0
0
ՔԻԵՒ.- Աւելի քան երկու ամիսէ ի վեր կատարուող ցոյցերը, Յունուար 22-ին հասան իրենց գագաթնակէտին, եւ խլեցին երեք զոհեր: Անոնց կարգին էր, հայորդի մը` Սերժ Նիհոյեան: Հազիւ 21 գարուններ բոլորած Սերժ, ժամանած էր Քիեւ, Դնեպրոփեթրովսքի մօտակայ Պերեզնովանիվքա գիւղէն եւ միացած էր Եւրասիոյ Մաքսային միութեան դէմ պայքարող ցուցարարներուն: Սերժի ծնողքը Ուքրայինա ժամանած էր 1992-ին, Ղարաբաղի շրջանէն: Ուքրայինա ծնած եւ լաւապէս տիրապետած թէ՛ հայերէնին եւ թէ՛ ուքրայիներէնին, Սերժ միշտ ալ առաջին գիծի վրայ կը գտնուէր, շարունակ հայրենի եռագոյն դրօշն ալ, իր ուսին կապած: “Սերժ շատ կը փափաքէր Հայաստան այցելել: Երբեք չէր այցելած: Հպարտ էր իր հայութեամբ…“, կը յայտնէ Սերժի հայրը` Գարիկը: Սերժ կը նկատուի Ուքրայինայի “ԵուրոՄայտան“ի առաջին նահատակը: Ան, ցոյցերու ժամանակ, խոր ապրումով կ՛արտասանէր 19-րդ դարաշրջանի ուքրայինացի բանաստեղծ Թարաս Շեվչենքոյի “Կովկասը“ գործը, որ կոչ կ՛ուղղէր տեղացիներուն, պայքարիլ ռուսերուն դէմ:
