0
0
Յուլիս 24ին, Նիւ Եորքի մէջ Հ.Յ.Դ. Արմէն Գարօ Կոմիտէի կազմակերպութեամբ տեղի ունեցաւ ձեռնարկ մը, նուիրուած Խանասորի Արշաւանքին եւ Լիզպոնի նահատակներու յիշատակին:
Ձեռնարկին բացումը կատարեց ընկհ. Սօսի Էսաճանեան որմէ ետք »Արմէն Գարօ« Կոմիտէութեան խօսքը փոխանցեց‘ ընկհ. Մարի Եարալեան: Ան նշեց թէ Խանասորի Արշաւանքի եւ Լիզպոնի նահատակներու ոգիով է որ մենք այսօր կը շարունակենք Հայ Դատի աշխատանքը:
Օրուան բանախօսը՝ ընկեր Ժիրայր Պէօճէքեան բաղդատելով երկու դէպքերը կեդրոնացաւ անոնց պատմական եղելութիւններուն վրայ: Պէօճէքեան նշեց թէ երկու դէպքերը լաւ ձեւով կազմակերպուած էին, իրագործուած, մարզուած անձերու կողմէ: Անդրադառնալով Լիզպոնի գործողութեան, Պէօճէքեան ըսաւ թէ Լիզպոնի մէջ թրքական դեսպանատան գրաւումը պարզապէս Հայոց Ցեղասպանութեան ճանաչման նպատակով չէր, այլ ան հաստատում մըն էր մարդկային իրաւունքներու այլ մարդկանց միջեւ հաւասարապէս գոյատեւելու կէտին: Այս նիւթը կարեւոր տեղ գրաւած է նաեւ Արցախեան պահանջատիրութեան տարիներուն եւ ան պէտք է շարունակէ կարեւոր նկատուիլ, մանաւանդ որ Ատրպէյճան կը շարունակէ սպառնալ հայերուն, ըսաւ Պէօճէքեան:
Խօսք առաւ նաեւ Նիւ Եորքի Հայ Դատի գրասենեակի ատենապետ՝ Ռաֆֆի Մահսերէճեան, որ կոչ ուղղեց երիտասարդութեան, շարունակ հետեւելու անցուդարձերուն: Գեղարուեստական յայտագրէն ետք, խօսք առաւ Ա.Մ.Ն. Արեւելեան շրջանի փոխ Առաջնորդ Հայր Անուշաւան Դանիէլեան, որ մէջբերելով Հայոց Պատմութենէն կարեւոր դէպքեր, անդրադարձաւ Խանասորի Արշաւանքի եւ Լիզպոնի նահատակներու կարեւորութեան:
Ձեռնարկը փակուեցաւ »Յառաջ Նահատակ« քայլերգով:
Յուլիս 26ին, Սուրբ Գրիգոր Լուսաւորիչ Հայ Եկեղեցւոյ մէջ տեղի ունեցաւ հոգեհանգստեան արարողութիւն Լիզպոնի եւ Խանասորի Արշաւանքի նահատակներու յիշատակին: Արարողութենէն ետք Հ.Յ.Դ. անդամներ, Հայր Ա. Դանիէլեան եւ այլ ներկաներ ուղղուեցան դէպի Հէքընսաք (Նիւ Ճըրզի) իրենց յարգանքի տուրքը մատուցելու հերոս՝ Արշաւիր Շիրակեանին:
