0
0
ԱՆԴՐԱՆԻԿ ԳԱՐԱՏՈԼԵԱՆ
Շաբաթ, Սեպտեմբեր 28, 2013-ին, երեկոյեան ժամը 8ին, Սուրբ Սարգիս Հայոց Առաքելական Եկեղեցւոյ յարակից “Լիլիըն Առաքելեան“ սրահին մէջ տեղի ունեցաւ երաժշտական երեկոյ մը, կոկիկ յայտագրով եւ մեծ շուքով տօնակատարուեցաւ Հ.Օ.Մ.ի հիմնադրութեան 103-րդ, եւ Միջ-Վարչութեան 70-րդ հիմնադրութեանց տարեդարձները: Իսկապէս որ, հոգեկան յիշատակելի պահերէն էր որ ապրեցան Տիթրոյթի Հ.Օ.Մ.-ի ընկերուհիներն ու համակիր հասարակութիւնը: Զոյգ տարեդարձներու առթիւ, Գանատայի Մոնրէալ քաղաքէն հրաւիրուած էր ներկայ սերունդի երիտասարդ, խօստմնալից ու տաղանդաւոր երգիչ Էլի Պերպէրեան եւ իր նուագախումբը: Ներկայ էին Սուրբ Սարգիս եւ Հայ Աւետարանական Եկեղեցիներու հոգեւոր հայրերը, Արժ. Տ. Հրանդ Քհնյ. եւ Երեցկին Թամար Գէորգեան, Պատուելի Շանթ Պարսումեան, Սուրբ Սարգիս Եկեղեցւոյ հոգաբարձութեան անդամներ, Հ.Յ.Դաշնակցութեան Բիւրոյի շրջանաւարտ անդամ Հայկ Օշական, Ա.Մ.Ն. Արեւելեան շրջանի Հ.Օ.Մ.-ի Շրջանային Վարչութեան ատենապետուհի ընկհ. Անի Աթթար, Հ.Յ.Դաշնակցութեան Ա.Մ.Ն.ի Արեւելեան շրջանի Կ. Կոմիտէի անդամ ընկ. Թորոս Չէօփճեան, “Ազատամարտ“ կոմիտէութեան եւ Հ.Օ.Մ.ի մասնաճիւղերու ընկ. ընկերուհիներ, Հ.Մ.Ը.Մ.ի եղբայրներ ու քոյրեր, եւ կոկի թիւով հասարակութիւն մը:
Ձեռնարկը հանդիսաւարեց Միջ-Վարչութեան անդամ ընկհ. Լարա Ներսէսեան: Ան Հ.Օ.Մ.-ի եւ Միջ Վարչութեան կողմէ բարի գալուստ եւ բարի վայելում մաղթելէ ետք ներկայ հասարակութեան, յայտնեց.- “Այս երեկոյ հաւաքուած ենք տօնակատարելու Հ.Օ.Մ.-ի 103րդ, եւ Միջ-Վարչութեան 70-րդ, հիմնադրութեան ամեակները: Եօթանասուն տարիներ Հ.Օ.Մ.-ի “Զաւարեան“ միօրեայ վարժարանը ոչ միայն եղաւ հայ լեզու, պատմութիւն եւ մշակոյթ սորվեցնելու վայր, նոյնպէս եղաւ այն վայրը, ուր հայ մանուկներ իրար հետ հանդիպեցան եւ կազմեցին հայ ընկերներ: Ապա ներկաները հրաւիրուեցան, յոտնկայս ունկնդրելու Հ.Օ.Մ.-ի քայլերգը, որ կատարեց ընկհ. Սօնա Մշիկեանը, դաշնակի ընկերակցութեամբ Տիկ. Նէնսի Տէր Ստեփանեանի: Ապա Արժ. Տէր Գէորգեան օրհնեց սեղանները: Ներկաները ճաշակեցին Հ.Օ.Մ.-ուհիներու կողմէ պատրաստուած հայկական համեղ աղանդները: Յարգելի հանդիսավարուհի բեմ հրաւիրեց Միջ Վարչութեան ատենապետուհին ընկհ. Սիրվարդ Թելպէլեան որպէսզի փոխանցէ Հ.Օ.Մ.-ի պատգամը:
Ան ըսաւ թէ այսօր հպարտանքով կը տօնենք ամեակները: Անհատի մը կեանքին մէջ թուականներու յիշատակումը գեղեցիկ անկիւնադարձ մըն է, իսկ միութենական կեանքին մէջ հանգրուան մը, անդրադառնալ անցեալին, ապրիլ ներկան եւ մշակել ապագայ իրագործի ծրագիրներ: Հ.Օ.Մ.-ը, իր հիմնադրութեան առաջին օրէն իսկ հայ կեանքին մէջ հանդիսացած է մարդասիրական միութիւն մը: Ան նիւթապէս եւ բարոյապէս օժանդակած է, եւ կ՛օժանդակէ հայ ժողովուրդի ընկերային, կրթական, առողջապահական, բարեսիրական եւ այլ կարիքներուն: Քաջալերած է ու քաջալեր կը հանդիսանայ Հայ լեզուի ուսուցումը եւ հայեցի դաստիարակութիւնը սփիւռքի գաղութներուն մէջ: Հ.Օ.Մ.-ը որպէս բարեսիրական միութիւն, գաղութներու ազգային հասարակական կեանքին մէջ, իր մասնաճիւղերու շինիչ գործունէութեամբ հանրածանօթ է: Ինչպէս անցեալի նոյնպէս եւ այսօր, իր շարքերը խտացած են երիտասարդ, գիտակից եւ գործունեայ ուժերով, որոնք առանց ընկրկումի եւ առանց յուսահատութեան կը շարունակեն իրենց ստանձնած առաքելութիւնը Հայրենիքի, Արցախի, Ջաւախքի եւ սփիւռքի գաղութներուն մէջ:
Յատկապէս ներկայիս Սուրիոյ քաղաքացիական պատերազմի պատճառով սուրիահայութեան դիմագրաւուած տնտեսական, բարեսիրական եւ զանազան դժուարութիւնները կարենալ յաղթայարելու միտումով, իր սփիւռքեան ցանցերով տենդագին լծուած է աշխատանքի, գէթ մասամբ մը ամոքել անոնց ցաւերը:
Տիթրոյթի Հ.Օ.Մ.-ի հինգ մասնաճիւղերը, եւ յատկապէս Հ.Օ.Մ.-ի Շրջանային Վարչութիւնը եօթանասուն տարիներէ ի վեր նիւթապէս եւ բարոյապէս սատարած են եւ կը սատարեն “Զաւարեան“ միօրեայ վարժարանին կարիքներուն: 2012-13 ուսումնական տարեշրջանին վարժարանը ունէր 5-16 տարեկան 45 աշակերտներ, բաժնուած չորս դասարաններու, որոնք յանձնուած էին նուիրեալ եւ գիտակից ուսուցչուհիներու խնամքին: Որովհետեւ Շրջանային Վարչութիւնը իր հիմնադրութեան առաջի օրէն իսկ հաւատացած էր ու կը հաւատայ, որ “Զաւարեան“ միօրեայ Հայ դպրոցին եւ Հայ ուսուցիչին համար չկայ աւելի նուիրական պարտականութիւն քան հայ մանուկին սորվեցնել իր մայրենի լեզուն, ազգային պատմութիւնը ու քրիստոնէական կրօնքը, եւ զինք դարձնել հպարտ եւ իրաւական տէրը իր դարաւոր վիթխարի մշակոյթին: Միւս կողմէ, հայ ծնողքի մը համար չկայ աւելի քաղցրահնչիւն երգ ու խօսք քան իր զաւակներուն անմեղունակ շրթերէն լսուած արտասանութիւններ ու տաղեր մեր պապերուն դարաւոր լեզուով: Այս մթնոլորտին մէջ Հ.Օ.Մ.-ի “Զաւարեան“ միօրեայ դպրոցը 70 տարներ ապրեցաւ ու գործեց, եւ կը շարունակէ իր առաքելութիւնը գաղութին մէջ:
Ամէն տարի Ա.Մ.Ն-ի արեւելեան շրջանի Հ.Օ.Մ.-ի շրջանային վարչութիւնը կը կազմակերպէ շարադրական մրցոյթ: Անցեալ տարեշրջանին “Զաւարեան“ միօրեայ վարժարանի աշակերտները մասնակցեցան այդ մրցոյթին, եւ երկու ուսանողներ արժանացան մրցանակի:
Ապա ընկհ. Թելպէլեան, Հ.Օ.Մ.-ի եւ Միջ-Վարչութեան կողմէ շնորհակալութիւն եւ քաջ-առողջութիւն մաղթեց, Հ.Օ.Մ.-ի, հին թէ նոր, մօտակայ թէ հեռաւոր, բոլոր նուիրատուներուն, որոնք հաւատացած են ու կը հաւատան Հ.Օ.Մ.-ի առաքելութեան: Այնուհետեւ ան իր խօսքը փակեց Հ.Օ.Մ.-ի նշանաբանով` Ժողովուրդիս հետ, Ժողովուրդիս համար:
Ապա ընկհ. Ներսէսեան հակիրճ գիծերու մէջ ներկայացուց երգիչ Էլի Պէրպէրեանի կենսագրութիւնը: Ան ծնած է Լիբանան, Պէյրութ, փոքր տարիքին իր ծնողքը յայտնաբերած է անոր երգիչի տաղանդը եւ զայն մղած է երաժշտական ասպարէզին: 1992ին, 10 տարեկան հասակին հայ հասարակութեան մէջ իր առաջին ելոյթը ունեցած է: 12 տարեկանին Լիբանանցի հանրածանօթ մեծ երգիչ պրն. Զաքի Նասիֆ, զինք ունկընդրելէ ետք զայն անուանած է “Հրաշք Պզտիկ“: 2000-ին, աւարտելէ ետք, Սոֆիա Յակոբեան երկրորդական վարժարանը: Մէկ տարի օրդ. Նորա Մանոյեանի հսկողութեամբ հետեւած է Համազգայինի “Բարսեղ Կանաչեան“ ձայնամարզումի դասընթացքներուն: Չորս տարի հետեւած է Լիբանանի պետական երաժշտանոցի դասընթացքին, վկայուած է մագիստրոսի տիտղոսով:
Էլի Պէրպէրեանի օրուայ ելոյթի յայտագիրը կազմուած էր երկու բաժիններու, երգերու ցանկը ընդհանրապէս կ՛ընդգրկէր Սայեաթ Նովայի, Աշուղ Ճիւանիի եւ այլոց ստեղծագործութիւնները, որոնց կողքին նաեւ մեկնաբանեց Էստրատային եւ ժողովրդական երգերու փունջ մը: Յայտագիրը սկսաւ Արամ Յովհաննէսեանի “Հզօր Հայաստան“ երգի կատարումով, որմէ ետք յաջորդաբար մեկնաբանեց Սայեաթ Նովայի եւ Աշուղ Ճիւանիի ժողովրդականացած ստեղծագործութիւնները: Երաժշտական Երեկոն կարելի է դասել Աշուղական համերգ անուան տակ: Էլի Պէրպէրեան երիտասարդ, տաղանդաւոր եւ խոստմնալից նոր աստղ մըն է, որ կը փայլի սփիւռքահայ երաժշտութեան մէջ: Ունի ինքնատիպ ոճ, մանաւանդ` ունկնդիրներուն ներկայացուց իւրաքանչիւր երգի պատմութիւնը եւ իմաստը: Շաբաթ երեկոյ Էլի Պէրպէրեան իր տիրական ու գրաւիչ ձայնով, դիւթեց ներկայ հասարակութիւնը:
Յատագրի աւարտին, ներկաներու ջերմ փափաքին ընդառաջելով, երգեց ազգային եւ յեղափոխական երգեր, աւելի եւս խանդավառելով ներկայ հասարակութիւնը: Նորանոր յաջողութիւն կը մաղթենք իր երաժշտական ասպարէզին եւ վաստակին, վստահ ենք որ կառչած կը մնայ իր ազգային ինքնագիտակցութեան, եւ իր համեստ ներդրումը կ՛ունենայ Հայ մշակոյթի երաժշտութեան անդաստանին մէջ:
Այնուհետեւ տեղի ունեցաւ վիճակահանութիւն. հետեւեալ անձեր բախտաւորուեցան` Պրն. Մայք Արամի տրամադրած նուէրը շահեցաւ Տիկ. Վարդուհի Տանայեան, իսկ Յակոբեան գորգավաճառի հաստատութեան տրամադրած նուէրը շահեցաւ Տիկ. Շուշան Ֆէրմանեան:
Պատուելի Շանթ Պարսումեանի աղօթքով հանդիսութիւնը հասաւ իր աւարտին:
