ամիրեան փողոցին մէջ կասեցուցին բողոքի ցոյցի մասնակիցներու երթը կառավարութեան շէնքէն դէպի նախագահի նստավայր:
Իրաւապահները ցուցարարներու ճամբուն վրայ կազմեցին պատնէշ: Ցուցարարները ուղղուեցան դէպի Նալպանտեան փողոց:
Այստեղ եւս անոնց երթը կասեցուեցաւ ոստիկաններու կողմէ, եւ իրաւապահները պատնէշներ կազմեցին երկու կողմերէն:
Ոստիկանութեան լաւատեղեակ աղբիւրներու համաձայն, այս ցոյցերուն առթիւ, ձերբակալուած էին 110 ցուցարարներ:
