0
0
Ուրբաթ, Հոկտեմբեր 7, 2011ին, յետմիջօրէն սկսեալ կանուխ ժամերէն մինչեւ ուշ գիշեր, Միացեալ Նահանգներու Արեւելեան շրջանի մէջ գործող Հ.Յ.Դաշնակցութեան 9 կոմիտէութեանց ընկ. ընկհ. սկսան ժամանել “Քէմփ Հայաստան“ բանակավայր:
Յաջորդաբար երկրորդ տարին ըլլալով “Քոլոմպոսի օր“-ուան շաբաթավերջին, նմանօրինակ մակարդակի բանակում մը կը կազմակերպուէր, որ կ՛ընդգրկէր նաեւ դասախօսական շարք եւ ընկերային ծրագիր:
Դասախօսական նիւթերն էին.- “Համշէնահայերը“ – Յակոբ Խաչիկեան,“Տիգրանակերտի Սուրբ Կիրակոս Եկեղեցւոյ Վերանորոգումն ու Վերազարթնումը“ -ՐաֆֆիՊետրոսեան (Գանատա), “Տերսիմի Հայերը“ – ՎահագնԳարագաշեան (Գանատա), “ՊոլսահայԳաղութը“ -Խաչիկ Մուրատեան, “Պաշտպանենք Արցախը“ ևՎահանՊատասեան (Արցախ) “Արցախի Տնտեսական Բարգաւաճում եւ Մարտահրաւէրներ“ – ԱնդրանիկԳասպարեան: 
Ասոր կողքին, նաեւ յատուկ զեկուցում տրուեցաւ Արցախի Ա.Մ.Ն. Արեւելեան Շրջանի Հիմնադրամի մասին: Նաեւ փոխանցուեցաւ այլ զեկուցում մը` Ա.Մ.Ն. Արեւելեան Շրջանի “Շիրակեան“ Կ.Կ.-ի կայքէջի մասին, Վարդիվառ Քէշիշեանի կողմէ:
Իսկապէս հպարտութիւն ներշնչող երեւոյթ մըն է այս բանակումին գաղափարը, ուր 9 կոմիտէութիւններէ ժամանած շուրջ իննիսուն ընկեր-ընկերուհիներ, մեծ խանդավառութիւն ստեղծեցին:
Անոնք առիթ ունեցան իրար ծանօթանալու, մտքեր փոխանակեցին եւ միասնաբար մշակեցին ու ծրագրեցին ներկայ եւ յառաջիկայ իրենց գործունէութիւնը, համաշխարհայնացող եւ ճարտարուեստականացող պայմաններու պարտադրանքով ստեղծուած, եւ յատկապէս ներկայ իրականութեան մէջ օրըստօրէ մեր ազգային ինքնութեան սպառնացող կիզակէտերը, եւ ազգային կեանք ցնցող հարցերը կարենալ յաղթահարելու:
Բնականաբար այս տուեալ դժուարութիւնները կարենալ յաղթահարելու համար անհրաժեշտ է բոլոր մարզերէն ներս Հայրենիք, Արցախ եւ Սփիւռք համագործակցութիւնը:
Ա.Մ.Ն. Արեւելեան շրջանի Հ.Յ.Դաշնակցութեան Կ.Կոմիտէն գիտակցելով եւ արժանի գնահատումը կատարելով Արցախահայութեան ապրած ընկերային դժուարութիւնները, յայտարարեց Ա.Մ.Ն. Արեւելեան շրջանի Արցախ հիմնադրամի ստեղծումը:
Գնահատելի էր շրջանի կոմիտէութիւններու կատարած աշխատանքը, ներշնջել եւ դաստիարակել երիտասարդներ Հ.Յ.Դաշնակցութեան ազգային-գա
ղափարախօսութեամբ, տեսլականութեան երթը` իր ազգային ելեւէջներով ու վերիվայրումներով. սակայն, միշտ վճռակամութեամբ, համոզումով ու հաւատքով, թէ հայը իրաւունք չունի ընկրկելու եւ տեղի տալու, այլ մնալու է պատնէշի վրայ, պայքարի մարտունակութեամբ, ոգիով ու լիցքով դիմագրաւելու պարտուողական ծրագիրները ու վճռակամութեամբ յաղթահարելու բոլոր տեսակի խոչընդոտները:
Եւ այդ տեսելականով լիցքաւորուած տասներկու նորագիր ընկեր-ընկերուհիներ, Շաբաթ, Հոկտեմբեր 8-ի երեկոյեան, “Հայաստան“ ճամբարին մէջ կատարեցին իրենց երդումը խտացնելով իրենց կոմիտէութեանց եւ Ա.Մ.Ն. Արեւելեան շրջանի Հ.Յ.Դաշնակցութեան շարքերը:
Իսկապէս տպաւորիչ էր պահը. մութ գիշեր էր, լճափին աստղացած երկնքի տակ ու վիթխարի ծառերուն ներքեւ, կանխաւ պատրաստուած խարոյկի փայտերուն շուրջ համախմբուած ընկեր ընկերուհիներու խանդավառ յեղափոխական երգերու թնդիւնով, ամէնայն հանգստութեամբ կը խանգարուէր գիշերուայ լռութիւնը:
Յանկարծ մթութեան մէջ տասներկու նորագիր երդուեալ ընկեր ընկերուհիներ վառուած ջահերը ձեռքերնին բաձր բռնած տողանցեցին ու բոլորեցին պատրաստուած խարոյկափայտերը ու կռակ տուին անոնց: Պահ մը թուեցաւ թէ ժամանողները, հայոց աշխարհի Սոսեաց անտառէն կու գային ու կրակի չաստուածներու գուրմեր էին, որոնք վառ ջահերով եկան Հայկի, Վահագնի, Արամազդի, Սասունցի Դաւիթի, Առիւծ Մհերի, Քրիստափորի, Ռոստոմ, Զաւարեանի, Արաբոյի, Աղբիւր Սերոբի, Անդրանիկի, Գէորգ Չաուշի, Մայիսեան անկախութեան եւ Արցախի ազատագրական մարտիկներու արեական արիւնն ու ոգին սրսկելու մեր երակներուն մէջ: Այս նորագիրներուն կնքահայրն էր, յատուկ այս առթիւ Արցախէն ժամանած, ազատագրութեան հերոս եւ խորհրդարանի անդամ` ընկ. Վահան Պատասեան:
Անգամ մը եւս կը գնահատենք Ա.Մ.Ն. Արեւելեան շրջանի Հ.Յ.Դաշնակցութեան Կ. Կոմիտէի նախաձեռնութեամբ եւ “Հայաստան“ ճամբարի կազմակերպիչ յանձնախումբին կատարած գնահատելի ու գեղեցիկ երկօրեայ բանակումը:
Յոյսով ենք որ յառաջիկայ տարի “Հայաստան“ ճամբարը ժամանող ընկեր-ընկերուհիներու եւ նորագիրներու թիւը պիտի կրկնապատկուի, գործնական գետնի վրայ նոր հորիզոններ բանալով մեր ազգային-գաղափարախօսութեան, ազգային արժէքներու անաղարտ պահպանման, եւ Հայ Դատի պահանջատիրութեան աշխատանքներու իրականացման:
