0
0
Կիրակի Հոկտեմբեր 2, 2011-ին, Նիւ Եորքի “Սէնթ Ճէյմս“ Կաթողիկէ Պատրիարքարանի մէջ տեղի ունեցաւ Միացեալ Նահանգներու եւ Գանատայի Հայ Կաթողիկէ համայնքի նոր Առաջնորդի պաշտօնի ստանձնման արարողութիւնը:
Նշենք թէ, նախապէս յատուկ հաղորդագրութեամբ մը կը տեղեկացուէր թէ նախկին Արժանապատիւ Առաջնորդ Տ. Մանուէլ Պաթաքեան, յառաջացած տարիքի բերումով, որոշած էր հեռանալ իր պաշտօնէն եւ փոխարէն նոր առաջնորդ նշանակուած էր, Արհիապատիւ Միքայէլ Եպս. Մուրատեան:
Զանազան շրջաններէ ժամանած էին մօտ 200 անձեր, ներկայ գտնուելու համար սոյն արարողութեանց:
Պատարագը սկսաւ թափօրով, որուն կը մասնակցէին հին եւ նոր Առաջնորդները նաեւ սոյն արարողութեանց մասնաւոր ժամանած Հայաստանի եւ Վրաստանի Առաջնորդ Արհիապատիւ Ռաֆայէլ Եպս. Մինասեան, Լիբանանէն Արժանապատիւ Յովհաննէս Եպս. Թէյրուզեան:
Նախքան հաւատամքի երգեցողութիւնը, Հայր Ռաֆայէլ Անտոնեան հրաւիրեց Կաթողիկէ տիեզերական հայրապետ Պենետիքոս 16-ի ներկայացուցիչ Հայր Անժելօ Քանրինօն, որ կարդայ հայրապետին նամակը, որուն մէջ ան Արժ. Միքայէլ Եպս. Մուրատեան կը նշանակէր Հայ Կաթողիկէ համայնքի Միացեալ Նահանգներու եւ Գանատայի առաջնորդ:
Կարդացուեցաւ նաեւ Պոսթընի Կարտինալ Շան Օմալիի շնորհաւորագիրը:
Ապա Տ. Մանուէլ Պաթաքեան, նոր առաջնորդին փոխանցեց գաւազանը, որ մեծ ծափահարութեամբ դիմաւորուեցաւ ներկաներու կողմէն:
Սոյն արարողութեան ներկայ էին Ամենայն Հայոց եւ Մեծի Տանն Կիլիկիոյ եկեղեցիները: Ներկայ էին նաեւ այլ եկեղեցիներու ներկայացուցիչները:
Արարողութենէն ետք տեղի ունեցաւ հիւրասիրութիւն, որուն յաջորդեց, այս առթիւ կազմակերպուած ընթրիք մը:
Նիւ Եորքի եւ Նիւ Ճըրզիի “Ա. Գարօ“ եւ “Դրօ“ կոմիտէութիւններու ներկայացուցիչներու կողքին, նաեւ ներկայ էր Հ.Յ.Դ. Արեւելեան Ա.Մ.Ն.-ի ներկայացուցիչ Հրայր Պարոնեան:
Նշենք թէ Արհիապատիւ Միքայէլ Եպս. Մուրատեան ծնած է Պէյրութ` Յուլիս 5, 1961ին: Ան զաւակն է Սարգիս եւ Թերէզ Մուրատեանի: Նախնական ուսումը ստացած է Զահլէի Անարատ Յղութեան Հայ Քոյրերու դպրոցը: 1973ին աշակերտած է Զմմառու Պատրիարքական Միաբանութեան կղերանոցին, հոն ստանալով միջնակարգ ու երկրորդական կրթութիւնը: 1981-1986 տարիներուն ուղարկուած է Հռոմ` Լեւոնեան Քահանայապետական Հայ Վարժարան, եւ ստացած է փիլիսոփայութեան եւ Աստուածաբանութեան վկայականները` յաճախելով Տոմինիկեան Հայրերու “Angelicum“ Քահանայապետական համալսարանը: 1986-1987ին, Ֆրանսայի Լիոն քաղաքի կաթողիկէ հիմնարկին մէջ հետեւած է երիտասարդներու հովուականի մասնագիտական դասընթացքներուն:
Ան քահանայական ձեռնադրութիւնը ստացած է Փարիզի մէջ, Հոկտեմբեր 24, 1987ին, ձեռամբ Արհ. Գրիգոր Եպս. Ղապրոյեանի, որպէս անդամ Զմմառեան Կաթողիկոսական Միաբանութեան:
Հայր Միքայէլ Մուրատեան ստանձնած է զանազան պաշտօններ, որոնց կարգին` 1987-1988 Փոխ տեսուչ Զմմառու ընծայարանին, 1988-1989` Փոխ տեսուչ Հալէպի Դպրեվանքին, 1989-1990 ժողովրդապետ Դամասկոսի Թագուհի Տիեզերաց եկեղեցւոյ, 1991ին Փոխ ժողովրդապետ Սուրբ Խաչ Եկեղեցւոյ, Զալքա, Լիբանան, 1992-2001 եղած է ժողովրդապետ Հայաստանի Շիրակ եւ Լոռի մարզերու զանազան գիւղերուն մէջ: 1995-2001 թուականներուն, ան ընդհանուր քարտուղարի եւ գործադիր տնօրէնի պաշտօն ստանձնած է Հայաստանի Քարիթաս Բարեսիրական Կազմակերպութեան: Հոկտեմբեր 2000-ին, ան ստացած է պատուակալ փրոֆեսորի կոչումը Հայաստանի Հանրապետութեան Կրթութեան եւ Գիտութեան նախարարութեան Մ. Նալպանտեան անուան պետական մանկավարժական համալսարանէն:
Լիբանան վերադարձին, 2001-2004, ան հոգեւոր Հայրն էր Զմմառու ընծայարանին եւ հոգեւոր վարիչ պատրիարքական թեմի երիտասարդաց յանձնախումբին: Նոյն տարիներուն եղած է նաեւ Հայ Կաթողիկէ Պատրիարաքարանի “Աւետիք“ պաշտօնաթերթի խմբագրական կազմի անդամ:
2005-2007 Գերյ. Միքայէլ Ծ. Վ. Մուրատեան եղած է Մեծաւոր Հռոմի Լեւոնեան քահանայապետական վարժարանին, ինչպէս նաեւ Հայ Կաթողիկէ Պատրիարքութեան գործակալ` Սուրբ Աթոռին մօտ, Վատիկան:
2007ի Սեպտեմբերին Գերյ. Միքայէլ Մուրատեան ընտրուած էր Պատրիարքական Փոխանորդ Զմմառեան, Կաթողիկոսական Միաբանութեան եւ Մեծաւոր Զմմառու Մայրավանքին, մինչեւ իր ընտրութիւնը իբր Առաջնորդ Հիւսիսային Ամերիկայի Կաթողիկէ Հայոց, Մայիս 20, 2011-ին:
Թղթակից
