0
0
ԵՐԵՒԱՆ.- Հինգշաբթի, Սեպտեմբե 30-ին Հ.Յ.Դ. «Արամ Մանուկեան» երիտասարդական կեդրոնին մէջ տեղի ունեցաւ Հայաստանի Ա. Հանրապետութեան հիմնադիր Արամ Մանուկեանի յուշակոթող-կիսանդրիին բացումը: Քաղաքական գործիչին պրոնզաձոյլ արձանը տեղադրուեցաւ կեդրոնի նախասրահին` խորհրդանշական բաժինին մէջ, ուր ամէն օր կ՛այցելեն հարիւրաւոր երիտասարդներ: Քանդակին հեղինակը քանատահայ քանդակագործ Յակոբ Ճամպազեանն է:
Հ.Յ.Դ. Բիւրոյի անդամ Արսէն Համբարձումեան` արժեւորելով Արամ Մանուկեանի կերպարն ու գործունէութիւնը, ըսաւ. «Դժուար է թերագնահատել այն դերը, որ ունեցած է Արամ Մանուկեանը Հայաստանի Ա. Հանրապետութեան ստեղծման գործին մէջ: Եթէ չըլլար Արամ Մանուկեանը, չըլլային անոր ժամանակակից նուիրեալ գործիչները` չէինք ունենար Ա. Հանրապետութիւնը, Խորհրդային Հայաստանը, նորանկախ Հայաստանի Հանրապետութիւնը: 
Արամ Մանուկեանը իր ամբողջ կեանքի ընթացքին, անկախ անկէ, թէ ո՛ւր գործած է եւ ի՛նչ հանգամանքներու մէջ, միշտ հանդէս եկած է իբրեւ լաւ կազմակերպիչ` ըլլայ Պաքուի, Կարսի, Վանի, թէ Երեւանի մէջ: Ան իր որակական յատկանիշներով կրցած է փայլուն արդիւնքներ արձանագրել իր ամբողջ գործունէութեան ընթացքին: Միայն վերջին տարիներուն է, որ, տարբեր առիթներ օգտագործելով, կրցած ենք Արամ Մանուկեան գործիչի մասին բարձրաձայնել: Վստահաբար, թէ՛ երէկ, թէ՛ այսօր, թէ՛ վաղը Արամ Մանուկեանի պէս գործիչներու անհրաժեշտութիւն պիտի ունենանք` իբրեւ կազմակերպող, իբրեւ առաքինի մարդ, իբրեւ միասնութիւն ապահովող, անմնացորդ նուիրեալ: Այս որակներուն շնորհիւ էր, որ Արամ Մանուկեան բոլորին համար դարձած էր ընդունելի, հարազատ, հեղինակութիւն», ըսաւ ան, ապա, վերյիշելով Նիկոլ Աղբալեանի խօսքերը, շեշտեց` արդեօք մենք կը մտածե՞նք, կը գործե՞նք, կ՛ապրի՞նք Արամ Մանուկեանի նման», ըսաւ Համբարձումեան:
Քանդակագործ Յակոբ Ճամպազեան պատիւ նկատեց Արամ Մանուկեանի նման հերոսի մը յուշակոթող-կիսանդրին քանդակելը` աւելցնելով, որ Արամ Մանուկեանի մահուան 100-րդ տարելիցին առիթով Սարդարապատ յուշահամալիրին մէջ եւս տեղադրուած է իր հեղինակած` Արամ Մանուկեանի յուշակոթողը:
Հ.Յ.Դ. պաշտօնաթերթ «Դրօշակ»-ի գլխաւոր խմբագիր Արտաշէս Շահպազեան` խօսելով քանդակագործին մասին, ըսաւ, որ Յակոբ Ճամպազեան իսկական արամական է, եւ եթէ մենք հայ ենք, ապա իւրաքանչիւրս պէտք է քիչ մը արամական ըլլանք:
«Արամականութիւնը դարձնելով հայ ժողովուրդի սեփականութիւնը` մենք հայ ժողովուրդը ազգային կը դարձնենք, որուն մէջ է մեր փրկութիւնը», եզրակացուց Շահպազեան:
