Անցեալ շաբաթավերջին, Պոլսոյ մէջ զանազան ձեռնարկներով նշուեցաւ, տեղւոյն «Ակօս» թերթի խմբագիր Հրանդ Տինքի սպանութեան երրորդ տարելիցը:
Հաւաքին մասնակցեցան Հրանդ Տինքի կողակիցն ու զաւակները: Զանազան լեզուներով պարզուած վերտառութիւններուն վրայ կը կարդացուէին նաեւ «Բոլորս Հրանդ ենք, բոլորս հայ ենք», «Հրանդ այս հողերուն տեղացին ու տէրն է», «Արդարութեան համար, Հրանդի համար» եւ այլ նախադասութիւններ:
Յետմիջօրէին, կատարուեցաւ հաւաք «Ակօս»ի խմբագրատան դիմաց, ուր հազարաւոր ներկաներ, հակառակ տեղատարափ անձրեւին, ժամանած էին եւ արդարութիւն կը պահանջէին Հրանդին համար:
«Այս ոճիրը հանրութեան ցաւ պիտի պատճառէ, այնքան ատեն, որ այս սպանդին գաղտնի պահուած մանրամասնութիւնները պիտի չհրապարակուին, երեւան պիտի չհանուին, թէ բուն պատասխանատուները ինչպիսի՛ կապեր ունէին պետական հաստատութիւններու հետ…»ըսաւ Հրանդի զաւակը` Արաթ: