0
0
Ամերիկահայը անհամբեր կը սպասէ Երեքշաբթի Փետրուար 9, 2010 թուականին:
Ո՛չ մէկ անկիւնադարձային հաւաք, ընտրարշաւ կամ ընտրութիւն, այլ պարզապէս հանդիպում…կարեւոր հանդիպում: Այնքան մը կարեւոր եւ տարօրինակ կացութիւն մը ստեղծած, որ նախօրեակն ու գէթ մնացած քանի մը օրերն ալ խիստ կարեւոր կը թուին ըլլալ:
Հարց տալ թէ ինչո՞ւ է այս ստեղծուած սպասումի, տատամսումի եւ ընդվզումի ալիքն ու մթնոլորտը, մանաւանդ որ, Միացեալ Նահանգներու Արտաքին Գործոց նախարար` Հիլըրի Քլինթընը, յատուկ հրաւէր ուղղած է ամերիկահայ գաղութի ներկայացուցիչներուն, սրտբաց խորհրդակցութիւններ ունենալու համար, Հայաստան-Թուրքիա յարաբերութիւններու կարգաւորման նպաստող ճանապարհային քարտէսին եւ անոր յաջորդող, Հոկտեմբեր 10, 2009-ի Ցիւրիխի (Զուիցերիա) մէջ կատարուած արձանագրութիւններու ստորագրութեան առնչութեամբ:
Ակնթարթ մը կայծակնային ետդարձ մը կատարելով դէպի այդ պատմական Հոկտեմբեր 10-եան թուականը, դեռ հայորդիին յիշողութեան մէջ թարմ է թէ նախարար Քլինթըն որքա՜ն աշխատանք տարած էր, նոյնիսկ ժամացոյցի դէմ մրցում կատարելով: Այսպէս, շէնքէ շէնք վազելով եւ իր հետ ալ գործի լծելով պետական այլ օժանդակ պաշտօնեաներ, շարունակ բջիջայինի (նոյնիսկ մէկէն աւելի) միջոցաւ զանգելով եւ մերթ խրատներ ու մերթ հրահանգներ ուղղելով, ան ամէն ճիգ թափեց որպէսզի ժամ առաջ կատարուի փաստաթուղթերու ստորագրութիւնը, հակառակ անոր որ երկու կողմերն ալ այդ մասին ոչ մէկ յայտարարութիւն կատարելու պատրաստ ըլլալու կացութեան մէջ էին:
Թէկուզ բազմազբաղ, Քլինթըն ցայսօր կը հետապնդէ այս արձանագրութիւններու ճանապարհին քարտէսը, վերջնականապէս տեղ հասցնելու:
Դեռ տարեշրջանի աւարտին էր, երբ ան նկատելով որոշ տեղքայլութիւն մը, անգամ մը եւս դիմած էր ընկալուչին եւ կատարած քանի մը խիստ կարեւոր հեռաձայններ, յետ-ստորագրական տարօրինակ սպասողական իրավիճակէն դուրս գալու համար:
Յառաջիկայ Երեքշաբթի օրուայ տեսակցութիւնները, կարելի է նկարագրել նմանօրինակ մթնոլորտի մէջ, մանաւանդ որ դեռ պաշտօնապէս չէ յստակացած (իսկ եթէ նոյնիսկ մետասաներորդ պահուն յստակացուի, արդէն իսկ ուշ է) հրաւիրուածներու ցանկը, հակառակ անոր որ հաւանական է որ կարելի ըլլայ յարանուանութիւններու ներկայացուցիչներու ներկայութիւնը ապահովել:
Այլապէս…Ոչ մէկ նորութիւն կը սպասուի այս տեսակցութիւնէն:
