0
0
Դեկտեմբեր 2-ին, մութ ձեռքեր կոտրած են Պռոշեան գիւղի ազատամարտի նահատակներու պանթէոնի մուտքի ճանապարհին հաստատուած երկաթէ սիւները եւ պարիսպներուն ու սիւներուն վրայ տեղադրուած քանի մը լապտերները:
Կատարուած սրբապղծութեան եւ բարբարոսութեան մասին տեղեակ պահուած է ոստիկանութեան Կոտայքի մարզային վարչութիւնը եւ արդէն իսկ կը կատարուի ուսումնասիրութիւն:
«Ասիկա հաստատ բարբարոսութիւն է, մեծ ցաւ կ՛ապրին այս ամէնուն ականատես ըլլալով: Այս անգամ եւս այս սրբապղծութեան հեղինակները թաքնուած են, եւ յուսով ենք` ոստիկանութիւնը կը պարզէ այդ անձերու ինքնութիւնը, ե՛ւ, ամենակարեւորը, այն դրդապատճառները, որոնք կը ստիպեն նշեալ շրջանակներուն` ձեռք բարձրացնելու մեր արժէքներուն վրայ», – նշած է Հ․Յ․Դ․ Պռոշեանի Կոմիտէի ներկայացուցիչ Էդուարդ Թովմասեանը` փաստելով, որ նախապէս եւս նոյն պանթէոնի նկատմամբ իրականացուած էր նմանօրինակ արարք:
Նման դէպք տեղի ունեցած է նաեւ 2013-ին, երբ կրկին անյայտ անձեր պղծած էին Պռոշեանի ազատամարտիկներու յուշարձանը, ինչպէս նաեւ գիւղի կեդրոնի պատերէն մէկուն վրայ յանցագործները անպարկեշտ գրութիւններ գրած էին, սպաննուած գիւղապետ, ազատամարտիկ Հրաչ Մուրատեանի հասցէին:
