0
0
Կլենվիու (Իլինոյ) .- Հոկտեմբեր 17, 2009ի երեկոյեան Հայ Կեդրոնի Շահնազարեան սրահին մէջ, ներկայութեամբ՝ Ամենայն Սրբոց Հայց. Առաքելական եկեղեցւոյ հոգեւոր հովիւ՝ Արժ. Տ. Զարեհ Աւ. քհնյ. Սահակեանի, բոլոր քոյր կազմակերպութիւններու ներկայացուցիչներու եւ մեծ թիւով մշակութասէր ազգայիններու, պաշտօնական ճաշկերոյթով ու գեղարուեստական խնամուած յայտագրով մը, նշուեցաւ տեղւոյս Համազգայինի հիմնադրութեան 28ամեակը:
Սեղանի օրհնութիւնը կատարեց Արժ. Տ. Զարեհ Աւ. քհնյ. Սահակեան:
Օրուան հանդիսավար՝ տիկին Ռիթա Առաքելեանի բարի գալստեան ջերմ խօսքերէն ետք, մասնաճիւղի ատենապետ՝ պրն. Յարութիւն Միքայէլեան հակիրճ կերպով ներկայացուց մասնաճիւղի 28 տարիներու գործունէութիւնը: Իր խօսքի աւարտին, յարգելի ատենապետը կոչ ուղղեց ներկաներուն տէր կանգնելու մեր հարուստ մշակոյթին:
Ճաշի սպասարկումէն անմիջապէս ետք, գործադրուեցաւ գեղարուեստական յայտագիր մը, որուն իրենց մասնակցութիւնը բերին գաղութիս շնորհալի անդամ-անդամուհիներ, Դանիէլ Վարուժան Հայկական Շաբաթօրեայ վարժարանի աշակերտներ, ինչպէս նաեւ Համազգայինի »Սարդարապատ« պարախումբը, ղեկավարութեամբ տիկին Հուրի Փափազեանի եւ օր. Սոնա Պիրազեանի:
Մեներգեցին՝ Մարի Խաչերեան, »Կռունկ Բարով Դառնաս«, Յակոբ Մազեան, »Բինգեոլ«, Աբիկ Սահակեան, »Հերոսների Կենացը«: Արմէն Ասատրեան, ջութակի վրայ ներկայացուց »Կռունկ«ը: Ասմունքեցին՝ Թալին Պոյրազեան, Սիլվա Կապուտիկեանի »Խօսք Իմ Որդուն«, Լուսինէ Թորեան, Պարոյր Սեւակի »Անլռելի Զանգակատուն«էն հատուած մը: Այնուհետեւ դարձեալ երգ, ու այս անգամ նոր սերունդի ներկայացուցիչներու կատարողութեամբ:
Վատիկ Պաղտասարեան եւ Նաթալի Փափազեան, յաջորդաբար մեկնաբանեցին »Աքուլիսցի Քաջ Պատանի« եւ »Գետաշէն« հայրենասիրական երգերը: Այնուհետեւ, Դանիէլ Վարուժան վարժարանի աշակերտներ՝ Վատիկ Պաղտասարեան, Անժելա Մարտիրոսեան եւ Սուզիկ Թովմասեան երրեակը մեկնաբանեցին »Հայերէն Լեզու« երգը, դաշնակի ընկերակցութեամբ Լուսինէ Թորեանի: Նախքան Համազգայինի »Սարդարապատ« պարախումբի ելոյթը, անակնկալներով լեցուն գեղարուեստական բաժինը իր աւարտին հասաւ Ռոզիկ Սազեանի եւ Աբիկ Սահակեանի կողմէ մեկնաբանուած »Խանդոտ Կինը« զուգերգով:
Աւարտին մասնաճիւղի վարչական կազմը հրաւիրուեցաւ կտրելու տարեդարձի կարկանդակը:
Շիքակոյի Համազգայինի հիմնադրութեան 28ամեակին ուրախ առիթով, կը շնորհաւորենք մասնաճիւղի վարչական նորընտիր կազմը, եւ բոլոր անդամները եւ նորանոր յաջողութիւններ ու վերելք կը մաղթենք իրենց:
ԹՂԹԱԿԻՑ
