0
0
Համազգային Հայ Կրթական եւ Մշակութային Միութեան Ա.Մ.Ն. Արեւելեան շրջանի Շրջանային վարչութենէն պատուիրակութիւն մը, բաղկացած Տիգրան Գազանճեանէ (ատենապետ), Յասմիկ Աբրահամեանէ (քարտուղար) եւ Արեւիկ Գաբրիէլեանէ (խորհրդական), ընկերակցութեամբ Նիւ Եորքի մասնաճիւղի փոխատենապետուհի Աստղիկ Սեւակի եւ Նիւ Ճըրզիի մասնաճիւղի վարչութեան անդամուհիներ Անի Չաղլասեանի եւ Ֆլորա Գասպարեանի, պաշտօնական այցելութիւն մը կատարեցին Ա.Մ.Ն. Արեւելեան շրջանի Առաջնորդ Արք. Օշական Չօլոյեանին:
Խորապէս գիտակցելով կրթութեան ու ազգային մշակոյթի կարեւոր դերին, Շրջանային վարչութեան անդամները անհրաժեշտ կը համարեն, շարունակ կապ հաստատել շրջանի հայկական կառոյցներուն հետ: Այսպէս, “Համազգային”ի ընթացիկ եւ յառաջիկայ ծրագիրները ներկայացնելէ ետք Բարեջան Առաջնորդին, Շրջանային վարչութեան ներկայացուցիչները անգամ մը եւս հաստատեցին միութեան պատրաստակամութիւնը` համագործակցելու եւ օժանդակելու մշակութային բնոյթի նախաձեռնութիւններուն:
Արք. Չօլոյեանի հետ հանդիպման ընթացքին պարզուեցաւ, որ շարք մը մտահոգութիւններ գոյութիւն ունին թէ՛ միութեան եւ թէ՛ եկեղեցւոյ համար: Ամենէն աւելի տագնապեցնողը, համայնքի զգալի հատուածի մը անտարբեր եւ անպատասխանատու կեցուածքն է հայկական համայնքային կեանքին հանդէպ:
Ապա, պատուիրակութիւնը, որ նախապէս նաեւ իր լիագումարը կատարած էր, այցելեց Մ.Ա.Կ.-ի մօտ Հայաստանի Հանրապետութեան մշտական ներկայացուցիչ` դեսպան Պրն. Կարէն Նազարեանին: Այս վերջինը ջերմ հիւրընկալութեամբ ընդունեց համազգայնականներուն, ապա ներկայացուց շարք մը կարեւոր նոր հրատարակութիւններ ու ծրագրեր: Պրն. Նազարեան դրսեւորեց հայ համայնքի հանդէպ իր լուրջ եւ հոգածու վերաբերմունքը: Այս արդիւնաւէտ հանդիպումը աւարտեցաւ յառաջիկայ մի քանի ծրագրերը համատեղ ջանքերով իրականացնելու տրամադրութեամբ:
