0
0
Հայաստանեայց Եկեղեցւոյ Հիւսիսային Ամերիկայի Արեւմտեան Թեմի (չորս տարի) եւ Արեւելեան Թեմի (24 տարի) Առաջնորդ եւ Երուսաղէմի Առաքելական Աթոռի 96-րդ Պատրիարք (23 տարի) Ամեն. Տ. Թորգոմ Արք. Մանուկեանի յիշատակի ոգեկոչման նուիրուած հանդիսութիւնը տեղի ունեցաւ Կիրակի, Փետրուար 9, 2014, Սուրբ Վարդան Մայր Տաճարին եւ Առաջնորդարանի Հայկ եւ Ալիս Գավուքճեան հանդիսասրահին մէջ:
Առաւօտեան հանդիսաւոր Ս. Պատարագ մատուցուեցաւ Ս. Վարդան Մայր Տաճարին մէջ: Օրուան պատարագիչն ու քարոզիչն էր Թեմակալ Առաջնորդ Գերշ. Տ. Խաժակ Արք. Պարսամեան:
Առաջնորդ Սրբազան Հայրը իր քարոզը սկսաւ հետեւեալ խօսքերով.- “Այսօր յիշատակութեան օրն է Հայ հոգեւորականի մը, հոգելոյս Տ. Թորգոմ Պատրիարք Մանուկեանի, որ իր ամբողջ կեանքը նուիրեց այն կարեւոր սրբազան գործին, որուն շնորհիւ Քրիստոսի առաքելութիւնը, Հայ Եկեղեցւոյ աւանդութեանց ճանապարհով, շարունակեց եւ կը շարունակէ ներգործել Հայ ժողովուրդի կեանքէն ներս, մասնաւորաբար Ամերիկայի մեր Թեմէն ներս: … Քսաներորդ դարու երկրորդ կէսի Հայ Եկեղեցւոյ բարձրաստիճան հոգեւորականներու շարքի ամենէն կարկառուն եւ լուսաւոր դէմքերէն մէկն էր Թորգոմ Սրբազանը“: Ապա, Առաջնորդ Սրբազան Հայրը հանգամանօրէն թուեց հոգելոյս Թորգոմ Պատրիարքի արդիւնաշատ ծառայութիւնները ի նպաստ Ամերիկայի Թեմին, Հայաստանին եւ Երուսաղէմի Հայոց Պատրիարքարանին: Անդրադարձաւ նաեւ Պատրիարք Սրբազան Հօր կենսագրութեան` շեշտելով որ անոր մկրտութեան անունը Աւետիս էր, եւ երբ ան պատասխանելով մեր Տիրոջ կոչին եկեղեցական ասպարէզը ընդգրկեց` Հայ Եկեղեցւոյ համար եղաւ մեծագոյն աւետիսը: Եօթանասուն տարիներու հոգեւոր սպասաւորութեամբ ան “ինչ որ ունէր“ ամբողջութեամբ նուիրեց իր եկեղեցիին եւ ազգին: Ապա, Սրբազան Հայրը խօսեցաւ Հայ Ժողովուրդի հրաշք պատմութեան մասին` ըսելով որ մեր այսօրուան գոյութիւնը իբրեւ ազգ մեծագոյն հրաշքներէն մէկն է: Ինչպէս նաեւ անդրադարձաւ Երուսաղէմի Հայոց Պատրիարքարանի պատմութեան եւ կարիքներուն մասին:
Ղեկավարութեամբ խմբավար Խորէն Մէյխանէճեանի, կատարուեցաւ տպաւորիչ երգեցողութիւն: Յաւարտ Ս. Պատարագի` Հոգելոյս Թորգոմ Պատրիարք Մանուկեանի հոգիի խաղաղութեան համար մասնաւոր Հոգեհանգստեան Պաշտօն կատարուեցաւ հանդիսապետութեամբ Ամեն. Տ. Նուրհան Արք. Մանուկեանի:
Ապա, հոգելոյս Տ. Թորգոմ Պատրիարք Մանուկեանի յիշատակը յարգող մօտ երեք հարիւր անձեր ներկայ գտնուեցան Առաջնորդարանի Հայկ եւ Ալիս Գավուքճեան հանդիսասրահին մէջ կազմակերպուած կէսօրուան ոգեկոչման հանդիսութեան:
Օրուան հանդիսավարն էր Դոկտ. Դաւիթ Նաճարեան, որ հրաւիրեց Գերշ. Տ. Վիգէն Արք. Այգազեանը` որպէսզի կատարէ սեղանի օրհնութիւնը: Ապա, հանդիսավարը կատարեց բացման իր երախտագէտ խօսքը եւ հրաւիրեց երկու ծանօթ արուեստագէտներ Սոլանճ Մըրտինեան (սօփրանօ) եւ Սոֆիա Մելիքեան (դաշնամուր) որպէսզի ելոյթ ունենան: Անոնք մեծ յաջողութեամբ ներկայացուցին Կոմիտաս Վարդապետի եւ Պէրպէրեանի ստեղծագործութիւնները` արժանանալով ծափահարութեանց:
