0
0
ՀԱՅՐԵՆԻՔ
Ամիսներ առաջ Պոլսոյ Թաքսիմ հրապարակի վրայ ծայր առած խռովութիւնները պատճառ դարձած էին որ աշխարհը իր բոլոր ցամաքամասերով հետեւի այդ Արեւմուտքն ու Արեւելքը կամրջող քաղաքին անցուդարձերուն:
Շաբաթներ շարունակ, Պոլիսը եղաւ Աշխարհի կիզակէտը: Լրագրողներ իրենց գրչի ետին, լուսանկարիչներ իրենց ոսպնեակի ետին նկարագրեցին Պոլսոյ իրավիճակը, յատկապէս նեղ կացութեան մատնելով վարչապետ Ռեճէպ Թայիպ Էրտողանն ու իր գործադիր ղեկավարութիւնը:
Այսօր, տարեվերջի եւ … տարեսկիզբի օրերուն, հաւանաբար լրագրողներ (յատկապէս միջազգային) եւ լուսանկարիչներ չեն ժամանած Պոլիս, սակայն Էրտողան կ՛ապրի այդ Թաքսիմի անկիւնադարձային օրերէն շատ աւելի դժուար ժամեր:
Եթէ Թաքսիմը…արտաքին պատկերն էր, այս պարագային հարցն ու կիզակէտը` ներքին պատկերն է…ներքին խոհանոցը, ուր ԶԵՂԾԱՐԱՐՈՒԹԻՒՆՆ ՈՒ ՓՏԱԾՈՒԹԻՒՆԸ փոխարինած են “Արդարութիւնն ու Բարգաւաճումը“…եւ այդ ալ ինչպէ՜ս:
Այս անգամ ամբաստանողը, անցեալ Յունիսի Թաքսիմի խռովութիւններու բաղդատած, ընդհանուր առմամբ ձախն ու անոր մօտակայ արբանեակ կազմակերպութիւնները չէին, ոչ ալ այլ հզօր կառոյց մը` բանակը, այլ Էրտողանի կուսակցութեան նման, կրօնական արդի եւ արեւմտեան սկզբունքներու վրայ հիմնուած, թիւ մէկ մրցակից “ակն ընդ ական“ թշնամի շարժում-կազմակերպութիւնը` “Ճեմաաթ“ը, որուն ղեկավար Ֆեթհուլլա Կիւլէնը (1999-էն ի վեր, Ֆիլատելֆիա հաստատուած) մեծ ժողովրդականութիւն կը վայելէ, եւ գործածելով քարոզչական (որոնց կարգին, ամենէն աւելի սպառող “Զաման“ թերթը) արդի միջոցները, հաստատօրէն թափանցած է երկրի զանազան խաւերէն ներս, ներառեալ կառավարական:
Յառաջիկայ Մարտ 30-ին, պիտի կատարուին տեղական ընտրութիւնները, ուր այս ընթացքով Էրտողան եւ իր կուսակցութիւնը, որոնք տասնամեակէ մը աւելի յիսուն առ հարիւրէ աւելի քուէներ կրցած էին հաւաքել, այս անգամ կրնան մեծ դժուարութիւններու առջեւ գտնուիլ:
Մինչ այդ, կենսոլորտի նախարար Էրտողան Պայրաքտար, իր հրաժարականը ներկայացնելու ժամանակ, կոչ ուղղած է վարչապետ Ռեճէպ Թայիպ Էրտողանին, որպէսզի ի՛ր կարգին ներկայացնէ հրաժարականը…
