0
0
ՍՏԵՓԱՆԱԿԵՐՏ․- Արցախի նախագահի գլխաւոր խորհրդական եւ յատուկ յանձնարարութիւններու դեսպան Ռուտիկ Հիւսնունց կը տեղեկացնէ, թէ Լիբանանէն Արցախ ժամանած են առաջին երկու հայրենադարձ ընտանիքները, որոնց կացութեան համար ստեղծուած են բոլոր պայմանները:
Նախագահ Արայիկ Յարութիւնեան, Օգոստոս 25-ին, հրաւիրած էր աշխատանքային խորհրդակցութիւն՝ նուիրուած լիբանանահայութեան ցուցաբերուող աջակցութեան ծրագրերուն։ Նախագահը շեշտած է, որ չափազանց կարեւոր է պահպանել Լիբանանի հայկական համայնքը` իբրեւ կայացած գաղութի ամբողջականութիւն, որուն իր ուժերուն ներածին չափով կը նպաստէ նաեւ Արցախի կառավարութիւնը:
Նշենք թէ, Հ.Յ.Դ. Հայաստանի Գերագոյն մարմինը եւ «Երկիր» հիմնադրամը նախաձեռնած են «Օգնիր եղբօրդ-Լիբանան» աջակցութեան ծրագիրին, որուն շնորհիւ շուտով կարելի պիտի ըլլայ սննդեղէնի տուփերով բեռնուած օդանաւը ուղարկել Լիբանան: Այս ծրագիրին, 4.800.000 դրամի նուիրատուութիւն կատարած է «Հայրենիք» հիմնադրամը: Իսկ «Գագիկ Ծառուկեան» բարեգործական հիմնադրամը՝ տաս հազար տոլար։
