0
0
Հայաստանի մայրաքաղաք Երեւանի մէջ անցեալ շաբաթավերջին արձանագրուեցան համաժողովրդային ընդվզման շարժումներ եւ հաւաքներ, որոնց մասնակիցներուն նկատմամբ ոստիկանութիւնը բիրտ ուժ գործադրեց եւ մարդու իրաւունքներու ոտնակոխման բազմաթիւ դէպքեր եւ պարագաներ արձանագրուեցան։Շարժման ղեկավարութեան կոչին ընդառաջելով՝ Կիրակի, 9 յունիսին տասնեակ հազարաւոր հայորդիներ փողոց իջան եւ ապազգային իշխանութիւններուն հրաժարումը պահանջեցին։Ինչպէս կ՛ակնկալուէր, իշխանութիւնները դարձեալ թաքնուեցան ոստիկան զօրքերուն ետին, որ հակաժողովրդավարական ամէն միջոցի դիմեց՝ ժողովուրդին արդար բողոքի ձայնը լռութեան մատնելու համար։Համաժողովրդական շարժումը կը շարունակուի՝ մինչեւ պահանջներու իրականացումը։Իշխանութիւնները այս իրականութիւնը տեսնելով՝ գործի լծած են ոստիկան զօրքերը։ Ժողովուրդը բողոքի իր հաւաքները կը շարունակէ։Արդարութիւնը ի վերջոյ պիտի յաղթանակէ։
*
Միացեալ Նահանգներու նախագահ Ճօ Պայտընի համաձայն,Հայաստանի եւ Ատրպէյճանի միջեւ խաղաղութեան համաձայնագրի կնքումը վերջ կրնայ տալ երկարամեայ տագնապին եւ համաշխարհային մակարդակով կրնայ փոփոխութեան ենթարկել Ատրպէյճանի եւ Հարաւային Կովկասի դերակատարութիւնը։Պայտըն այս յայտարարութիւնը կատարեց Պաքուի մէջ կայացած՝ Միջազգային Ուժանիւթի ցուցահանդէսին մասնակիցներուն յղած իր խօսքին մէջ։
Տեղին է նշել,որ Հայաստանի եւ Ատրպէյճանի միջեւ աւելի քան երկու տարիէ ի վեր բանակցութիւններու առարկայ խաղաղութեան պայմանագրի սեւագիրը իններորդ վերախմբագրումը ունեցաւ։Երեւանի իշխանութիւնները հաստատեցին, որ ստացած են Պաքուի իշխանութիւններուն հերթական առաջարկները։Պաքու յոյս ունի,որ խաղաղութեան համաձայնագիրը նոյեմբերին կը ստորագրուի։Մինչ այդ Ատրպէյճանի արտաքին գործոց նախարար Ճէյհուն Պայրամով նշեց,որ ստացած են Հայաստանի պատասխանը, որուն մէջ, ըստ Պայրամովի, դրական տեղաշարժ գոյութիւն ունի։
Իր կարգին, Հայաստանի արտաքին գործոց նախարարութիւնը աւելի ուշ հաղորդեց, որ հայկական կողմը պատրաստ է շինիչ եւ աշխուժ աշխատանքի, որպէսզի յառաջիկայ մէկ ամսուան ընթացքի կարելի ըլլայ Ատրպէյճանի հետ խաղաղութեան պայմանագիրը ամբողջացնել եւ ստորագրել, աւելցնելով,որ Հայաստանի եւ Ատրպէյճանի միջեւ խաղաղութեան համաձայնագիրը բաւական հասունցած է ստորգրման համար։
*
Ռուսիոյ արտաքին գործոց փոխ նախարար Միխայիլ Կալուզին հաստատեց ,որ Հայաստանի մէջ Ռուսիոյ դեսպան Սերկէյ Գոփիրքին մօտ օրէն Երեւան պիտի վերադառնայ՝ Մոսկուայի մէջ խորհրդակցութիւններու աւարտէն ետք։Ան 24 մայիսին Մոսկուա կանչուած էր՝ խորհրդակցութիւններու համար։Քաղաքական շրջանակներ եւ փորձագէտներ ռուս դեսպանին Մոսկուա կանչուիլը համարեցին Երեւան- Մոսկուա վատթարացած յարաբերութիւններու ցուցանիշ մը։Սակայն Կալուզին շեշտեց,որ արտաքին դիւանագիտութեան մէջ շատ բնական երեւոյթ է դեսպանի մը տուն կանչուիլը՝ խորհրդակցութիւններու նպատակով։Ան հիմնովին սխալ եւ անհիմն որակեց այն ենթադրութիւնները, թէ դեսպանին տուն կանչուիլը ցուցանիշ մըն է, որ Երեւան- Մոսկուա դիւանագիտական յարաբերութիւններու խզման կրնայ առաջնորդել։
*
Միացեալ Նահանգներու Սպիտակ Տան ապահովոււթեան հարցերով խորհրդական Ճէյք Սալիվըն հեռաձայնային հաղորդակցութիւն մը ունեցաւ Թուրքիոյ նախագահի արտաքին քաղաքականութեան եւ ապահովութեան հարցերով խորհրդական Աքիֆ Չաղաթայ Քըլըճի հետ։Քննարկումները կեդրոնական հարաւային կովկասեան վերջին զարգացումներուն վրայ։Հաղորդակցութեան ընթացքին Սալիվըն եւ Քըլըճ ընդգծեցին Հայաստանի եւ Ատրպէյճանի միջեւ խաղաղութեան համաձայնագրի ստորագրման կարեւորութիւնը։
*
Հայաստանի արտաքին գործոց նախարար Արարատ Միրզոյեան Ազգային Ժողովին մէջ յայտարարեց, որ Հայաստանի եւ Ատրպէյճանի դիմաց բարձրացած է որոշ դիրքորոշումներ, որոնց համաձայն, իւրաքանչիւրը միւսին սահմանադրութեան մէջ էական խնդիրներ եւ խոչընդոտներ կը տեսնէ՝ երկարատեւ խաղաղութեան հաստատման համար։Ան ընդգծեց, որ Հայաստան- Ատրպէյճան բանակցութիւններուն օրակարգին վրայ չեն գտնուիր սահմանադրական փոփոխութիւններ կատարելու ընտրանքը։Ըստ Միրզոյեանի, Հայաստան իրաւունք ունի, որ թէ իր, թէ Ատրպէյճանի սահմանադրութիւնը չի կրնար խնդիրներ ստեղծել իրաւական առումով, երկարատեւ խաղաղութեան հաստատման դէմ։«Հայաստանի սահմանադրութեան փոփոխութեան ծրագիրը Հայաստանի ներքին գործն է», յայտարարեց ան։
*
Հայաստան 148 քուէներով ընտրուեցաւ ՄԱԿի տնտեսական եւ ընկերային խորհուրդի անդամ՝ 2025էն 2027, երկու տարուան համար։
Արտաքին գործոց նախարարութիւնը հրապարակուած հաղորդագրութեան մը մէջ շնորհակալութիւն յայտնեց ի նպաստ Հայաստանի քուէարկած պետութիւններուն եւ հաստատեց, որ Հայաստան յանձնառու պիտի մնայ՝ նպաստելու միջազգային համագործակցութեան, կայուն զարգացման եւ 2030ի օրակարգի իրականացման համար։
ՄԱԿի Տնտեսական եւ Ընկերային խորհուրդը կը զբաղի տնտեսական, ընկերային եւ բնապահպանման հարցերով, ինչպէս նաեւ՝ միջազգայնօրէն համաձայնեցուած զարգացման նպատակներու իրագործմամբ։Խորհուրդը ունի 45 անդամ՝ ընդհանուր ժողովին կողմէ ընտրուած երեք տարուան ժամկէտով։
«Հայաստան արտաքին գործոց եւ պաշտպանութեան նախարարութիւններու մակարդակով կը խուսափի Ռուսիոյ հետ շփումներէ»,յայտարարեց Ռուսիոյ արտաքին գործոց փոխ նախարար Միխայիլ Կալուզին։
Ընդգծելով,որ նոյեմբեր 2023էն ի վեր Հայաստանի եւ Ռուսիոյ արտաքին գործոց նախարարներու հանդիպումներ չեն կատարուած,Կալուզին նշեց, որ «գործընկերները շահագրգռուած չէին» արտաքին գործոց նախարարութիւններու միջեւ խորհրդակցութիւններու ծրագիրներ մշակելու եւ ստորագրելու Մոսկուայի առաջարկով։
Ինչ կը վերաբերի պաշտպանութեան նախարարութիւններուն միջեւ հաղորդակցութիւններու նուազեցման, ապա ռուս պաշտօնատարը նշեց, որ ատիկա արդիւնք է արեւմտեան ակնյայտ ճնշումներու, որոնք կը բանեցուին Հայաստանի վրայ։
Ըստ ատրպէյճանագէտ Տաթեւիկ Հայրապետեանի, Ատրպէյճան եւ Թուրքիա ի վերջոյ Հայաստանի Սիւնիքի մարզէն արտատարածքային միջանցք խլելու աշխատանքին պիտի լծուին։Ան իր այս ենթադրութիւնը կատարեց՝ հիմնուելով Ատրպէյճանի նախագահին վերջին յայտարարութիւններուն վրայ, ուր ան կը շեշտէր, որ թրքական աշխարհի հզօրացումը եւ միաւորումը, թրքական աշխարհն ու թրքական պետութիւններու կազմակերպութիւնը պիտի վերածէ համաշխարհային մակարդակով մեծ ուժի մը։Անիկա մեծ աշխարհագրութիւն կ՛ընդգրկէ։Ալիեւ նաեւ ըսած էր, որ եթէ նայիք քարտէսին, ապա կը տեսնէք, որ թրքական աշխարհը անսահման է։
