0
0
Երկուշաբթի, Փետր. 1-ին, ԱՄՆ-ի նախագահ Պարաք Օպամա քոնկրէսին ներկայացուց 2011 թուականի պիւտճէի նախագիծը, որուն մէջ մասնաւորաբար առաջարկած է Հայաստանին քառասուն միլիոն տոլարի օգնութիւն յատկացնել: Անցեալ տարուայ համեմատած, գումարը յաւելում արձանագրած է 25 առ հարիւր տոկոս համեմատութեամբ: Նշենք թէ Օպամա առաջարկած էր Հայաստանին երեսուն միլիոն տոլար տրամադրել, սակայն Քոնկրէսին մէջ տեղի ունեցած քննարկումներուն իբրեւ արդիւնք, այս գումարը հասած էր 41 միլիոն տոլարի:
Յատուկ հաղորդագրութեամբ մը, Ամերիկայի Հայ Դատի յանձնախումբը կը տեղեկացնէ, որ այս տարի նոյնպէս կը պահպանուի Հայաստանին եւ Ատրպէյճանին տրամադրուող ամերիկեան զինուորական օժանդակութեան հաւասարակշռութիւնը. երկու երկիրներուն ալ պիտի յատկացուի 3,5 միլիոն տոլար: Հայ Դատի յանձնախումբի վարիչ գործավար Արամ Համբարեան ողջունեց Հայաստանին տրամադրուելիք տնտեսական նպաստը տաս միլիոն տոլարով բարձրացնելու Օպամայի որոշումը, ինչպէս նաեւ Հայաստանի եւ Ատրպէյճանի յատկացուող ռազմական օժանդակութեանց մէջ հաւասարակշռութիւնը պահպանելու քայլը: Ան նաեւ շնորհակալութիւն յայտնեց այս որոշումները իրականացնելու մէջ կարեւոր դերակատարութիւն ունեցած քոնկրէսականներուն:
Քոնկրէսի Հայկական հարցերու համախմբումը, ինչպէս նաեւ հայկական շարք մը կազմակերպութիւններ կը յուսան 70 միլիոն տոլարի օժանդակութիւն մը ապահովել Հայաստանի համար, ամավարկը վերջնականացնելու ճամբուն վրայ:
Նախագահի ամավարկի ծրագիրին համաձայն, Հայաստանին եւ Ատրպէյճանին ռազմական հաւասար օժանդակութիւն կը տրամադրուի: Անոնցմէ իւրաքանչիւրը այդ նպատակին համար պիտի ստանայ 3.5 միլիոն տոլար: Սակայն հաւասարութեան սկզբունքը չէ պահպանուած ռազմական մարզումներու ու վերապատրաստման համար նախատեսուած ամավարկին մէջ: Արդարեւ, Ատրպէյճանին այդ նպատակով պիտի յատկացուի 900 հազար տոլար, իսկ Հայաստանին` միայն 450 հազար տոլար:
Օպաման 2011ի ամավարկին մէջ Ատրպէյճանի համար առաջարկած է 22.12 միլիոն տոլարի օժանդակութիւն, ինչ որ 120 հազար տոլարով աւելի է քան այն գումարը, զոր Քոնկրէսը հաստատած էր անցեալ տարի: Ամբողջ Եւրոպայի եւ Եւրասիոյ տրամադրուելիք օժանդակութիւնները նուազում կրած են 2011ի ամավարկին մէջ:
