0
0
Աշխարհի տարբեր երկիրներէ Արցախ այցելած Հ.Օ.Մ.-ականներուն ի պատիւ Հ.Օ.Մ.-ի Արցախի միաւորը կազմակերպած էր պաշտօնական ճաշկերոյթ-դրամահաւաք` Ստեփանակերտի «Սօսէ» մանկապարտէզի կառուցման նպատակով:
Ճաշկերոյթին ներկայ էին Արցախի թեմի առաջնորդ Պարգեւ արք. Մարտիրոսեան, Հ.Յ.Դ. Արցախի Կեդրոնական կոմիտէի ներկայացուցիչներ:
«Սօսէ» մանկապարտէզի շինարարութեան նպատակով կազմակերպուած դրամահաւաք-ճաշկերոյթին հաւաքուած է անհրաժեշտ գումարին կէսէն աւելին` 647 հազար տոլար: Ճաշկերոյթին ամբողջ հասոյթը յատկացուած է ՀՕՄ-ի Ստեփանակերտի «Սօսէ» մանկապարտէզի կառուցման:
Ձեռնարկին ընթացքին Հ.Օ.Մ.-ականները եւս կատարած են նուիրատուութիւններ, որոնք պիտի տրամադրուին նոյն նպատակին:
Հ.Օ.Մ.-ի Արեւելեան Ա.Մ.Ն.-ի պատասխանատու եւ «Սօսէ» մանկապարտէզի շինարարութեան յանձնախումբի նախագահ Անժել Մանուկեան նշեց, որ Հ.Օ.Մ.-ի Կեդրոնական վարչութիւնը երեք ամիսէ ի վեր քարոզչական աշխատանք տարած էր, որպէսզի կարելի ըլլայ այս արդիւնքին հասնիլ:
«Հ.Օ.Մ.-ուհիներուս համար պատիւ է Ստեփանակերտի մէջ ունենալ արդիական պահանջներով յագեցած մանկապարտէզ: Մենք ջանք ու եռանդ պիտի չխնայենք Արցախի «Սօսէ» 12 մանկապարտէզներու ցանցի վերանորոգման ծրագիրը շարունակական դարձնելու համար», յայտնեց Մանուկեան` աւելցնելով, որ երկու տարի ետք` 2017 թուականին, Հ.Օ.Մ.-ի աշխարհասփիւռ կառոյցներու ներկայացուցիչները պիտի համախմբուին Արցախի մէջ` տօնակատարելու «Սօսէ» մանկապարտէզի նոր շէնքին բացումը:
Նշենք թէ «Սօսէ» մանկապարտէզներէն՝ Արցախի Ստեփանակերտ քաղաքի մանկապարտէզի նոր շէնքի ծրագիրին մեկնարկը տեղի ունեցած էր Հ.Օ.Մ.-ի Համահայկական 71րդ Պատգամաւորական ժողովին ընթացքին, Հոկտեմբեր 7, 2015ին, Երեւանի DoubleTree By Hilton հիւրանոցէն ներս:
Մանկապարտէզի շէնքը պէտք ունէր լայնածաւալ վերանորոգումներու, եւ Հ.Օ.Մ.-ի Կեդրոնական վարչութիւնը որոշած էր ամբողջովին վերակառուցել շէնքը: Այսպիսով, Արցախի ազատագրման պայքարին զոհուած ազատամարտիկներու զաւակներուն համար Ապրիլ 1998ին հիմնուած մանկապարտէզը, քանդուեցաւ որպէսզի հիմը դրուի արդիական կառոյցի մը:
Երեք յարկանի շէնքը, որուն յատակագիծը ունի գրեթէ 6 հազար քառակուսի ոտք տարածութիւն, պիտի ծառայէ 3էն 6 տարեկան 130 աշակերտներու: Երկրորդ յարկը պիտի տրամադրուի աւելի մեծ տարիքով աշակերտներու արտադպրոցական ծրագիրներուն: Այս նորակառոյց շէնքը նաեւ պիտի ունենայ արհեստագիտական (internet, networking) սարքաւորումներ:
Պատգամաւորական ժողովին ընթացքին, հանգանակիչ յանձնախումբը ներկայացուց շինարարական աշխատանքներու ծրագիրը:
«Ստեփանակերտի մանկապարտէզը պիտի ունենայ արդիական սարքաւորումներով շէնք մը, ուր ազատ Արցախի մէջ ապրող մանուկները պիտի ստանան որակաւոր ուսում», ըսաւ Անժէլ Մանուկեան, հանգանակիչ յանձնախումբի ատենապետուհին:
Հանգանակիչ յանձնախումբը շէնքը կառուցելու եւ կահաւորելու համար նախատեսուած 850,000 ամերիկեան տոլարի պիւտճէէն շուրջ 500,000 տոլար արդէն իսկ հանգանակած է: Բարերարներու շարքին են տէր եւ տիկին Ճէքի եւ Սեդա Կիւվրէքեան (2009ին՝ 100,000 տոլար), մի ոմն Արեւմտեան Ամերիկայէն (100,000 տոլար) եւ տէր եւ տիկին Օրէլիան եւ Անահիտ Մարտիրոս (50,000 տոլար):
Ներկայացման ընթացքին յանձնախումբը տեղեկացուց, թէ հանգանակային աշխատանքը պիտի շարունակուի մինչեւ շէնքի կառուցման աւարտը՝ 2017ի գարնան:
Հուրի Նաճարեան, Պատգամաւորական ժողովի համաատենապետուհին, գնահատեց Կեդրոնական վարչութեան յանձնախումբը եւ աւելցուց. «Հ.Օ.Մ.-ի 27 երկիրներու բոլոր շրջաններուն, մասնաճիւղերուն եւ անդամներուն կոչ կ՛ուղղեմ, որ քաջալերեն հանգանակային արշաւը»:
Շէնքի հիմնօրհնէքը տեղի ունեցաւ Հոկտեմբեր 11-ին, մասնակցութեամբ Կեդրոնական վարչութեան, հանգանակիչ յանձնախումբին եւ Հ.Օ.Մ.-ի անդամներուն:
