0
0
Հ.Մ.Ը.Մ.-ի Արեւելեան Ա.Մ.Ն.ի 23-րդ շրջանային սկաուտական բանակումը տեղի ունեցաւ Օգոստոս 19-23, 2009-ին Մէրիլենտ նահանգի Ուէսթ բանակավայրէն ներս, նախաձեռնութեամբ եւ կազմակերպութեամբ Շրջանային Սկաուտական Խորհուրդին: Բանակումին սկաուտական Շրջանային Խորհուրդէն ներկայ էին Եղբայրներ՝ Զարեհ Գարակիւլէեան եւ Շանթ Ժամկոչեան, Քոյր Էլիզապէթ Տրամկոչեան, Շրջանային Խմբապետ եղբ. Արամ Գայսերեան եւ Շրջանային Վարչութեան սկաուտականի ներկայացուցիչ Քոյր Երան Սիմոնեան:
Այս տարեշրջանին, հիւրընկալ մասնաճիւղ չունենալով խորհուրդը ստանձնեց բոլոր աշխատանքները: Բանակումին մասնակցութիւն բերին 146 սկաուտներ (Պոսթըն՝ 55, Շիքակօ՝ 10, Տիթրոյթ՝ 6, Ֆիլատելֆիա՝ 15, Ուաշինկթըն՝ 21, Ֆլորիտա՝ 2,Նիւ Ճըրզի՝ 18, Փրովիտընս՝ 18): Բանակումի մասնակցողներուն 12ը գայլիկ-արծուիկներ էին: Բանակումի ընթացքին, սկաուտները հետեւեցան հետեւեալ դաստիարակչական նիւթերուն՝
Ընկերաբանական.- »Անհատական Կարողութիւն«՝ Եղբ. Սարգիս Տրամկոչեան:
Սկաուտական.- խարոյկ պատրաստել, կապեր, աշտարակ կամ կայմ շինել՝ Եղբ. Սմբատ Տրամկոչեան. պահակութիւն եւ շարքային աշխատանք՝ Եղբ. Արամ Գայսերեան:
Հ.Մ.Ը.Մ.-ական.- »Հ.Մ.Ը.Մ.ական սկաուտին ու արծուիկին դերը՝ ազգային կեանքին մէջ«՝ Եղբ. Գէորգ Թաթարեան, Սկաուտական խորհուրդները շրջանային եւ մասնաճիւղի՝ Եղբ. Զարեհ Գարակիւլէեան: Համա-Հ.Մ.Ը.Մ.ական բանակումի իրենց փորձառութիւնները փոխանցեցին՝ քոյրեր Արշօ Գանթարճեան եւ Լորիկ Փիլիպոսեան:
Ազգային.- Մեր Հայրենիքի քրիստոնէական ճարտարապետական հարստութիւնները Եղբ. Սահակ Զաքարեան: Հայ Դատ եւ հայ սկաուտը՝ Քոյր Սօսէ Պէօճէքեան:
Շտապ օգնութիւն եւ առողջապահութիւն՝ Քոյր Ալին Պաղտասարեան:
Ընդհանրապէս դաստիարակչական բաժիննրու վերջաւորութեան բանակողներուն լուսաբանական հարցումները յաճախ ընթացք տուին զրոյցներու ինչ որ նիւթերը աւելի շահեկան դարձուցին:
Հակառակ օդի աննպաստ պայմաններուն, Շաբաթ երեկոյեան բանակավայր այցելեցին Ուաշինկթընի մասնաճիւղի վարչութեան անդամներ, ծնողներ եւ համակիրներ:
Դրօշակի արարողութեան ընթացքին Համա-Հ.Մ.Ը.Մական բանակումի պատրաստութեան երկու սեմինարներու ընթացքին Առաջին կարքի քննութեան յաջողած 13 քոյրերուն եւ եղբայրներուն յանձնուեցաւ վկայագրերն ու կրծքանշանները. Շրջանի Խմբապետին եւ սկաուտական խորհուրդի անդամներուն ձեռամբ:
Դրօշակի արարողութեան աւարտին, բանակողները ընթրիք հիւրասիրեցին: Կարճ դադարէ մը ետք, խարոյկահանդէսը սկիզբ առաւ, ուր ներկայացուեցան զաւեշտներ, խմբային կանչեր ու երգեր: Խանդավառուած սկաուտ քոյրերուն եւ եղբայրներուն ներկայացուցած հետաքրքրական եւ ոգեւորիչ յայտագրէն, եղան սրտաբուխ նուիրատուութիւններ: Խարոյկահանդէսի յայտագրի վերջին բաժինը վերապահուած էր DJին, ուր հայկական թէ միջազգային երգերով պսակեցին երեկոն խմբային պարերով մինչեւ կէս գիշեր:
Այս տարուայ բանակումը, յաջող էր, յատկապէս մասնակցութեան թիւը, սկաուտներուն ջերմ տպաւորութիւնը, չնայած թուականին խաչաձեւումը դպրոցական վերամուտին կարգ մը մասնաճիւղերու համար:
Վերջին օրուայ փակման դրօշակի արարողութեան ընթացքին, խօսք արին Շրջանային Սկաուտական Խորհուրդի Ատենապետ Եղբ. Զարեհ Գարակիւլէեանը եւ Շրջանային Վարչութեան ներկայացուցիչ Քոյր Երան Սիմոնեանը, որոնք շնորհաւորեցին բոլորին, յաջող բանակում մը կատարելուն առիթով:
Խմբապետական կազմն ու շրջանային խմբապետը յուշանուէրներ բաժնեցին գայլիկ-արծուիկներուն: Ի վերջոյ յետադարձ ակնարկ մը նետելով մեր բանակումին վրայ կարելի է հաստատել թէ՝ Ծնողներու, Պատասխանատու մարմիններու թէ խմբապետական կազմի անդամներու միասնական-համոզումն ու հաւատքը Հ.Մ.Ը.Մ.-ի հետապնդած մեծ գաղափարին եւ համերաշխ համագործակցութեան բարձր ոգին այս յաջողութեան գրաւականն էր:
Վարձքերնիդ կատար:
Շ. ԺԱՄԿՈՉԵԱՆ
(յապաւումով)
Տիթրոյթ
