0
0
Կիրակի, Նոյեմբեր 1, 2009ին մահկանացուն կնքեց շատ սիրելի երէցկին Արփինէ Շիրիգեանը Միշիկընի մէջ: Նոյեմբեր 6ին, տեղի ունեցաւ անոր պատշաճ յուղարկաւորութիւնը, որուն ներկայ էին Թեմիս Առաջնորդ Սրբազան Արք. Օշական Չօլոյեան, Արեւելեան Թեմի Առաջնորդութեան կղերականներ, Մեծն Տիթրոյթի Հայ եկեղեցիներու Հովիւներ եւ Սուրբ Սարգիս Եկեղեցւոյ Հովիւ Տէր Տարօն Ստեփանեան: Ներկայ էին նաեւ գաղութիս քոյր կազմակերպութիւններու ներկայացուցիչներ, հարազատներ եւ բարեկամներ, որոնք եկած էին տալու իրենց վերջին յարգանքի տուրքը սիրելի Երէցկին Արփինէ Շիրիգեանի:
Յուղարկաւորութենէն անմիջապէս ետք Սբ. Սարգիս Եկեղեցւոյ յարակից “Լիլիան Առաքելեան” սրահին մէջ տեղի ունեցաւ երէցկինի յիշատակին նուիրուած հոգեճաշ մը, որու ընթացքին Սրբազան Հայրը յիշեց երէցկինը ըսելով “Ան մարմնացումն էր երէցկին կոչումին: Ան Տէր Կորիւնի կողքին, ծառայեց երկար տարիներ Սրբ. Սարգիս եկեղեցւոյ համայնքին եւ եղաւ ամուր եւ հաստատ հիմերէն մէկը այս գաղութիս: Ան շարունակ ներշնչեց իր շուրջինները, մեծ թէ պզտիկ, ծառայելու Հայ Եկեղեցւոյ եւ Հայ Ազգին”: Զանազան անձնաւորութիւններ խօսք առնելով դրուատեցին իրենց յիշատակներն ու տպաւորութիւնները երէցկինի մասին:
Երէցկին Արփինէ անդամ էր Հայ Օգնութեան Միութեան Տիթրոյթի “Մարօ” մասնաճիւղին, ուստի “Մարօ” մասնաճիւղին կողմէ, ընկերուհի Քէրըն Յակոբեան խօսք առաւ ըսելով “Երէցկինի համար անկարելի բան գոյութիւն չունէր, ան զօրաւոր եւ հաստատ անձ մըն էր որ կը ներշնչէր եւ կը կազմակերպէր նոր սերունդը միանալու Հայ Օգնութեան Միութեան շարքերը: Ան յաճախ կը շեշտէր կարեւորութիւնը երիտասարդ օրիորդներու եւ տիկիններու մասնակցութեան իրենց շատ սիրելի այս կազմակերպութեան”: Ան աւելցուց ըսելով “այս շնորհալի կինը իր զանազան անձնաւորութիւններով մեր ադամանդն ու մայրն էր: Մասնաճիւղիս բոլոր անդամուհիներուն կողմէ յարգանք եւ շնորհակալութիւն քեզ սիրելի երէցկին”:
Հայ Օգնութեան Միութեան տեղւոյս Միջ վարչութեան եւ հինգ մասնաճիւղերուն կողմէ ընկերուհի Սիրվարդ Թէլէպեան խորին ցաւակցութիւն յայտնեց դոկտ. Աւագ քահանայ տէր Կորիւն Շիրիգեանի, բոլոր Շիրիգեան ընտանիքներուն, հարազատներուն եւ ներկաներուն: Ան շարունակեց ըսելով “ընկերուհի Արփինէ Շիրիգեան բոլորէն սիրուած ու յարգուած տիպար Հ.Օ.Մ.-ուհի մը եւ հայրենասէր անձ մըն էր: Ան ստանձնած էր զանազան վարչական պարտականութիւններ”, եւ յիշեց անոնցմէ մի քանին` Միջ վարչութեան ատենապետուհի, Հ.Օ.Մ.ի տեղւոյս Զաւարեան միօրեայ վարժարանի հայերէն լեզուի ուսուցչուհի, Շրջանային Վարչութեան ներկայացուցիչ, Հայաստանի երկրաշարժի օգնութեան յանձնախումբի ատենապետուհի եւայլն: Ընկերուհի Սիրվարդ վերջացուց իր խօսքը ըսելով “սիրելի երէցկին Արփինէ, քո այնքան սիրած կազմակերպութեան գործը պիտի շարունակենք նոյն խանդով ու հաւատարմութեամբ: Լոյս իջնէ հոգւոյդ սիրելի երէցկին”:
Հ.Օ.Մ.ի Տիթրոյթի բոլոր ընկերուհիներու անունով կը խոնարհիմ քո շիրիմին առջեւ ըսելով` Վարձքդ կատար եւ հողդ թեթեւ սիրելի ընկերուհի:
Հ.Օ.Մ.ի ընկերուհի
ԱԼԻՍ ՓԻԼԻՊՈՍԵԱՆ
