0
0
Մշակոյթ` ընկերային յառաջընթացի, կլիմայի պաշտպանութեան եւ ժողովրդավարութեան համար: Մշակոյթը` իբրեւ մարդու արտայայտութեան հիմնարար միջոց, անխուսափելիօրէն կ՛ազդէ հասարակութիւններու հիւսուածքին եւ, հետեւաբար, նաեւ անոնց ապագային վրայ: Մշակոյթը պերճանք չէ, այլ անհրաժեշտութիւն` կերտելու յարակցական, հաւասար, կայուն եւ ազատ հասարակութիւններ, եւ, հետեւաբար, աւելի առողջ ապագայ մը:
Մշակոյթը չի յաւակնիր ըլլալ բոլոր հարցերուն միակ կամ արագ լուծումը, սակայն մեր առջեւ ծառացած այսօրուան հիմնահարցերէն ո՛չ մէկը կարելի է քննական հայեացքով վերլուծել` առանց մշակութային հէնքին: Ժողովրդավարական մղումներուն հանդէպ սպառնալիքները, կենսոլորտի աղէտը, թուային արհեստագիտութեան մարտահրաւէրները, աճող անհաւասարութիւնները եւ նոյնիսկ պատերազմները` բոլորն ալ խոր մշակութային փոխկապակցութիւններ ունին:
Ի տարբերութիւն զուտ գործնապաշտ եւ կարճաժամկէտ ռազմավարութիւններուն, որոնք կը մշակուին եւ կ՛որդեգրուին ի դէմս աշխարհի դիմագրաւած ճգնաժամերուն եւ սրընթաց փոփոխութիւններուն, մշակոյթին ունեցած ազդեցութիւնը աւելի խորքային է, համապարփակ եւ ոչ անմիջապէս չափելի: Մշակութային ոլորտը եզակի խթան է` քննական մտածողութեան զարգացումին, բազմակարծութեան, հասարակական վերափոխումին եւ քաղաքացիական ներգրաւուածութեան: Այսպիսով, անիկա կենսական նշանակութիւն մը ունի յառաջդիմութեան եւ զարգացումին համար:
Հայերը միշտ եղած են մշակութային փոխանակումի եւ բազմազանութեան տարբեր հատումներու եւ խաչմերուկներու վրայ: «Արդ եւս/in view» ծրագիրը կ՛արժեւորէ այս բազմազանութիւնը եւ կը միտի նպաստելու անոր` ստեղծելով բազմաձայնութիւնը լսելի դարձնելու նախադրեալներ եւ փոխադրելու այս տարատեսակ ու բազմամշակոյթ փորձառութիւնները դէպի լեզու, դէպի արեւմտահայերէ՛ն: Վերջինս` որպէս լեզուի զարգացման մղիչ ուժ, լեզուն կը դարձնէ աւելի կենսունակ ու կ՛ապահովէ անոր տեղը` իբրեւ աշխարհի լեզու. կ՛օգնէ` որ այս նորարար մշակոյթը սպառողներուն քաղաքացիական յանձնառութիւնը հարստանայ, անոնց դիմակայութիւնը զարգանայ, եւ առկայ մարտահրաւէրներուն ստեղծագործ լուծումներ գտնուին:
Այս նպաստի ծրագիրով եւ մշակոյթի ուժով կը ձգտինք ստեղծելու հայկական նոր պատումներ, որոնք հիմնուած ըլլան ստեղծագործութեան, մարդկային արժանապատուութեան, զօրակցութեան եւ համամարդկային արժէքներու վրայ:
Յաւելեալ տեղեկութիւններու համար այցելել gulbenkian.pt/en/apoios-lista/%d5%a1%d6%80%d5%a4-%d5%a5%d6%82%d5%bd-in-view կայքէջը:
