0
0
Ուաշինկթընի մօտ, Թուրքիոյ նախկին դեսպան Նապի Սենսոյ, կտրուկ կշռոյթով ու զայրոյթով կ’արտայայտուէր: Ան չէր կրցած իր պաղարիւնութիւնը պահել:
Ընդհակառակը պրկուած ու ջղային շարժումներով, ան կը փորձէր արտայայտուիլ:
Իր տատամսումն ու պապանձումը աւելի ճնշում կը բանեցնէին, այնքան մը որ ան հասած էր մակարդակի մը՝ ուր գրեթէ կորսնցուցած էր իր տրամաբանութիւնն ու առողջ մտածելակերպը:
Այո’, փորձառու թղթակից – լրագրող Պոպ Սայմըն կրցած էր զինք նեղ կացութեան մատնել: Եւ Սենսոյ, քանի մը վայրկեաններու ընթացքին, կատարեց աններելի վերլուծումներ եւ հաստատումներ, ընդհանրապէս ժխտական տպաւորութիւն մը ձգելով, մեծ ժողովրդականութիւն վայելող «Վաթսուն Վայրկեան» (60 Minutes) յայտագիրը հետեւող ամբոխին վրայ:
Արդարեւ, այդ օր՝ Կիրակի Փետրուար 28, 2010-ին, Հայոց Ցեղասպանութեան մասին պատրաստուած յայտագրին առթիւ, Պոպ Սայմըն կրցած էր քառորդ ժամուան ընթացքին ներկայացնել, ցայսօր թապու հանդիսացող եւ մելան հոսեցնող նիւթ մը:
Տրամաբանական մօտեցումներով, շինիչ հարցադրումներով եւ տեղին մատնանշումներով, Սայմըն կրցաւ այս կարճ ու իրապաշտ վաւերագրականով, ներկայացնել պատահած «ամօթալի արարք»ը, կտրուկ կերպով, պատասխանելով դեսպան Սենսոյին թէ, տեղահանութիւն մը կազմակերպելը ունի (…եւ պէտք է որ ունենայ) իր լուրջ դրդապատճառները եւ աւելի’ն, անմեղ հայորդիներու տեղահանութիւնը կատարուած է դէպի տարբեր ուղղութիւն, տարբեր երկիր…անապատ՝ մերկ անապատ:
Սայմըն այցելելով Տէր Զօր, քաջատեղեակ եղած ու իր մորթին վրայ զգացած էր թէ որքա¯ն արցունք, անէծք, թախիծ, սրտաճմլիկ տեսարաններ, սրտակեղէք դէպքեր պատահած էին, ցայսօր, տարիներու հետ անարդարօրէն անպատիժ ձգելով այդ Եղեռնի ետին կեցող սադրիչ ու արիւնարբու ձեռքերը:
Սայմըն դպած էր աճիւններու, որոնք ի պատասխան դեսպան Սենսոյի, կը պատկանին այդ օրերուն շարունակ մղոններ քալած, կիսամերկ ու բոպիկ անմեղ հայորդիներուն:
Տէր Զօր եւ Մարկատէի քարայր այցելութեան ընթացքին, Սայմըն իր կողքին ունենալով Փիթըր Պալագեանը, գիտակցած էր թէ այդ ահաւոր արհաւիրքէն վերապրող հայորդիի մը համար, որքա¯ն զարհուրելի եւ սահմռկեցուցիչ է պատահածը եւ թէ որքա¯ն Սփիւռքածին ձայներ, փրկուածներու թոռներ ու ծոռներ կը պահանջեն ՀԱՅՈՑ ՑԵՂԱՍՊԱՆՈՒԹԵԱՆ արդար ու պատշաճ ճանաչում:
»Հայրենիք« – 03/05/2010
