0
0
Շաբաթ, Յուլիս 3 -ին, Ատրպէյճանի արտաքին գործոց նախարարութիւնը յայտնեց, որ իբրեւ մարդասիրական քայլ` ատրպէյճանական կողմը Հայաստանին արտայանձնած է բանտարկութեան դատապարտուած 15 անձեր: Փոխարէն, Ռուսիոյ նախաձեռնութեամբ Հայաստանը յանձնած է Վարանդային եւ Կովսականի շրջաններուն շուրջ 92.000 ականներու քարտէսները:
«Շարունակելով եռակողմ համաձայնագիրի կէտերու կատարումը ապահովելու աշխատանքները` այսօր Պաքուի մէջ անձամբ ես ազրպէյճանական կողմին յանձնած եմ երկու շրջաններու ականապատ դաշտերու քարտէսները: Անոնք ականապատուած են հայկական ստորաբաժանումներու կողմէ Լեռնային Ղարաբաղի մէջ տեղի ունեցած նախորդ զինեալ տագնապի ընթացքին: Ազրպէյճանը իր կարգին ազատ արձակած է 15 հայ գերիներ, որոնք Երեւան հասցուած են Ռուսիոյ օդուժի օդանաւով», յայտնեց Արցախի մէջ տեղակայուած ռուսական խաղաղապահ զօրախումբի հրամանատար գնդապետ-զօրավար Ռուսթամ Մուրատով:
ԵԱՀԿ-ի գործող նախագահ եւ Շուէտի արտաքին գործոց նախարար Անն Լինտէ ողջունեց 15 հայ պատերազմական գերիներու վերադարձը Հայաստան եւ յոյս յայտնած ԵԱՀԿ-ի Մինսքի խմբակի հովանիին տակ տագնապի լուծման նկատմամբ:
Իսկ Հարաւային Կովկասի եւ Վրաստանի ճգնաժամի հարցերով Եւրոպական Միութեան յատուկ ներկայացուցիչ Թոյվօ Քլաար ողջեց Հայաստանի կողմէ Ատրպէյճանին Վարանդայի (Ֆիզուլի) եւ Կովսականի (Զանգելան) ականապատ դաշտերու քարտէսներու տրամադրումը, ինչպէս նաեւ 15 հայ գերիներու ազատ արձակումը:
